Tři dny na kubłanskej jězbje w Namysłowje byli
Dlěje planowana a derje přihotowana bě kubłanska jězba čłonow župy „Michał Hórnik“ do pólskeho Namysłowa. Wšako tam ze wšelakimi zarjadnišćemi hižo lětdźesatki přećelske styki pěstujemy a so tež prawidłownje wopytujemy. Tak je so minjeny pjatk popołdnju skupina čłonow předsydstwa župy„ Michał Hórnik“ kaž tež dalšich zajimcow na wuprawu do susodneho kraja podała. Nazajtra rano witaše serbskich hosći nawodnica měšćanskeho muzeja Jadwiga Kawiec. Wona wodźeše nas po měsće, hdźež sej někotružkuli wosebitostku wobhladachmy. Pobychmy w hakle njedawno ponowjenej bibliotece města, hdźež nas wosebje wulki poskitk dźěćaceje literatury překwapi. Zajimawe tež je, zo maja tam zaběru za holcy a hólcow w času, hdyž jich starši w bliskim wobchodźe nakupuja. Po wopyće Namysłówskeje knihownje rozhladowachmy so po starym młynje města. Wězo pozastachmy jako župny cyłk při pomniku basnika a nowinarja Jana Skale, hdźež počesćichmy jeho z kwětkami a ze serbskej hymnu.
Duchowny oratorij nazwučowali
Swoje kóždolětne zwučowanske lěhwo je Radworski chór Meja minjeny kónc tydźenja w Jaworniku přewjedł. W katolskim zetkawanskim a swójbnym wustawje swj. Wjacława mějachu spěwarki a spěwarjo, kotřiž su tam minjene lěta hižo wospjet přebywali, najlěpše wuměnjenja k zwučowanju.
W srjedźišću lětušeho proboweho lěhwa steješe Korle Awgusta Kocorowy duchowny oratorij „Israelowa zrudoba a tróšt“, kiž bě sławny serbski komponist lěta 1861 napisał a kotryž je wuraz jeho wysokeje wuměłskeje zdokonjanosće. Wotpowědnje wobćežne běchu „normalne“ proby chóra minjene tydźenje. Pod nawodom dirigenta Pětra Cyža a ze skutkownej pomocu pianistki Serbskeho ludoweho ansambla Soyoung Kim so Mejanam poradźi, twórbu w dalokej měrje nazwučować.
Prěni zhromadny wulět
Štóž chcyše minjenu njedźelu přiwuznych abo znatych we Wěteńcy wopytać, tón je tam cyle wěsće podarmo při durjach klinkał. Wjesnjenjo běchu sej mjenujcy zhromadnje wulećeli. Na kóždolětnej zhromadźiznje spočatk lěta, na kotrejž sej wjesne terminy a zamołwitosće wotrěča, zrodźichu woni ideju, tež jónu zhromadny dźeń zwonka wsy zarjadować.
Tak podachu so Wěteńčenjo njedźelu rano z busom do Błótow. Na Lědach zhromadnje powobjedowachu a na dwěmaj wulkimaj čołmomaj dachu so po groblach wozyć a sej wězo tež zhromadnje zaspěwachu. Dalši programowy dypk běše wopyt muzeja pod hołym njebjom na Lědach. Tam zetkachu připadnje swojich susodow-Smječkečanow, kotřiž běchu so samsny dźeń na zhromadny wulět podali. Kajki to připad a zdobom dopokaz, zo knježi na małych serbskich wsach dobra zhromadnosć.
Z pućowanjom podłu Sprjewje Wěteńčenjo swój dźeń w Błótach zakónčichu a sej prajachu, zo njebě to posledni zhromadny wulět. Alena Hiccyna
Kórkowy seminar wopytali
Składnostnje 20 lětneho wobstaća swojeho wjesneho kluba Při winicy poda so minjenu njedźelu wjace hač 40 Smječkečanow na zhromadny wulět do Błótow. Po wobjedźe w Lubnjowje dachu so z čołmikomaj na Lědy wjezć. W tamnišim muzeju móžachu nazhonić, kak Błótowčenjo spočatk 19. lětstotka sydlachu. Na štyrjoch originalnych burskich statokach je předstajene, kajke bě žiwjenje bjez elektriskich nastrojow a bjez wody z honača. Wosebje za dźěći bě zajimawe, jako móžachu wuspytać w drjewjancach běhać a z pomocu šudrawy drastu płokać.
Wosebity wjeršk bě popołdnju wobdźělenje na „kórkowym seminarje“ pola Gizele Christloweje w Lubinje. W narodnej drasće předstaji Serbowka Smječkečanam z wjele humorom zajimawostki kołowokoło kórki. Pětr Brězan
Bywši šulerjo so 60 lět po maturje znowa zetkali
Před 60 lětami napinaše so 45 maturantow dweju rjadownjow Serbskeje wyšeje šule Budyšin, zo bychu wuspěšnje abiturne pruwowanja złožili. Běštej to rjadowni 12 B/1 z rjadowniskim wučerjom Měrćinom Wornarjom a 23 absolwentow rjadownje 12 B/2 z rjadowniskim wučerjom Jurjom Pěčku. Po šěsć lětdźesatkach je so 17 bywšich šulerjow druheje rjadownje minjenu sobotu w Stróži pola Hućiny zetkało. Z česćownosću dopominachu so w rozmołwach na swojeho rjadowniskeho wučerja, ale tež na Pawoła Wowčerka, Rudija Sykoru, Horsta Meltku, dr. Bena Korjeńka, Jana Barta a na Achima a Jakuba Brankačka.
