Wojerecy. Mjeztym třeći raz su dźěći a kubłarki horta „Handrij Zejler“, kiž je w nošerstwje Křesćansko-socialneho kubłanskeho skutka (CSB), zhromadnje meju stajeli a mjetali. Dźěći kubłanišća, kotrež chodźa do 3. lětnika tamnišeje zakładneje šule, běchu sej za to katolsku kaž tež Wojerowsku narodnu drastu woblekli. Při zdrasćenju holcow napadny, kak napjate wone běchu, jako so katolsku drastu zhotowachu. Najwjetši dźěl dźěći ma mjenujcy wuši poćah k Wojerowskej ewangelskej drasće a jenož mało dźěći pochadźa ze skerje katolskeje wokoliny. Mjez dźěćimi kaž tež hotowarničemi nasta při zdrasćenju čiła rozmołwa wo zhromadnosćach a rozdźělach katolskeje a ewangelskeje drasty, wo woznamje barbow a změnje drasty w běhu časa.­ Wobliča dźěći wo tym swědčachu, kak horde běchu, jako móžachu so skónčnje sobušulerjam pokazać.

Kubłarka horta Lysann Wilmsmeyerowa a rjadowniska wučerka Ines Kirsteinowa běštej z holcami a hólcami z wulkej prócu serbske rejki nazwučowałoj, ke kotrymž dźěći wótře serbsce spěwachu. Skónčnje wuzwoli sej Aaron Leticiju za mejsku kralownu.

Wotrow. Składnostnje dnja dźěsća je Wotrowska pěstowarnja „Dźěćacy raj“ w nošerstwje Serbskeho šulskeho towarstwa swojim chowancam rjanu překwapjenku wobradźiła. Ze swojimi kubłarkami do­jědźechu sej holcy a hólcy do Ramnowa na wulke hrajkanišćo pod třěchu.

Hižo jězba z busom bě přewšo zajimawa. Po puću wobdźiwachu młodźi pasažěrojo traktory, nakładne awta a wulke kranowe jězdźidło.

Wulke hrajkanišćo z krosnowadłom, suwadłom a awtkami k jězdźenju dźěći hnydom zahori. Tež wotdźěl za žłobikowe dźěći skićeše wulkotne móžnosće sej hrajkać. Někotrym so wosebje tołsta roła lubješe. Ju móžachu z bulikami napjelnić, kotrež horjeka zaso won třělachu. Za zastaranje njemějachu jenož mały přikusk sobu, ale dóstachu tež wobjed, kiž je kuchnja klóštra Marijina hwězda do Ramnowa dowjezła. Hańžka Nawcyna

Krótko do swjatkow bě gmejnska wohnjowa wobora Ralbicy-Róžant zhromadnje ze wšěmi pjeć wjesnymi woborami z Ralbic, Konjec/Šunowa, ze Smjerdźaceje, ze Sernjan a z Róžanta wobšěrnu wukubłansku słužbu w Šunowje přewjedła. Podpěrali su zasadźenske mocy při tym kameradaj ze susodneje gmejnskeje wohnjoweje wobory Rakecy, kiž běštaj z tak mjenowanym wjerćatym rěblom do Šunowa přijěłoj.

Jako objekt zwučowanja słužeše prózdny dom při Lěsnym puću, kotryž ma so w blišim přichodźe spotorhać. Tak so dobrowólnym wohnjowym wobornikam móžnosć skićeše, wšelake scenarije zasadźenja pod realistiskimi wuměnjenjemi trenować. Ćežišćo wukubłanja ležeše na hašenju wohenja we wuhenju. Pod fachowym nawodom zamołwiteho saznika za wobwod Kamjenc Franka Freudenberga su zasadźenske mocy wobchadźenje z tajkim scenarijom zasadźenja praktisce zwučowali. Po zapokazanju do techniki za hašenje so palaceho wuhenja přez Freudenberga dyrbjachu so kameradojo z Rakečanskim so wjer­ćacym rěblom k wjerškej wuhenja podać a tam hašenje zwučować.

W běhu lěta zetkawaja so čłonojo Serbskeje pčólnicy něhdźe pjeć razow, zo bychu so wo pčołkach dorozumili a wědu kaž tež nazhonjenja wuměnili, ale so tež na druhich polach dale kubłali. W 120. jubilejnym lěće wobstaća pčólnicy přeprosy towarstwo srjedu na njewšědne zetkanje do Małeho Wjelkowa. Přepro­šenje je něhdźe 30 zajimcow sćěhowało, z toho pak jenož mała črjódka pčołarjow.

Na zarjadowanju witachu dr. Lu­binu Malinkowu ze Serbskeho instituta. Po krótkim zawodźe w cyrkwičce Ochranowskeje wosady na Zinsendorfowym naměsće rozłoži wona stawizny tamnišeje wosady. Z lochkim a lóštnym wašnjom powědaše nam wo wužadanjach małeje wosady, kotrejž dźensa sto wosadnych přisłuša.