Nowy labor za přichod hladanja
Wojerecy (SN). Za nowy labor z kumštnej inteligencu su wčera při powołanskim šulskim centrumje „Konrad Zuse“ we Wojerecach zakładny kamjeń połožili. Na ležownosći centruma ma moderna wuknjenska městnosć nastać. Młodostni maja so tam na hladanje w přichodźe přihotować. W laborje móža šulerki a šulerjo realiće podobne situacije w hladanju zmištrować wuknyć. Nimo toho zaměstnja tam digitalnu stwu za hladarjow a hladarki a digitalne asistencne systemy. Na něhdźe 766 kwadratnych metrow wulkej přestrjeni budu hišće dalše moderne nowostki zarjadowane.
Hladajo na staršu generaciju, kotraž dźeń a wjetši podźěl ludnosće wučinja, je derje wukubłany personal trěbny. Z nowej powołanskej fachowej šulu za strowotu w Budyšinje a z laborom z kumštnej inteligencu we Wojerecach so wukubłanje hladarjow a hladarkow w našim regionje zesylnja, zwurazni krajny rada Budyskeho wokrjesa Udo Witschas (CDU). Wokrjes jako nošer šule inwestuje z tym do moderneho powołanskeho wukubłanja, do přichodnych fachowych mocow a do přichoda města Wojerecy.
Šiman: „Dale tak“ njepóńdźe
Budyšin (SN). Serbski zapósłanc Sakskeho krajneho sejma Marko Šiman (CDU) je so po wólbach w Saksko-Anhaltskej słowa jimał: „Štóž sej mysli, zo móže wšo tak dale hić kaž dotal, njeje signal wolerjow zrozumił.“ Wón sej hladajo na zwjazkowu politiku personelne změny žada. Tak měł Friedrich Merz jako předsyda CDU wotstupić. Wo jeho funkciji jako zwjazkowy kancler nochce so Šiman na samsne wašnje wuprajić, wšako je to naležnosć zapósłancow zwjazkoweho sejma. CDU ma bóle wujasnić, zo njeje AfD jenož prawicarskoekstremistiska, ale tež neoliberalna strona, kotraž runja FDP zajimy chudšich ludźi njewobkedźbuje.
Šiman zwěsća dołhodobny proces zhubjenja dowěry, kotryž bu před lětdźesatkomaj z tak mjenowanymi Hartzowymi zakonjemi čerwjeno-zeleneho zwjazkoweho knježerstwa zahajeny. W rozmołwje z našim wječornikom kritizuje zahubne wuskutki systema, kotryž „ludźom jenož pjenjezy dawa a jich do dźěła njeposrědkuje“. Šiman chce lěpšu podpěru za regionalne hospodarstwo. Zwjazkowe kraje měli napřećo EU dale sobu při rozdźělenju spěchowanskich srědkow postajować.
Twarska dowolnosć dóšła
Powołanske šule we wjesnych kónčinach zachować
Budyšin (CS/SN). Ličba wučomnikow, kotřiž wukubłanje wuspěšnje absolwuja, je stabilna. Za přirjadnicu krajnoradneho zarjada Budyskeho wokrjesa dr. Romy Reinisch je tole dobra powěsć. Tole zdźěli wona w postrowje hladajo na swjatočnym zakónčenju wukubłanja wučomnikow. Zarjadowanje bě minjeny pjatk w Němsko-Serbskim ludowym dźiwadle. Wučomnicy so wědomje za rjemjesło rozsudźa. A zašo abo pozdźišo so mnozy z nich dale kubłaja na mištra abo podobne. Zo ma rjemjesło wulki wuznam w Sakskej, pokaza wustup ministerskeho prezidenta Michaela Kretschmera (CDU), kotryž je swjedźensku narěč přewzał. Wón skedźbni na wuspěšne dualne wukubłanje w zwjazkowym kraju. Zdobom chwaleše powołanski etos rjemjeslnikow, jich komory kaž tež inowacije a tradicije. Tradicijam sćěhowachu přitomni tež zaso na zarjadowanju w NSLDź. Hnydom na spočatku ćehnjechu zastupjerjo rjemjeslniskich zjednoćenstwow z chorhojemi do žurle. Po tym wotewrě so křinja, w kotrejž chowachu so wopisma.
Po potrjebje wukubłać
„Wuhladko“ swjeći jubilej
Rozmołwa Stefana Šmita z redakciskim nawodu hornjoserbskeho telewizijneho magacina Wuhladko Romanom Nukom
Knježe Nuko, što sće činił, jako je so sobotu, 1. septembra 2001, prěni raz hornjoserbski telewizijny magacin Wuhladko w telewiziji MDR wusyłał?
