Čorny Chołmc (SN/MiR). Łužiske předewzaća měli spóznać, kotre potenciale sobudźěłaćerjo serbskeho pochada maja. Serbšćina měła so samozrozumliwa stać. Za to tworitej społnomócnjena za serbske naležnosće předewzaća TDDK Carolina Měršowa a Kamjenska předewzaćelka Gesine Kutter syć předewzaćow. Prěnje firmy z regiona su hižo zajim signalizowali. Póndźelu, 10. nowembra, předstajitej na 3. forumje „Serbskosć w hospodarstwje“ w Čornym Chołmcu předewzaćelam swój koncept. „Chcemoj, zo so Serbja a Serbowki w předewzaćach regiona mjez sobu zwjazuja, wšojedne hač su sami čłon nawodnistwa předewzaća abo sobudźěłaćerjo.“