Njeswačidło (SN/MWj). Wot lěta 2018 wobdźěla so spěchowanske towarstwo sakskeje ptakoškitneje stacije Njeswačidło na monitoringowym projekće, z kotrymž přepytuja wobstatk a wuwiće spěwatych ptačkow. Za to ptački najprjedy popadnu, wobstatk jednotliwych družin liča, jim – dalokož hišće žane nimaja – pjeršćenje přityknu a je zaso do swobody pušća.

Tele přepytowanja wotměwaja so kóžde lěto na cyłkownje dwanaće terminach wot meje hač do awgusta w kónčinje kołowokoło Holešowskich hatow. Při tym njejedna so jenož wo ryzy wědomostne dźěło, ale tež wo sposrědkowanje wědy. Na nimale wšitkich terminach wobdźěleja so ludźo, kiž chcedźa dohlad do dźěła spěchowanskeho towarstwa dóstać, ptački raz cyle zbliska widźeć abo so fachowje dale kubłać. Lětsa popadnychu 388 ptačkow, kotrež su prěni raz wopjeršćenili, a dalšich 179, kotrež hižo rynku mějachu.