Młodostni dadźa wuměłcej nasćěnowy wobraz molować
Lětni serial SN
1. dźěl
Idejowe wubědźowanje „Rěč wjaza. Rěc zwězujo. Sorbisch verbindet.“ je Załožba za serbski lud loni přewjedła. 27 projektow su z pjenježnym dobyćom w pjeć kategorijach 500 do 10 000 eurow mytowali. W našej lětnjej seriji předstajamy wubrane dobyćerske projekty, dźensa tón Pančičansko-Kukowskeje młodźiny:
W młodźinskim klubje w Pančicach-Kukowje so pilne ruki hibaja. Na sportnišću, w pincy tamnišeho twarjenja,o młodostni tuchwilu skerje dźěłaja hač so zabawjeja.
Stajnje a zaso maja ideje, kak móhli swój domicil dale porjeńšić. Wubědźowanje Załožby za serbski lud so runje w prawym času wotmě. „Běch wo tym čitała a wo ideji rozmyslowała, kotraž by na dobro kluba pjenjezy wunjesła a wšitkim aktiwnym čłonam tyła“, rjekny Jadwiga Šnajdrec, kotraž je swěrna čłonka kluba. Ze zhromadneho rozmyslowanja 23lětneje a druhich młodostnych nasta ideja. Na wjace kwadratnych metrow wulkej sćěnje kluba měł nastać nasćěnowy wobraz pod hesłom „Serbske wosebitosće w Pančicach-Kukowje“.
Dalša „rěčna swětłownja“ w septembrje
Wojerecy (SN/at). „Rěčne swětłownje we Wojerecach“ su woblubowane zarjadowanja z nimale krutym kruhom wobdźělenych. Serbskej rěči tež lětsa k wjetšemu zjawnemu prestižej dopomhać, to bě sej předsydstwo Domowinskeje župy „Handrij Zejler“ w januarje předewzało. Krótko do wulkich šulskich prózdnin je wone na swojim julijskim wuradźowanju tři wuspěšne zetkanja wotličiło, kaž jeho čłon Werner Sroka našemu wječornikej rozprawja. „Smy našu ,rěčnu swětłownju‘ w aprylu, meji a juniju dale wjedli. Stajnje je dźesać do dwanaće zajimowanych přichwatało.“ Woni drje mějachu rozdźělny staw wobknježenja rěče, na to pak su so organizatorojo nastjili. „Fakt je, zo ze zarjadowanjom pokročujemy“, zdźěli Werner Sroka poziciju župneho předsydstwa. Wězo, cyle tak kaž w času do korony njeje było, hdźež su so tež raz w hosćenu zetkali. Bróžnja při Domowinskim domje pak bě na skrućenju swojich znajomosćow w serbskej rěči zajimowanym dobra městnosć. Wobsahowje su při tym mjez druhim z dźěćaceho časopisa Płomjo čitali abo so z prašenjom „N abo ń?“ zaběrali. Přichodne zetkanje planuja w septembrje.
Z pisanym programom swoje 42lětne wobstaće woswjećili
Pod hesłom „40 lět a žadyn kónc wotwidźeć njeje“ woswjeći Serbski folklorny ansambl Wudwor (SFAW) ze zapozdźenjom swoje 40lětne wobstaće. Swjedźeń běchu korony dla dwójce přesunyć dyrbjeli. Z wotběhom zarjadowanja su zamołwići jara spokojom.
Hórki. (SN/JBo). Mnohostronski to swjedźeń, kotryž běchu sej wopytowarjo a wopytowarki minjeny kónc tydźenja składnostnje 42lětneho wobstaća SFAW lubić dali. Zahajiłoj staj program pjatk wječor na Smolic burskim statoku w Hórkach moderatoraj Milenka Rječcyna a Fabian Kaulfürst. Nimo folklorneje hudźby wočakowachu přitomnych tež předstajenja lajskeju dźiwadłowych skupinow Chrósćicy a Šunow-Konjecy. Po tym přizamkny so spěwny wječork ze skupinu ČILAK z wšelkimi słowjanskimi spěwami.
Wot toho, zo je zazběh swójbneho swjedźenja Budyskeje župy „Jan ...
