Bywši załožbarjo w muzeju
Jako minjeny pjatk popołdnju do Njeswačanskeho domizniskeho muzeja zastupich, wuhladach tam tójšto dołho znatych Serbow: Marka Sucheho, Marju Šimanowu, Jurja Wićaza a dalšich. Jurij Helgest runje fotografowaše. Bywši přistajeni Załožby za serbski lud běchu sej jako wuměnkarjo prěni raz zhromadnje wulećeli, a to do Njeswačidła. Bywša kolegina Wórša Pašcyna z Koslowa bě wuprawu organizowała. Nawoda muzeja Arnd Lehmann jich po wustajenišću a wosebitej přehladce přewodźowaše.
K přećelam sej wulećeli
Delegacija wohnjoweje wobory Konjec/Šunowa je so minjeny kónc tydźenja na puć k spřećelenej woborje do Legelshursta w Badensko-Württembergskej při francoskej hranicy podała. Přeprosyli běchu tamniši kameradojo na swjedźenske přepodaće swojeje noweje wohnjowoborneje gratownje, kotruž su za něhdźe 1,8 milionow eurow natwarili. Jako dar přepodachu serbscy wobornicy wohnjowy klon (Feuerahorn), kotryž zhromadnje sadźichu. Wot soboty do póndźele naša delegacija, wobstejaca ze 24 wosobow, tam přebywaše. Po swjedźenju sobotu dojědźechu sej dźeń na to do Wolfacha, do poslednjeje kristaloweje škleńčernje w Čornym lěsu. Nimo toho wobhladachu sej 2 500 wobydlerjow ličacy Legelshurst, dźěl gmejny Willstädt.
Do srjedźneje Łužicy sej wulećeli
Kruty wobstatk dźěławosće Domowinskeje skupiny Pančicy-Kukow je kóžde lěto zhromadna wuprawa z busom. Minjenu sobotu wjedźeše naš puć do srjedźneje Łužicy. Jako prěnje witaše nas Silwija Panošina z chlěbom a selu w narodnej drasće w Serbskim kulturnym centrumje w Slepom. Tu poskići nam wulkotny přehlad wosebitosćow narodnych drastow, nałožkow a powědkow Serbow. Stajna wustajeńca pokaza wobšěrnu drastowu klankowu zběrku w Slepjanskej drasće a filigrane, pisane ornamenty serbskich jutrownych jejkow kaž tež wšelake figury z powědkow. Tež regionalni wuměłcy z dźěłami molerstwa, grafiki a fotografowanja poskićeja dohlad do Slepjanskeho regiona. Dalša stacija bě Njepilic dwór w Rownom. Při šalce kofeja a po wobhladanju statoka a wustajeńcy w bróžni zhonichmy mnoho wo stawiznach regiona a wo spěchowanju narodneje drasty a zo ma jeje nowozhotowjenje za wobydlerjow wulki wuznam.
Namołwjeja k rozmyslowanju wo dalšim dźěle
Róžant (JK/SN). Towarstwo „Naša Knjeni na Lipje“ w Róžeńće je poměrnje mało znate a lědma so wo nim w medijach pisa. Załožili su je w lěće 2012 tehdyši čłonojo Ralbičanskeje wosadneje rady ze zaměrom, so prócować wo to, zo so putniska cyrkej w Róžeńće zaso ze žiwym putniskim městnom stanje. Hłownje měło so to stać přez zhromadnu modlitwu a zhromadne prócowanje wšitkich česćowarjow Maćerje Božeje. K tomu je towarstwo zarjadowało měsačne modlenje na kóždej poslednjej wutorje měsaca. Tute modlenje je so wuwiło k dobrej tradiciji a dźeń a wjace ludźi so wobdźěla. Nimo toho wěnuja so čłonojo towarstwa přihotam putnikowanjow w Róžeńće a su hłowny organizator za wuhotowanje sobotnišich Božich słužbow w Róžeńće pod hesłom „Za naš lud a kraj“.
64 lět po abiturje so zetkali
Kulow (aha/SN). Před 75 lětami załožichu w Budyšinje Serbsku wyšu šulu. 1958 złožichu tam šulerjo 12. lětnika abiturne pruwowanja. Bě to tehdy 45 maturantow dweju rjadownjow, a to 12 B/1 z rjadowniskim wučerjom Měrćinom Wornarjom a rjadownja 12 B/2 z rjadowniskim wučerjom Jurjom Pěčku.
