Drježdźanski satelit wuspěšny
Drježdźany (SN). Satelit Drježdźanskeje Techniskeje uniwersity je so po wuspěšnym złoženju swojich nadawkow w atmosferje spalił. Nanosatelit z mjenom SOMP2b běše wot januara 2021 w swětnišću a je wědomostne a technologiske eksperimenty přewjedł. Daty ze swětnišća su wažny zakład za slědźenje wo materialijach a atmosferje zemje.
Drježdźanski satelit, kotryž bě 20×10×10 cm3 wulki a dwaj kilogramaj ćežki, je inowatiwneho natwara dla wědomostnikow chětro přeswědčił. Team fachowcow móžeše jón jara derje posłužować. Tohorunja je so radźiło, ze satelitom dlěje dźěłać hač do toho předwidźane. Wědomostnicy Drježdźanskeje Techniskeje uniwersity dźěłachu na staciji w sakskej stolicy hromadźe. Mjez druhim běše komunikacija ze satelitom w swětnišću bytostna. Znajmjeńša dwójce wob dźeń je nastroj nad Drježdźanami lećał. Za tón čas móžachu fachowcy daty dóstać a nadawki sposrědkować. Team wědomostnikow nětko dale hromadźe dźěła a daty wuhódnoća. Jich dopóznaća maja pomhać, dalše inowatiwne satelity twarić.
Wuspěšna akcija zarjadnistwa
Budyšin (SN). W septembru je Budyske partnerske město Jelenja Góra zahubne powodźenje nazhoniła, kotraž je dźěle města ćežko wobškodźiło. Hakle po tym, zo je woda wotběžała, je rozměr škodow jasny. Jako znamjo solidarity a zwjazanosće je Budyske měšćanske zarjadnistwo pomocnu akciju zahajiło a tak potrjechenych podpěrało. Namołwjene běchu regionalne twarske předewzaća a fachowi wikowarjo, zo bychu trěbny twarski material přewostajili. To bě chětro wuspěšne. Tak stej Schlau tzwr &. KG z Budyšina a S.O.B.I.G. twarske wiki z Habrachčic reagowałoj a wšelake produkty k dispoziciji stajiłoj.
„Wulkomyslna podpěra lokalnych předewzaćow pokazuje na wuski zwisk mjez Budyšinom a Jelenjej Góru. Naše měšćanske partnerstwo je žiwe“, Budyski wyši měšćanosta Karsten Vogt (CDU) zwurazni.
Pomocne twory dźensa dopołdnja zastupjerjo Budyskeho měšćanskeho zarjadnistwa a Budyske wohnjoweje wobory direktnje do Jelenjeje Góry dowjezechu. Woni so nadźijeja, zo móža tak trochu w ćežkich časach pomhać.
Socialnu wěstotu dźěłaćerjow w rewěrje zaručić
Choćebuz (SN/BŠe). Aktualna rozmołwa ze zwjazkowym hospodarskim a energijowym ministrom Robertom Habeckom (Zeleni) a dźěłarnistwom IG BCE sewjerowuchod běše po słowach wobdźělnikow minjenu srjedu dosć pozitiwna. Spokojom je krajna nawodnica wobwoda IGBCE sewjerowuchod Stephanie Albrecht-Suliak. „Smy a budźemy stajnje zaso na to skedźbnjeć, zo je w zwisku ze zakonskim zakónčenjom wudobywanja brunicy trěbne, socialnu wěstotu za dźěłaćerjow zaručić“, wona zwurazni. Čas wšitkim zamołwitym ćěka. Předewšěm dźe wo to zarunanje za přistajenych zmóžnić. Zwjazkowe knježerstwo měło za to trěbne jednanje z Europskej komisiju wobzamknyć. Za přistajenych je wažne, zo so wšitko socialnje znjesliwje a za wšě generacije sprawnje rozrisa.
Špatne powěsće za Budyšin
Budyšin (SN). Załoženje planowaneho slědźerskeho centruma za twarske maćizny LAB w Budyšinje so přestorči. Srědki we wobjimje 68,6 milionow eurow je etatny wuběrk zwjazkoweho sejma poprawom w juniju schwalił. Budyski wyši měšćanosta Karsten Vogt (CDU) chce so nětko pola zwjazkoweho knježerstwa za přičinami dlijenja wobhonić. Slědźerski centrum je jedyn z najwažnišich projektow w zwisku ze změnu strukturow w Sakskej. Wjace hač 1 200 dźěłowych městnow ma tam nastać. Za Budyski wokrjes měł so LAB jako swětłownja za hospodarstwo wuwić, hdźež dyrbjeli fachowcy za twarskimi maćiznami slědźić, kotrež su klimje přichilene.
Tež financowanje Sprjewineho mosta w Budyšinje je njewěste. Pjenjezy chcychu zamołwići z hornca za změnu strukturow brać. Wjace hač dwě miliardźe eurow steji Budyskemu a Zhorjelskemu wokrjesej k dispoziciji. Tola pjenjezy prawdźepodobnje za wšitke planowane projekty njedosahaja. Nětko maja zawěsćene projekty hišće raz přepruwować. Kotre projekty potrjechene su, je njejasnje.
