Pod móžnosćemi njewostać
Z diskusije na 22. hłownej zhromadźiznje Domowiny w Choćebuzu
Poměr mjez zastojnstwom a mandatom dale rozjimować
Hnydom na spočatku hłowneje zhromadźizny bě dožiwić, zo tež prašenja nutřkowneje demokratije najwyši organ Domowiny njewobeńdu. Předsyda młodźinskeho towarstwa Pawk Jakub Wowčer bě namjetował, dnjowy porjad wo dalši dypk k tematice „politiski mandat a funkcija w Domowinje“ wudospołnić. Hłowna jednaćelka Judit Šołćina jemu rozkładźe, zo to móžno njeje, wón pak njech w diskusiji k tomu porěča. Měto Nowak ze župy Delnja Łužica z wotmołwu spokojom njebě. Čehodla njehodźi so tematika na dnjowy porjad? „Smy najwyši organ Domowiny.“ Hłowna jednaćelka Judit Šołćina rjekny, zo „njeje to bohužel móžno“, delegaća njejsu so pječa přihotować móhli.
Najebać tutu spodźiwnu wotmołwu je Jakub Wowčer swoju naležnosć jako prašenje do žurle w diskusiji wospjetował. Sam wuprajił so pak njeje, nichtó jemu tež njewotmołwi.
Na spomóžny dyrdomdej so zwažić
Choćebuz/Budyšin (SN/at). Někotři Domowinjenjo serbsku wučbu abo serbske rěčne rumy w hortach, w šulach a w pěstowarnjach čestnohamtsce podpěruja, zhonichu wobdźělnicy hłowneje zhromadźizny Domowiny minjenu sobotu w Choćebuzu. Tak na přikład sobudźěłaćerki Domowiny a Rěčneho centruma WITAJ w Radworskej a Budyskej serbskej zakładnej šuli. Za tele skutkowanje w zajimje posrědkowanja serbskeje rěče pak chcedźa hišće wjace ludźi zdobyć, dokelž tale pomoc je kubłanišćam jara wažna, wuzběhny tam Franciska Albertowa, předsydka kubłanskeho wuběrka zwjazkoweho předsydstwa.
W kubłanskim wuběrku su so z aktualnje njespokojacej situaciju zaručenja wučby a serbskich poskitkow na šulach zaběrali, kaž wuběrkownica Alena Hiccyna hižo na posedźenju zwjazkoweho předsydstwa w měrcu rozprawješe. Nastało je mjeztym małe motiwaciske widejo z titlom „Podpěrujće dźěći při nawuknjenju serbšćiny w kubłanišćach“, zo bychu dalše zwólniwe wosoby za tajku narodnu posłužbu našli.
Wěcowny zakład
Wuměnjeć so w dobrej, mjezsobnej atmosferje
Loni bě župa Delnja Łužica w Choćebuzu hosćićelka wurjadneje hłowneje zhromadźizny Domowiny. Sobotu schadźuja so zastupjerjo župow a towarstwow wospjet w delnjołužiskej metropoli, tónkróć na rjadnu „hłownu“ serbskeho třěšneho zwjazka.
Předsydstwo so konstituowało
Budyšin (kl/SN). Nowe předsydstwo župy „Jan Arnošt Smoler“ Budyšin je so wčera w Budyšinje konstituowało. Tak je gremij nimale měsac po swojim wuzwolenju na župnej hłownej zhromadźiznje dźěłać započał. Županka Leńka Thomasowa so nadźija, zo z optimizmom a strowotu nowu wólbnu dobu hromadźe derje zmištruja. Jako hosć rjekny předsyda Domowiny Dawid Statnik, zo je wón stajnje zwólniwy čłonow předsydstwa podpěrać.
W běhu wuradźowanja staj předsyda Domowiny a županka dojednanje wo kooperaciji mjez třěšnym zwjazkom a župu „Jan Arnošt Smoler“ nastupajo zamołwitosć rěčneju motiwatorow podpisałoj. Motiwatorow při jeju skutkowanju w serbskich rěčnych rumach podpěrać, za to je župne předsydstwo tež w přichodźe partner. Mjezsobnu wuměnu mjez župu a motiwatoromaj kaž tež rozestajenje z wužadanjemi w jednotliwych kónčinach matej wobě stronje zaručić. Motiwatoraj wobdźělataj so na wuradźowanjach župy a hajitaj zwiski k Domowinskim skupinam a towarstwam w swojimaj teritorijomaj.