Njewšědny zazběhdo noweho šulskeho lěta
Přihotowanski tydźeń za nowe šulske lěto 2022/2023 zahaji dźěl wučerkow a wučerjow Kulowskeje wyšeje šule „Korla Awgust Kocor“ z wopytom swjedźenskeho ćaha šulerkow a šulerjow minjenu póndźelu we wobłuku Kamjenskeje Boršće.
Zetkachmy so w bjezposrědnjej bliskosći Lessingoweho gymnazija, kiž bu po wobšěrnym ponowjenju kaž tež po při- a wutwarje hakle minjenu njedźelu znowa wotewrjeny. Smědźachmy samo skrótka do noweho kubłanišća nutř pokuknyć. Šulerjow a wučerjow wočakuja tam wuběrne wuknjenske a dźěłowe wuměnjenja, tak facit nas Kulowskich pedagogowkow a pedagogow.
Wulki són sej spjelnił
Na njedawnych šachowych mišterstwach w Budyšinje dožiwich dosć wuspěšne popołdnjo před tamnišim Měšćanskim muzejom. Móžach sej swój wulki són spjelnić: Jónu přećiwo jednomu z wulkich mištrow partiju šacha hrać.
Tež, hdyž čujach jenož snadnuški wuspěch, běše partija w sprjewinym měsće tola přemóžaca. Něhdźe 16 hrajerjow šacha nastupichmy tuž 12. awgusta, zo bychmy partiju w simultanym šachu přećiwo wulkomištrej Grigorijej Šofčenkej hrali. Spočatnje wupadaše derje. Na třoch blidach trjebaše Šofčenko stajnje trochu dlěje, zo by dokładnje rozmyslował, kotru figuru dokal pohibuje. To nas wězo pohonjowaše, ale skónčnje so tola elita přesadźi. Dźiwam so stajnje znowa, što tónle čłowjek zamóže a kak so wón wot jednoho wokomika na druhi do wšelakich situacijow zanuri. Škoda jenož, zo so tak mało dźěći z tutej zajimawej hru zaběra. Křesćan Sćapan, Kamjenej
Njezapomnite dožiwjenja
Kónc minjeneho měsaca wuleća sej Serbska pčólnica z busom Šmitec wozydłownistwa na krajnu wustajeńcu do Beelitza blisko Podstupima. To bě wulkotne dožiwjenje widźeć pychu kwětkow a sej wobhladać, kak je w Beelitzkim kraju nastała produkcija hromaka. Wosebje žonam běše to wulkotna kubłanska jězba, wšako su zeznali jim dotal njeznate družiny rostlinow a su sej wotkryli informacije za domjacu zahrodku. Najbóle zajimawy pak bě wopyt tamnišeje cyrkwje z bohatym wuhotowanjom najwšelakorišich družin rostlinow, hdźež wot meje do winowca žane Bože mšě njewotměwaja, ale w bliskej kapałce.
Póstnicy w lěću swjećili
Wosrjedź lěća póstnicy swjećić? W Lipsku je tež to móžno. Minjeny pjatk swjećachu studenća lěćne póstnicy, kotrež mjenuja SoFa (Sommer Fasching) we „Werk2“. Běchu to mjeztym dźesate lěćne póstnicy, kotrež Lipšćanske studentske rady jědnaćoch hromadźe wuhotowachu. K tymle radam słušeja fyzikarjo, chemikarjo, biologojo, sportowcy, medicinarjo, weterinarni medicinarjo, hospodarscy wědomostnicy a wězo tež Sorabija. Korony dla dyrbješe swjedźeń 2020 a 2021 wupadnyć. Ćim wjetše běštej wjeselo a angažement, zo móžeše so lětsa zaso wotměć.
Na projektnym dnju serbske institucije zeznali
Budyšin. Šulske lěto so nachila a posledni tydźeń do prózdnin je mnohim šulam dobra móžnosć čas wučby raz trochu hinak wužić. W tym tež Budyski Serbski gymnazij njeje hinaši a tuž wuhotowachu tam za swój 6. lětnik wutoru projektny dźeń.
