Twar dróhi njedowola
Drježdźany (SN). Zarjadniske sudnistwo Drježdźany je próstwu wo dowolnosć za twar druheho wotrězka wokrjesneje dróhi K9281 wotpokazało. Twarski projekt Budyskeho wokrjesa mjez Sprjejcami a Nowym Městom při Sprjewi so njezwoprawdźi. Dróha měješe 30 milionow eurow płaćić a brunicowej hospodarskej stejnišći mjez sobu zwjazać. Šoferojo bychu po planowanju jenož 48 sekundow jězbneho časa zalutowali. Kritikarjo projekta, mjez druhim přirodoškitna organizacija BUND, běchu skóržbu přećiwo planam zapodali. Tež lokalne iniciatiwy a přirodne zwjazki ju podpěrachu. Zhromadnje su 25 000 eurow pjenježnych darow nazběrali, zo móhli skóržbu financować.
Towarstwo „Spinnerei“ rozsud sudnistwa wita a ma jón za rozumny. Hladajo na projekt kritizuja iniciatiwy předewšěm wysoke kóšty kaž tež masiwne zasahnjenje do přirody. „Ze zběhnjenjom dowolnosće je projekt zadźeržany. Wuspěch ma dwě stronje: Wón je wjele ludźi na městnje přewšo wjele mocow, časa a pjenjez płaćił“, wuzběhny čłonka předsydstwa towarstwa „Spinnerei“ Ursula Eichendorff.
Mało optimizma w rjemjesle
Drježdźany (dpa/SN). Nadźija sakskich rjemjeslnikow na skónčenje negatiwneho hospodarskeho trenda bywa dźeń a mjeńša. Jenož třećina sakskich rjemjeslniskich zawodow pohódnoća swójsku hospodarsku situaciju jako dobru. Potrjechene su zawody wšitkich rjemjesłow. To wuchadźa z wčera wozjewjeneje bilancy konjunkturnych datow Sakskeho zwjazka rjemjesła. W lěće 2019 – w poslednim lěće do „krizoweho modusa“ – běše hišće 70 procentow zawodow swoju situaciju jako pozitiwnu wopisało. „Rjemjeslnicy su kopicu připowědźenjow reformow wot politiskich zamołwitych słyšeli, konkretnych wuslědkow pak dotal njeje“, piše rěčnik kolegija jednaćelow zwjazka Andreas Brzezinski.
Sakski zwjazk rjemjesła žada sej mjez druhim reformu systemow socialneho zawěsćenja. Lěto a stupace socialne wotedawki, kotrež su jedna z rozsudnych přičinow za wysoke kóšty zawodow, su mjeztym kritiski dypk docpěli, znazornja prezident zwjazka Uwe Nostitz. „Stupaja-li kóšty dale, změjemy bórze wulki podźěl ilegalnje dźěłacych“, wón wuzběhny.
Wjes dospołnje so změniła
W Sedlišću maja wotnětka nowy přistaw z 36 městnami
Zły Komorow Sedlišćanski jězor, z 1418 hektarami najwjetša wodźizna Łužiskeje jězoriny, ma nětko swójski přistaw. K njemu słuša 36 městnow za čołmy domjacych wodowych sportowcow a za stajnych a hóstnych čołmikarjow. W Sedlišćanskim zaliwje je zaměrowy zwjazk Łužiska jězorina Braniborska jako twarski knjez wot januara přistaw natwarić dał. „Z tym stanje so ze wsy z dwěmaj jězoromaj wjes z přistawom. Skónčnje tak daloko je. Na to hižo wjele lět čakamy“, so Sedlišćanski wjesny předstejićel Frank Cielsielski na poswjećenju we wobłuku regionalneje konferency Łužiska jězorina kónc meje wjeseleše. Konferenca měješe lětsa hłownu temu „Wodoturistiske mězniki před nami!“. Něhdźe 70 zastupjerjow z turistiskeho wobłuka, z komunalneje runiny a krajneje politiki, hospodarstwa, kultury a towarstwow je so na njej wobdźěliło.
Při katastrofach hromadźe dźěłać
Zhorjelc (AK/SN). Z projektom CIFAD III Europskeje unije zesylnja Zhorjelski wokrjes swoje mjezy přesahowace zhromadne dźěło we wobłuku wohnjoškita, katastrofoškita a škita ludnosće. Kóšty za to wučinjeja dohromady něhdźe 1,5 milionow eurow. CIFAD steji za kraje přesahowacu syć a managementowy system w padźe katastrofow. CIFAD III přinošuje bytostnje k polěpšenju spřećiwjenjakmanosće namjezneho regiona přećiwo změnje klimy a k dołhodobnemu zaručenju wěstoty ludnosće.
„W awgusće testujemy wotpowědny warnowanski system BIWAPP za ludnosć“, zdźěli zastupowacy wohnjowy mišter wokrjesa Zhorjelc Gerd Preußing. „W septembru přijimamy moderne trutowe jězdźidło. W oktobru wobdźělimy so na Florianowych wikach w Drježdźanach. Tohorunja w oktobru přewjedźe so wulke zakónčace zwučowanje.“ Zwučowanski scenarij simuluje lěsny woheń blisko hranicy. Fachowcy z Pólskeje a Němskeje zasadźenje trenuja. Při tym jich warnowanska app podpěruje.
Z kolesom do ćaha njesměš
Na nóc kulturow
Serbski film a KI
Slědy hišće njezawěsćeja
Zhorjelc (SN). Po tym zo je so dom w Zhorjelcu sypnył, fachowcy za statiku pódlanske chěže přepytuja. Hakle po zwěsćenju škodow móže policija na městnje njezboža slědźić započinać. Specialna firma tuchwilu testy při pódlanskich chěžach přewjeduje. Kak dołho tole traje, hišće wěste njeje. Ručež informacije předleža, zo móža zastojnicy bjez rizika k rozpadankam přistupić, chcedźa započeć slědy zawěsćić. Ćěła třoch zemrětych pak móža hižo přepytować. Po informacijach rěčnika policije njejsu tele přepytowanja hišće zakónčene.
Dom w Zhorjelcu je so minjenu póndźelu sypnył. W twarjenju běchu wjacore bydlenja za dowolnikow. Žonje w starobje 25 a 26 lět kaž tež 48lětneho muža su wohnjowi wobornicy mortwych z rozpadankow wućahnyli. Zasadźenje traješe 72 hodźinow. Fachowcy Techniskeho pomocneho skutka su na spočatku zasadźenja sensory na sćěnach pódlanskich twarjenjow připrawili, kiž měli pomocnikow warnować. Sensory su zwěsćili, zo so sćěny hibaja. Přičina njezboža móhła eksplozija płuna być. Móžne pak su tež hinaše techniske problemy.
Dorost za Silicon Saxony z Łužicy
Žitawa/Zhorjelc/Drježdźany (SN/MiP). Hnydom dwaj nowej studijnej směraj poskića wot lětušeje nazymy na Wysokej šuli Žitawa/Zhorjelc (HSZG), mjenujcy „Mechatroniku za zhotowjenje“ a „Połwodźakowe procesy a chemija materialijow“. Wuwili su jej zamołwići wysokeje šule we wuskej kooperaciji z hightech-syću Silicon Saxony. Jasnje wusměrja so z tym na mjezynarodne předewzaća chipoweje branše kołowokoło Drježdźan. Tute maja wulku potrjebu za specifisce kwalifikowanymi fachowcami.
