Składnostnje mjezynarodneho dnja pčołkow je bywši Malešanski wjesnjanosta Günter Sodan wutoru na pućowanje po šćežce Hadama Bohuchwała Šěracha w Budyšinku přeprosył. Šćežku běchu 2023 na iniciatiwu Güntera Sodana w zwisku z 250. posmjertnymi narodninami Šěracha wotewrěli. Wona je 4,7 kilometrow dołha. Podłu njeje su informaciske tafle nastajene. Wone nimo ducych w serbskej a němskej rěči wo žiwjenju pčołkow informuja.
Za čas pućowanja wopokaza so Günter Sodan jako wuběrny fachowc na polu pčołarstwa. Předewšěm do skutkowanja a slědźenja Hadama Bohuchwała Šěracha je so wón hłuboko zanurił. Wosebje wutrobna naležnosć je jemu, zasłužby Šěracha jako horliweho Serba wuzběhnyć. Po měnjenju Sodana nimaja Serbja wjetšeho tak připóznateho wědomostnika kaž bě to Šěrach. Samo kralowna Habsburgskeho mócnarstwa Maria Theresia chcyše Šěracha na swojim kralowskim dworje měć.
