Gratulacije prof. dr. Helmutej Fasce

pjatk, 08. apryla 2022 spisane wot:
Z čerstwym młodym postrowom je Domowinska skupina Komorow-Trupin-Rakecy dźensa swojemu bywšemu předsydźe prof. dr. Helmutej Fasce k 90. narodninam gratulowała. K tomu su dźěći Rakečanskeje pěstowarnje jubilara doma w Komorowje z małym programom překwapili. Helmut Faska bě skupinske zastojnstwo wot 1998 do 2008 wukonjał. Tež wjesnjanosta Rakečanskeje gmejny Sven Nowotny (CDU) bě mjez prěnimi, kotřiž su zbožo přeli. Za Budysku župu „Jan Arnošt Smoler“ staj Hilža Měhrowa a Jurij Łušćanski bywšemu županej najwutrobniše přeća spo­srědkowałoj. (Čitajće tež w předźenaku.) Foto: Feliks Haza

Móžnosće wuměny rozjimali

srjeda, 06. apryla 2022 spisane wot:

Domowina a komunalne zamołwite za serbske naležnosće měli so w přichodźe prawidłownje wuměnjeć. Namjet bě wčera na posedźenju předsydstwa župy Delnja Łužica słyšeć.

Choćebuz (SN/at). Z komunalnej runinu na dobro serbskeje rěče a kultury skutkownje hromadźe dźěłać je za předsydstwo župy Delnja Łužica zasadny narok. Tohodla su so jeho čłonki a čłonojo na wčerawšim posedźenju w Choćebuzu z dwěmaj komunalnymaj zamołwitymaj wuměnili. Sabrina Kušyna, serbska społnomócnjena wokrjesa Dubja-Błóta, je wo praktiskich přikładach rozprawjała, kak wjesne towarstwa a tajke pod třěchu Domowiny z Domowinskej skupinu na městnje skutkowanje koordinuja. Jako zastupjerka wokrjesa, kotryž je połdra lěta ze spěchowanskim čłonom narodneje organizacije, přeje sej wona, předewšěm w rozšěrjenym dźělu připóznateho serbskeho sydlenskeho ruma nowe Domowinske skupiny załožić, zo móhli tam wjesne potenciale lěpje wužiwać. Jako přikład mjenowaše Sabrina Kušyna gmejnu Markojsku gólu, hdźež hižo přewšo aktiwne towarstwowe struktury wobsteja, kaž Domowina informuje.

Haperlejka

póndźela, 04. apryla 2022 spisane wot:
Kaž chutna a trěbna debata wo dźenderowanju w serbšćinje tež była – minjeny pjatk w Serbskich Nowinach wozjewjeny přinošk „Generiski genus za runoprawosć“ bě ryzy wunamakany. Małkej pokazce na to běštej mjeno awtora kaž tež datum wozjewjenja: Skrótšenka „jj“ steji za „jutrownik, jutrownik“; a 1. dźeń tohole měsaca je tež w nowinarstwje woblubowana přiležnosć za aprylski žort. Wjetšina našich čitarkow a čitarjow njeda sej módre a zelene nabać a dyrbješe so „z cyłeje wutroby smjeć“, kaž „citowana“ předsydka Maćicy Serbskeje dr. Anja Pohončowa w redakciji SN předležacej zdźělence piše. Smy-li přiwšěm někoho znjeměrnjeli abo samo rozhněwali, njech njewza to nam za zło. Bosćan Nawka

Generiski genus za runoprawosć

pjatk, 01. apryla 2022 spisane wot:

Serbski institut (SI) a Maćica Serbska (MS) stej z „pragmatiskim a praktikabelnym“ doporučenjom na aktualnu debatu wo dźenderowanju w serbšćinje reagowałoj. Gremij rěčnych fachowcow je so při tym na přirodowědnej praksy orientował.

W měsće Karla Mayja spěwali

štwórtk, 31. měrca 2022 spisane wot:

Pančicy-Kukow (fk/SN). Chór Lipa je minjeny kónc tydźenja wuspěšne chórowe lěhwo w Hohensteinje-Ernstthalu přewjedł. 30 spěwarjow poda so ze swójbnymi do města, hdźež narodźi so před 180 lětami spisowaćel Karl May. Za Lipjanow bě dožiwjenje, po dołhim času internetowych probow zaso hromadźe zwučować.

A běchu sej tójšto předewzali: W probach nadźěłachu sej repertoire za mejski wustup w Lipsku, nalětni koncert w klóšterskej zahrodźe w Pančicach-Kukowje a za wosadny swjedźeń we Wotrowje. Nimo toho filowachu tež na spěwach za wuhotowanje prěnjeho swjateho wo­prawjenja w klóštrje a za wulki spě­wanski swjedźeń, na kotryž hotuja so w nazymje chóry z cyłeje Łužicy. Zo njeby so dźěćom spěwarjow při wěčnym probowanju dorosćenych wostudźiło, ­běchu sej swójbni wosebitu zabawu ­za nje wumyslili: Najwšelakoriše hry a eksperimenty pjerachow zahorichu.