„Hłowna“ sobotu z livestreamom
Budyšin/Choćebuz (SN/at). Zajimcy zwonka schadźowanišća w Choćebuskej Starej chemijowej fabrice maja sobotu składnosć, 22. hłownu zhromadźiznu Domowiny w livestreamje sćěhować. Kaž Zwjazk Łužiskich Serbow dźensa informuje, wusyłaja na YouTube-kanalu Domowiny wot 9 hodź. Wšitkim, kotrychž rěčne kmanosće w serbšćinje za to hišće njedosahaja, poskićeja livestream z němskim simultanym přełožkom. Tón je přez přistupny.
Lětuša hłowna zhromadźizna je tajka wosrjedź wólbneje periody. W srjedźišću steji wobsahowe dźěło třěšneho zwjazka a z tym wobšěrne rozprawnistwo. Na swoje skutkowanje minjeneju lět zhladuja zwjazkowe předsydstwo, rewizijny a změrcowski wuběrk. Runje tak su župy a sobustawske towarstwa swoju dźěławosć w delegatam předležacych podłožkach zjimali. K diskusiji steja dźěłowe směrnicy Domowiny za lěta 2023 do 2025, kotrež ma hłowna zhromadźizna jako dźěłowy zakład za zbytk wólbneje doby schwalić. Na schadźowanju w Choćebuzu chcedźa nimo toho diskusiju wo nowym programje organizacije nastorčić.
Z publikumom zhromadnje spěwali
„Nitki našeho žiwjenja“
Ewangelscy Serbja su so znowa na kónc tydźenja swójbow w Hainewaldźe zetkali. Něhdźe 50 wobdźělnikow bě so minjeny pjatk do Žitawskich horin podało a dožiwjenjow połne dny měło.
Hainewalde (scu/SN). Zhromadny kónc tydźenja w Hainewaldźe je mjeztym woblubowany wjeršk w skutkowanju Serbskeho ewangelskeho towarstwa za ewangelske serbske swójby. Wot pjatka hač do wčerawšeje njedźele je so tón króć něhdźe 50 wobdźělnikow pod hesłom „Nitki našeho žiwjenja“ zabawjało mjez druhim ze zhromadnym spěwanjom, modlitwu a dźěłarničkami.
Přećeljo Serbow wo přichod „věstníka“ wojuja
Praha (SN/mb). Rewitalizacija Hórnikoweje knihownje w Praze steješe sobotu w srjedźišću prezentacije na hłownej zhromadźiznje towarstwa přećelow Serbow SPL („Společnost přátel Lužice“). Entuziasća SPL su hoberski projekt restawrowanja a mjeztym tež digitalizaciju knihow po wulkej wodźe 2002 zwoprawdźili. Tak je wot soboty tež 18 zwjazkow historiskeho časopisa „Serbowka“ online přistupnych. Spěchowany bu projekt ze srědkow sakskeje statneje kenclije přez Domowinu. Zarjadowanje sobotu so na zwučene wašnje w Serbskim seminarje w Praze wotměwaše. Jako zastupjer třěšneho zwjazka Serbow běše referent Domowiny za kulturu a wukraj Clemens Škoda přitomny. We wobłuku dnjoweho porjada su so wšelakim rozprawam wěnowali. Matej Dźisławk přednošowaše připołdnju w přestawce wo wustajeńcy swojich fotow w rumnosćach sakskeho zastupnistwa w samsnym domje.
Wjace serbsce informować
Budyšin (SN/at). Domowina chce w přichodźe wjace nowinskich zdźělenkow jenož w serbskej rěči rozpósłać. Pod nadpismom „Serbja wojuja w digitalnej dobje wo widźomnosć“ je powěsćernja dpa wčera wo tym informowała. Pozadk za to bě wčerawša zdźělenka nastupajo namjety, kotrež maja serbske towarstwa za lětuše wuznamjenjenja Domowiny zapodać. Sobudźěłaćer w běrowje dpa bě wo serbskim teksće zamyleny a je so pola přisłušneho referenta třěšneho zwjazka Clemensa Škody wobhonił. „Sym naprašowarja na sotra.app skedźbnił, kotraž móhła tež jemu dobra pomoc być“, rjekny Škoda našemu wječornikej. Techniske móžnosće „su mjeztym tak dobre, zo móžeš bjez problema cyłe teksty za něšto sekundow do němčiny přełožić“, dpa piše.
Njedawne zjawne słyšenje w Sakskim krajnym sejmje tematizowaše wšědne wužiwanje serbskeje rěče. Tam bu porokowane, zo runohódna dwurěčnosć w zjawnym rumje přeco samozrozumliwa njeje. Po powěsći dpa mjenowaše předsyda Domowiny Dawid Statnik rěčne wodźenje z programom Alexu Microsofta „naš přichodny zaměr“.