Na stare časy so dopominali
Cyle w znamjenju dopomnjenkow na čas NDR steješe njedawny lětni swjedźeń w Kamjenskim Domje swj. Jurja, na kotryž běchu přistajeni nimo wobydlerjow tež jich přiwuznych přeprosyli. Mnozy so dźiwachu, jako wuhladachu na łuce Barkas B 1000 a Trabant 601 jako motorizowaneju zastupjerjow NDRskeho časa. Blida so pod wustajenej domjacej nadobu runjewon zhibowachu. Tak wobdźiwachu wopytowarjo dederonowe fale, zawijaki za włosy, zawarjeny sad, stary warjak, knihi a wjele dalšeho.
Po tym zo bě nawoda domu wšitkich witał, předstajichu dźěći z bliskeje pěstowarnje swj. Bjarnata swój program, za kotryž su sej słódny lód na kóždy pad zasłužili. Wosebite wjeselo wobradźi program přistajenych. Hospozy „Erika a Marjana“ so bjesadujo na čas NDR dopominaštej, při čimž wšelku domjacu nadobu pokazowaštej a žortnje rozłožowaštej. Runje tak bjesadowaštej wo šlagrowych spěwarjach ze 70- a 80tych lět. Wulki gawdi bě, jako Muck, Helga Hahnemann, Frank Schöbel kaž tež dalši prominentni, na kotrychž běchu so přistajeni hladarnje Domu swj. Jurja předrasćili, spěwajo do stana zaćahnychu.
Monika Hofmanowa
Žadnostka
To hižo započa ze žadnostku: z přeprošenjom na spěwanje do Hodźija! Přeprošenje po telefonje rěkaše: Jutře budźe Serbska bjesada spěwać, na farskej zahrodźe. Na wopyt přińdźe Serbska bjesada z Rakec. Chcemy jenož spěwać a so kusk zawjeselić. Mój Božo, wotmołwich, njemóžeće to prjedy rjec? Nimam terminowu protyku při sebi. Ale přińdu – połsta-, ně jedynapołstaprocentnje! Myslach wšak na sensačny podawk w stawiznach němskeho naroda, na hru Němska – Južna Koreja. Hłós ze słuchatka: To je rozsudźene, što chcedźa Korejčenjo přećiwo Němskej wučinić. Ja: Tak jasne to njeje. Korejčenjo su hibićiwši a bojowniši. Přeprošowar: Pójće nož! Ja: Haj wšak, porěču ze žonu.
Žiwa wšelakora zhromadnosć
Na Worklečanskej wyšej šuli „Michał Hórnik“ přewjedźechmy do lětnich prózdnin projektowy dźeń pod hesłom „Žiwa zhromadnosć“. Zahajichmy jón ze zhromadnej snědanju na šulskim dworje. W rjadowniskich stwach čakachu na šulerjow tematiske jednotki, zaběrace so z hesłom dnja. Mjez druhim dźěše wo tolerancu a respekt, wo klimu w rjadowni a wo ciwilnu kuražu. K tomu bě sej šula partnerow z wokrjesa přeprosyła. Wosmy lětnik rozjimaše, čehodla je respekt wažny. Wuknjacy rozestajachu so z prašenjom, što słuša wšitko k respektej a čehodla su někotři njerespektni.
Po wobjedźe přewjedźechu šulerjo wšelke dźěłarnički, kaž na přikład rejwanje, njealkoholiske cocktaile, dźiwadźelenje, mječowy bój, medije, wohnjowa wobora, přirodna kosmetika, geocaching, linedance, kłok a prok, beatboxing a serbski rap. Kóždy móžeše so za dźěłarničku zapisać, kotraž jemu najbóle wotpowědowaše. Na kóncu dnja zhromadźichu so wšitcy w sportowni a skrótka swoju dźěłarničku předstajichu. Tak skónči so dźeń połny nazhonjenjow a nowych idejow. Tobias Bulank
Z prócowarjom Michałom Nawku so zeznajomili
Na Radworskej wyšej šuli „Dr. Marja Grólmusec“ přewjedźechu krótko do prózdnin projekt wo serbskim prócowarju Michale Nawce, a to składnostnje jeho 50. posmjertnin. Projekt běchu na namjet Maćicy Serbskeje Budyska župa „Jan Arnošt Smoler“, regionalna rěčnica Katja Liznarjec, kubłanska referentka Domowiny Rejzka Krügerowa a šulska socialna dźěłaćerka Edith Šurowa zhromadnje přihotowali.
Sławny barokny klóšter Nowa Cala wopytali
Před 750 lětami załoži Mišnjanski markhrabja Heinrich z domu Wettinow w delnjołužiskim sydlišću, kotrež so „słowinciske“ mjenowaše, klóšter Nowa Cala. Mniša přińdźechu ze Stareje Cale blisko Nossena. Zaměr bě, zdobyć tam sydlacy słowjanski kmjen za křesćanstwo. Tónle stawizniski pozadk kaž tež informacije wo skutkowanju Nowocalskich mnichow cistercienskeho rjadu při putniskej cyrkwi w Róžeńće zhonichu serbscy seniorojo Budyskeje tachantskeje wosady na njedawnej ekskursiji hižo w busu ducy do najwuznamnišeho barokneho srjedźišća w Braniborskej.
