Radwor. 25 sobudźěłaćerjow spěchowanskeje šule swjateho Jana klóštra Marijineje hwězdy zetka so minjeny pjatk w Radworskim Dwórnišću inkluzije. W zetkanišću witaše jich přijomna atmosfera a wuhotowanje swědčeše wo tym, zo tam tež na maličkosće dźiwaja. Wopyt so na kóždy pad wudani.

Zaměr wječora bě, zhromadnje warić, wječerjeć a so rozmołwjeć. Raphaela Wićazowa a Jěwa-Marja Chěžcyna wobdźělnikow witaštej. Z nimaj smy sej mjez druhim dom z móžnosćemi přenocowanja wobhladali. Snano móhła tu tež raz jedna z našich šulskich rjadownjow přenocować?

Blida běchu z receptami a přisłuškami za meni ze štyrjomi pojědźemi z wjele lubosću přihotowane. Wšitcy sobudźěłaćerjo so spěšnje rozsudźichu, hač chcedźa předjědź, poliwku, hłownu jědź abo dessert spřihotować. Wězo je na kóncu wšitkim zesłodźało, tak zo podachu so spokojni na dompuć. Organizaciskemu teamej so w mjenje wšitkich sobudźěłaćerjow cyle wutrobnje dźakuju.

Regina Lehmann, jednaćelka spěchowan­skeje šule swj. Jana

Na poslednim štwórtku wulkeho róžka smy sej kapłana Pětra Mróza do Budyskeho internata na domyswjećenje přepro­syli. Zhromadźichmy so we wulkej klubowni k małemu nyšporej. Mócnje a połnje zaklinčachu kěrluše a modlitwy. Po tym přewodźachu młodostni kapłana po domje, zo by jim žohnowanje na stwine durje napisał.

W lońšim lěće smy w internaće ně­kotružkuli rjanu akciju přewjedli, mjez druhim smy zhromadnje hrali, tykancy pjekli, kirbsowu poliwku warili abo reje za šulske zarjadowanja nazwučowali. Kaž kóžde lěto smy před hodownymi prózdninami adwentničku woswjećili. Loni je nas samo rumpodich wopytał – bjeze ­darow drje, za to pak „wobdari“ wšitkich z lóštnymi spěwami a hrami. Wosebje sym so wjeseliła, zo chcychu šulerjo hru „Activity“, kotruž běch namjetowała, w serbskej wersiji hrać. Zesłodźeli su nam tež naše samopječene poprjančki – te ­běchu so tónraz wosebje derje radźili.

Čłonojo serbskeje lajskeje dźiwadłoweje skupiny Chrósćicy podachu so před tydźenjom pjatk zhromadnje z Chróšćanskimi muzikantami na adwentny wulět. Předsyda dujerskeje kapały Roman Wjesela nas wobdźělnikow w busu powita a nam dnjowy wotběh předstaji. Prěnja stacija bě hród w Rogeńcu blisko Choćebuza. Z wupožčenym awdijo-guidom je sej kóždy samostatnje wustajeńcu we wulkotnje ponowjenym hrodźe wobhladał. Dalši puć wjedźeše nas do hrodźišća Słowjanow w Radušu. Tu wotměchu so na tutym kóncu tydźenja „Prěnje słowjanske hody“. Nowy wobhospodar běše sej wjacore hudźbne, spěwne a rejowanske skupiny z wšelakich słowjanskich ­krajow přeprosył, ale tež naši Chróšćanscy muzikanća stejachu na programowej lisćinje. Jako do Raduša dojědźechmy, předstajichu tam runje rejowarjo čěskeje skupiny JARO z Prahi swój program. Chróšćanscy hercy dyrbjachu so do spěcha měć a spěšnje swoje instrumenty ­wupakować, ­wšako mějachu hnydom po nimi swój wustup. Woni poskićichu hosćom čěske, serbske a morawske dujerske pěsnje a njejsu jenož nas Chróšćanow k sobuspěwanju pohnuli.

Srjedu popołdnju je so wjace hač 70 seniorow w Grofic galeriji w Němcach na swoju lětušu hodowničku zešło. Carsten Schmidt, zastupowacy gmejnski předstejićel, wšitkich wutrobnje powita a podźakowa so za aktiwne sobudźěło we wubědźowanju wo titul „Najrjeńša gmejna w Sakskej“. Wón prošeše wo dalšu podpěru klětu hladajo na samsne wubědźowanje wjeskow na zwjazkowej runinje. Hordźe naspomni tež aktiwnu wjesnu młodźinu a zdźěli, zo su jědnaće nowych čłonow do młodźiny přiwzali. Tež předsyda wjesneho kluba Bernd Grofa dźakowaše so přitomnym a prošeše wo pomoc w přihotach na 50. wjesny festiwal. Wón přepoda senioram 200 eurow za hodowničku. Dźěći wjesneje pěstowarnje „Pumpot“ čakachu hižo w rjanych kostimach a zaspěwachu hodowne pěsnje. Po tym zahrachu stawizničku wo Čerwjenawce. Ze sylnym přikleskom so jim rentnarjo podźakowachu. Někotre pilne žony rozdźělichu potom kofej a wšitcy zhromadnje dachu sej wosušk, kotryž je Krabatowy mlokowy swět (MKH) z Koćiny sponsorował, słodźeć.