Lipsk (JBo/SN). Serbske studentske towarstwo Sorabija Lipsk je wčera w klubowni internatneho domu při Arna Nitzschowej, w tak mjenowanej centrifuze, swoju kermušku woswjećiło. Kaž po tradiciji z wašnjom, su zdobom zaso nowačkow do swojeho cyłka přiwzali.

Lětsa běše jich cyłkownje dźesać. Mjez nimi běštaj tež stipendiatka z Pólskeje a stipendiat z Čěskeje, kotrajž wot nětčišeho semestra na Lipšćanskej uniwersiće studujetaj. Zo bychu so wšitcy nowačkojo bliže ze skutkowanjom Sorabije zezna­jomili, spřihotowachu Sorabičenjo a Sorabičanki z wyšich semestrow wšelke stacije. Na nich wěnowachu so předewšěm stawiznam a skutkowanju towarstwa, kaž tež wažnosći hajenjow stykow k dalšim Lipšćanskim jědnatkowym radam. Nimo toho wuzběhnychu, kotre wažne zarja­dowanja kóždeho sobustawa Sorabije w běhu lěta wočakuja. Zbližili běchu nowačkam tele informacije mjez druhim w formje wšelakich hrow, molowanskich nadawkow a kwisow.

Na njedawnym mytowanskim zarjadowanju třěšneho zwjazka dźewjeć wosobam Čestne znamješko Domowiny spožčili

Prócowanje wo rěč a kulturu našeho ludu je aspekt, na kotryž při spožčenju Čestneho znamješka Domowiny přewšo dźiwaja. Móžnosće k tomu su wšelake, a tež perspektiwa, z kotrejež počesćeni jednaja, rozdźělniša być njemóže.

Mjena počesćenych z Mytom Domowiny kaž tež z Čestnym znamješkom Domowiny je mytowanski wuběrk Zwjazkoweho předsydstwa Domowiny w minjenych lětach stajnje bórze po swojich rozsudach wozjewił. Lětsa je zjawnosć je hakle krótko do mytowanskeho zarjadowanja zhoniła, kotrež wotmě so minjeny pjatk w Budyskim Serbskim domje. Myto Domowiny za dorost lětsa žane spožčili njejsu.

Budyšin (SN/at). Wuznamjenjenski akt krótko do róčnicy załoženja Domowiny je wuprajenje dźaka za wjelelětny wosobinski angažement w narodnym dźěle. A tón móže wjelestronski być, kaž su wobdźělnicy čestneho zarjadowanja na žurli Serbskeho domu nazhonili. „Čestnohamtske skutkowanje ze wšoserbskim wuznamom“ je lawreatam Myta Domowiny jeje předsyda Dawid Statnik wobkrućił.

Budyšin (SN). Zwjazkowe předsydstwo je na swojim posedźenju njedawno w Choćebuzu namołwu k zapodaću kandidatnych namjetow za wuzwolenje serbskich zastupjerjow ze Sakskeje do załožboweje rady wozjewiło. K tomu słuša tež naprašnik za kandidatki a kandidatow. Woboje je na internetnej stronje třěšneho zwjazka přistupne. Serbske zjednoćenstwa móža namjety zapodać, tež jednotliwcy smědźa so požadać – hač do 1. nazymnika/nowembra 2022. Adresy: ; Domowina, Póstowe naměsto 2, 02625 Budyšin. Wólby so na posedźenju zwjazkoweho předsydstwa 25. nazymnika/nowembra wotměja. Nadawk zastupjerjow Serbow w załožbowej radźe je, zhromadnje z druhimi Serbami a zastupjerjemi tak mjenowanych pjenjezydawarjow wo eficientnym zasadźenju dawkowych pjenjez na dobro serbskeho ludu přemyslować a rozsudźić. Při tym su ideje a nazhonjenja z najwšelakorišich wobłukow prašane. Při tutej dźěławosći dźe wo konkretne prawniske, hospodarske abo kulturnopolistiske naležnosće. Załožbowa rada ma dokładne rozdawanje srědkow wobzamkować.