Slepo (SN/mb). Na přeprošenje noweje motiwatorki za nałožowanje serbšćiny w Slepjanskej kónčinje Juliany Kaulfürstoweje su so wčera wječor w knihowni Němsko-serbskeho šulskeho kompleksa Slepo temje „Dwě rěči a wjac – zmužće so!“ wěnowali. Referentka běše Marija Šołćic. Wučerka a wuměłča keramiki ­běše ryzy serbsce wotrostła, je němčinu w šuli nawuknyła a sej za pobyt a dźěło w Francoskej francošćinu přiswojiła. Juliana Kaulfürstowa, hižo wjele lět na polu wožiwjenja slepjanšćiny angažowana, skutkuje wot najnowšeho w „Syći za regionalnu identitu a serbsku rěč“ (ZARI) Domowiny. Z tutym wulkoprojektom we wobłuku dołholětneho spěchowanja z hornca za změnu strukturow chcedźa serbšćinu do žiwjenja swójbow a towaršnosće tam wróćić, hdźež je so naša rěč z wšědneho dnja zhubiła.