Sym najskerje doma před telewizorom sedźał a reakciju swojich sobu hladacych swójbnych wobkedźbował. Za prěnje wusyłanje běch jedyn ze swojich prěnich telewizijnych přinoškow zhotowił. To běch wězo wćipny na wothłós přihladowarjow. Běch tehdy hišće student a připódla sym jako redaktor a moderator za rańši program serbskeho rozhłosa a za Radijo Satkula dźěłał. Z Wuhladkom wotewri so mi potom tež swět telewizije.
Kóždu prěnju sobotu měsaca so połhodźinski magacin wusyła. Je w běhu lět hižo raz jedne wusyłanje wupadnyło? A jeli, čehodla?
Žadaja sej wotmołwy
Praksy lěkarjow njeprofituja
Wojerecy (KD/SN). Ze zaměrnym spěchowanjom móhli wosebje w gynekologiji wjace operacijow ambulantnje přewjesć. Tola zakonske chorobne zawěsćenja (GKV) to njepodpěruja. Zakonjedawar chce drje chorobne kasy a pacientow financielnje wolóžić, z tym pak dyrbja ludźo dlěje na lěkarski termin čakać. Tak chorosće pozdźišo lěkuja štož zaso wjace pjenjez płaći. Tole rozłožowaše fachowy lěkar za anesteziologiju a jednaćelski towaršnik Wojerowskeho mediciniskeho zastaranskeho centruma (MVZ) za operatiwnu gynekologiju Matthias Jochmann pjatk sakskej statnej ministerce za socialne, strowotu a towaršnostnu zwjazanosć Petrje Köpping (SPD). Wona rjekny, zo je Sakska ze swójskej protokolowej deklaraciju někotre wobsahi noweho zakonja wo stabilizowanju GKV, kotryž je zwjazkowa rada wobzamknyła, porokowała. Wot lěta 2027 maja so wšitke wudawki praksow budgetować. Tež ambulantne operacije, kotrež su chorobne kasy dotal zwonka budgeta płaćili. Jedyn puć, z kotrehož móža praksy a kliniki w Sakskej profitować, je jich splećenje w formje pilotowych projektow.
Piwo w Čěskej bórze dróše
Praha (SN/StŠ). Najwjetša piwarnja Čěskeje republiki, Plzeňský Prazdroj, je připowědźiła, zo płaćiznu za piwo podróši. Kaž w zdźělence piwarnje rěka, žwyša 1. oktobra płaćiznu za točene piwo kaž tež za dźěl produktow w tyzach a tež za piwo w blešach wo 2,6 procentow. To wotpowěduje něhdźe 0,70 krónam, štož je přeličene něhdźe tři centy. Přičiny zwyšenja płaćiznow su stupace kóšty za material, personal a přidawki, tak nowinski rěčnik piwarnje Zdeněk Kovář. Tež sćěhi wójny na Bliskim wuchodźe, wosebje blokada Hormuskeho přeliwa, so na płaćizny piwarnje wuskutkuja.
Tež w Čěskej ludźo dźeń a mjenje piwa pija. Hakle w nalěću su čěske piwarnje wozjewili, zo su loni tak mało piwa kaž hišće ženje produkowali. Po statistice je w lěće 2025 kóždy wobydler Čěskeje něhdźe wosom połliterskich piwow mjenje wupił, hač lěto do toho. Kaž předsyda Zwjazka čěskich piwarnjow Tomáš Slunečko zdźěli, pak njeje to jeničce čěski fenomen. Tež eksport čěskeho piwa je so po informacijach zwjazka jasnje pomjeńšił, dokelž so wosebje w Němskej a Słowakskej hižo telko čěskeho piwa njepředawa.
Torsten Ruban-Zeh klětu wospjet k wólbam nastupi
Čorny Chołmc (AK/SN). Ze spěwomaj „Brigita“ a „Přichod“ hudźbnika Gerharda Gundermanna (1955-1998) je měšćanski radźićel Christian Völker-Kieschnick wčera lětne přijeće Wojerowskeho wyšeho měšćanosty Torstena Rubana-Zeha (SPD) na twarnišću Centruma za awtomatizowane jězdźenje (Smart Mobility Lab) hudźbnje přewodźał. Tež sportowi akrobaća SC Wojerecy so ze swojimi wustupami wo zadźiwanje postarachu. „Tutón centrum ma so stać z městnom slědźenja a kubłanja. Wón dyrbi městno přichoda našeho města być“, wyši měšćanosta podšmórny. Wón dźakowaše so swojemu předchadnikej Stefanej Skorje a jeho zastupjerjej Thomasej Dellingej, na kotrejuž dźěło móže město nawjazać. Dale 63lětny Torsten Ruban-Zeh wčera swoju kandidaturu za druhu dobu zastojnstwa wyšeho měšćanosty we Wojerecach připowědźi. Prěnja wólbna doba so klětu nazymu skónči.