Łužiski monitor dale wuwić
Na mjezynarodny spěwny a rejwanski swjedźeń
Za premjeru zwučowali
Slěbornu jehłu Michałej Jancy
Budyšin (LTh/SN). Na probje chóra Budyšina minjenu póndźelu sta so něšto cyle wosebite. Wosrjedź zwučowanja dóstachu njenadźicy wopyt. Bě to předsyda Wuchodosakskeho chóroweho zwjazka Andreas Hauffe z Drježdźan. Chór Budyšin je hižo wot lěta 1993 z aktiwnym čłonom tohole zwjazka. Spěwarki a spěwarjo pěstuja tak stajny kontakt k spěwnym ćělesam nic jenož swojeho regiona, ale tež z chórami z cyłeje Sakskeje a zdobom z cyłeje Němskeje, wšako je zwjazk zakótwjeny do Němskeho chóroweho zwjazka DCV, kotryž je hakle lětsa kónc meje w Lipsku wulki wjacednjowski spěwny swjedźeń zarjadował.
Póndźelny wopyt je wšitkich překwapił, dokelž je Andreas Hauffe dirigentej Michałej Jancy přepodał za wjace hač 25lětne wuměłske nawodnistwo chóra Budyšin Slěbornu jehłu DCV a wopismo, podpisane wot prezidenta Němskeho chóroweho zwjazka DCV Christiana Wulffa, kiž je mnohim znaty jako bywši zwjazkowy prezident.
Třidnjowski spektakl-openair
Serbski folklorny ansambl Wudwor (SFAW) hotuje so na swjedźeń pod hołym njebjom, z kotrymž chce z dwulětnym zapozdźenjom štyri lětdźesatki skutkowanja wopominać. Wot přichodneho pjatka do njedźele je sep zarjadowanjow na Smolic statoku w Hórkach a w Budyšinje planowanych.
Wudwor (SN/bn). „Mam dobre začuće. Naše probowe lěwo bě wulki wuspěch, hladajo na chětro wobšěrny program su wšitcy sobuskutkowacy ze zapalom pódla“, městopředsyda ansambla Ambrož Handrik powěda. Prěni wjeršk budźe po jeho słowach hižo zahajenje: „Lajskej dźiwadłowej skupinje Chrósćicy a Konjecy-Šunow njejstej minjene lěta wustupić móhłoj. Pola nas so wobě předstajitej a snano nowych zajimcow nańdźetej. Spěwny wječor, na kotryž móže kóždy swój instrument sobu přinjesć a swoje kmanosće na nim pokazać, je tež poměrnje njewšědna wěcka.“ Mjez druhim prezentuja so w tym wobłuku tež hóstnej hudźbnej ćělesy Lidová muzika z Chrástu z Čěskeje a Szarkaláb z Madźarskeje kaž tež serbskej formaciji Přezpólni a ČILAK.
Po lětomaj dom zaso zjawnosći wotewrjeny był
Njechorń (kl/SN). Budyska župa „Jan Arnošt Smoler“ je minjenu sobotu w Njechornju Dom Měrćina Nowaka-Njechorńskeho wšitkim zajimcam wotewrěła. Župne předsydstwo je tón dźeń dotal jónu wob lěto přewjedło. Tuž bě wopyt wjac hač 50 hosći přewšo spokojacy. Amtěrowaca županka Leńka Thomasowa wopytowarjow witaše a wjeseleše so, „zo móžemy dom skónčnje zaso po dwěmaj lětomaj přestawki wotewrěć.“ Dale wona rjekny, zo „smy z kontinuitu wjele docpěli, zo so dom přiwozmje, wosebje tež we wsy, štož dołho tak njebě.“
Hosćo dožiwichu pisany program Cyžec swójby ze serbskimi spěwami. Mnozy při tym sobu spěwachu, wšako je w tutej kónčinje serbski spěw skerje mało słyšeć. Monika Cyžowa předstaji w běhu programa serbsku drastu a kak so w barbach, płatach a zdrasćenju po regionach Hornjeje, srjedźneje a Delnjeje Łužicy rozeznawa. Róža-Marja Kurfürstec-Pinkawina kaž tež jeje wnučk Florian Kießlich hosći po wustajeńcy wodźeštaj.