Muzej přidźěłał

srjeda, 30. měrca 2022 spisane wot:

Wojerecy (SN). Domowinska župa „Handrij Zejler“ je za planowanu šćežku „Via Sorabica HoyWoj“ wo serbskich stawi­znach města přidźěło Wojerowskeho měšćanskeho muzeja dóstała. Wo tym je zamołwity za projekt Werner Sroka wčera na posedźenju jeje předsydstwa informował. Nětko chce tamniša regionalna rěčnica Domowiny Sonja Hrjehorjowa ze serbskej projektnej managerku města wo pokročowanju projekta jednać.

Přichodnej wjerškaj župy budźetej přednošk wo něhdyšich Słowjanach we Wendlandźe 9. meje, kotryž so składnostnje wopyta wendlandskeje delega­cije wotměwa, kaž tež Serbski wječork 12. meje hromadźe z Domowinskej ­skupinu w Nowym Měsće. W ramiku projekta „Rěčna krajina we Wojerowskim regionje njech kćěje“, mytowaneho we wubědźowanju simul+, chcedźa nětko mjena ludźi zběrać, kotřiž wjesne dialekty swěrnje nałožuja. Jich žiwu lokalnu serbšćinu chcedźa nahrawać.

Sada skomolena była

srjeda, 30. měrca 2022 spisane wot:
Bohužel je w přinošku „Towarstwo ,Zahrodka‘ dźěła za serbsku krajinu“, wudaće SN z 29. měrca, sada skomolena. W zwisku z lońšim znowazałoženjom towarstwa rěka wona prawje: „Knobloch, kotryž je tež wjesny předstejićel, to jako ,wažnu kročel‘ do směra wožiwjenja serbšćiny hódnoćeše.“ Wobžarujemy misnjenje. Redakcija SN

Słuša na digitalizacisku konferencu

wutora, 29. měrca 2022 spisane wot:

Wožiwjenje hornjo- a delnjoserbšćiny steješe w srjedźišću posedźenja Zwjazko­weho předsydstwa Domowiny minje­ny pjatk w Slepom. Prěni raz za do­bu koronapandemije móžachu zajim­cy zarjadowanje jako hosćo direktnje na žurli sćěhować.

Slepo (SN/at). Přehlad wo dźěławosći we Wojerecach zaměstnjeneho Serwisoweho běrowa za serbšćinu w Sakskej je jeho sobudźěłaćer Jan Kral podał. W nošer­stwje Domowiny je zarjadnišćo komunam w serbskim sydlenskim rumje wo­krjesow Budyšin a Zhorjelc wot oktobra 2019 přede­wšěm ze zeserbšćenjom zarjadniskich tekstow poboku. Přednošowar rysowaše koncepcionelne nadawki a kak je so dotal poradźiło je spjelnjeć. Na přikład je Jan Kral wuwjedł, zo staj hro­madźe z Francisku Grajcarekec hnydom započałoj jednotliwe komuny wopytać, zo bychu jich zarjadnistwa we wužiwanju serbšćiny poradźowali. Wobmjezowanja koronapandemije su tele prócowanja přetorhnyli. Nětko pak staj opti­mistiskaj tele wopyty pokročować móc, a to přede­wšěm w Zhorjelskim wokrjesu.

Delni Wujězd (MB/SN). Tójšto čłonow a hosći je předsyda towarstwa „Zahrodka 1921“ Frank Knobloch minjenu so­botu w Delnjowujězdźanskej radnicy na hłownu zhromadźiznu witał. Składno­stnje 100. róčnicy załoženja serbskeho dźěłaćerskeho towarstwa su je loni 19. februara ze samsnym mjenom znowa zało­žili. Knobloch je zdobom wjesny předsteji­ćel, štož jako „wažnu kročel“ do směra na wožiwjenje serbšćiny we wsy hódnoćeše. Hižo do skutkowanja Mareka Krawca jako docent za serbšćinu w Rěčnym centrumje WITAJ­ běchu čłonojo towarstwa w online-kursu serbšćinu wuknyli a tež dale z tym pokročuja.

Impulsy tež za Hornju Łužicu

štwórtk, 24. měrca 2022 spisane wot:

Prěnja dźěłarnička noweho imersiwneho delnjoserbskeho rěčneho programa za dorosćenych „Zorja“ je so wčera po třoch dnjach w Choćebuskim měšćanskim muzeju w jendźelskej rěči zakónčiła. Arapaho-Indian a profesor za antropologiju a indigene studije na Uniwersiće Montana (USA) dr. Neyooxet Greymorning je wobdźělnikam swoju inowatiwnu metodu ASLA©™ předstajił a rozłožił, kak sej cilowu rěč aktiwnje přiswojiš, bjez toho zo rěč wjetšiny nałožuješ. Mjenowanu metodu zhromadźenstwa First Nation w USA, Kanadźe a Awstralskej wuspěšnje wužiwaja.

Choćebuz (SN). Na kromje dźěłarnički projekta „Zorja“ za rewitalizaciju delnjoserbšćiny staj so wčera popołdnju kubłanska referentka Domowiny Katrin Suchec-Dźisławkowa a prof. Neyooxet Greymorning rozmołwjałoj. Greymorning je swoju maćeršćinu arapaho, kotruž bě jenož hišće połsta ludźi nałožowało, ze swójskej metodu tak mjenowaneje dospołneje imersije wožiwił. Dorosćeni wuknu rěč – kaž dźěći swoju maćeršćinu – předewšěm z wobrazami a dospołnym zanurjenjom do noweje rěče.

Serbska debata

nowostki LND