Roschek nastupi
Budyšin (SN/BŠe). Předewzaćel Steffen Roschek nastupi jako direktny kandidat CDU we wólbnym wokrjesu 155. Dźensa je so 52lětny oficialnje nowinarjam předstajił. Roschek pochadźacy z Kulowa, ma serbske korjenje a je wusko z regionom zwjazany. To wotbłyšćuje so tež w jeho wólbnym programje.
Minjenej dwě lěće je so wón zaměrnje na wjele zarjadowanjach a zetkanjach wjesnych předsydstwow CDU wobdźělił a wo ćežach a wužadanjach kónčiny zhonił. Hladajo na Łužicu widźi wón wjele strukturnych problemow, kotrež pak maja so na zwjazkowej runinje rozrisać. Jako předewzaćel je jemu wažne, zo je zapłaćomna a stabilna energija trěbna. Tež haćacu běrokratiju chce wón wottwarić. „Hač do lěta 2026 ma so dźesać procentow regulowacych zadźěwkow wotstronić“, sej wón žada. Nimo toho ma so planowanski čas za projekty pospěšić. „Němska sej tuchwilu sama noze staja.“ Łužica měła so jako metropolowy region wuwić, hdźež hospodarstwo wuspěšnje hromadźe dźěła. Zaměry chce Steffen Roschek jako direktnje woleny kandidat w zwjazkowym sejmje zastupować a mandat wólbneho wokrjesa zaso wróćo zdobyć.
Wulki njeměr po demo za měr
Zhorjelc/Drježdźany (SN/mb). Zeleni su BSW wumjetowali, zo „so wot jasnje prawicarskich ekstremistow njedistancuje“. Tež předsydka sakskeje Lěwicy so na demonstraciji w Zhorjelcu postorkuje, na kotrejž su pod nawodom zapósłanca BSW w krajnym sejmje Jensa Hentschela-Thörichta přećiwo planam demonstrowali, w tworni Alstoma w přichodźe pancery město tramwajkow produkować (SN rozprawjachu). Na tutej manifestaciji su so tež přiwisnicy prawicarskeje strony „Swobodni Saksojo“ wobdźělili. Tohodla je tež SPD „šokowana“.
Předsydka BSW w Sakskej, Sabine Zimmermann, je mjeztym na wumjetowanja reagowała: So wě, zo BSW ze „Swobodnymi Saksami“ hromadźe njedźěła, dokelž su to nacije. Najebać to prawicarjam wažne temy, kaž politiku za měr, přewostajić nochcedźa. W Zhorjelcu je młodźina Lěwicy přećiwo demonstraciji něhdyšeho Lěwicarja Hentschela-Thörichta – wón bě prjedy jednaćel frakcije Lěwicy we wokrjenym sejmiku – demonstrowała. Lokalna nowina rozprawješe, zo je so na jeho zarjadowanju 250 ludźi wobdźěliło, na přećiwnej demonstraciji 35.
impresum
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianka Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 266 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
Zajim za festiwal nadal wulki
We wobłuku Choćebuskeho filmoweho festiwala (CFF), kotryž wotmě so zašły tydźeń wot wutory do njedźele 34. raz, předstajichu so w sekciji „Domowjna – Domizna – Heimat“ wospjet produkcije z łužiskim aspektom. Wjeršk tohole segmenta je bywšemu formatej „Łužiska filmowa přehladka“ slědowacy rjad „Łužyca shorts“. CFF je nimo toho kruty termin nazymskeho zetkanja serbsko-němskeje syće Łužycafilm.
Wjele ze Serbow a wo Serbach ze wšelakich perspektiwow
Wosom filmow z dołhosću sydom do 30 mjeńšinow je kurator sekcije „Domizna“ Daniel Kubik za program „Łužica shorts“ wuzwolił. Zwjeseleše, zo bě mjez nimi šěsć paskow, kotrež so ze serbskej tematiku zaběrachu resp. kotrychž originalna rěč je serbšćina. A tohorunja zwjeselace bě, zo přiwabi tónle program telko zajimcow do zarjadowanišća Gladhouse, zo dyrbjachu organizatorojo přidatne stólcy do wupředateje žurle stajić.
„Rybar być dyrbiš začuwać a chcyć!“
Kittnerec předewzaće w Hóznicy wobstajnje wučomnikow wukubłuje
Rańše słónco wokoło Hóznicy schadźa. W tymle času je rybarka Emma Kittner nazymu často wot ranja šesćich hižo po puću. Wona stara so mjez druhim wo picowanje rybow a hlada za spušćadłami kaž tež hatom za wudźenje. „Njeje to powołanje za kóždeho – na prěni pohlad zda so wone mokre, zymne a grawoćiwe być. Tola je to wulkotne powołanje – wosrjedź přirody“, 22lětna zwurazni a podšmórnje: „Rybar być to dyrbiš začuwać a chcyć. Kóždy dźeń je hinaši.“
Šule maja „kowarnje“ być
Drježdźany (dpa/SN). Předewzaća w Sakskej maja přeco hišće ćeže, dosć wučomnikow za swoje swobodne wukubłanske městna namakać. Wulku ličbu wukubłanskich městnow lětsa wobsadźić njemóžachu, wuswětli nětko šef regionalneje direkcije Zwjazkoweje agentury za dźěło Klaus-Peter Hansen. Hač k zahajenju noweho wukubłanskeho lěta 1. oktobra su předewzaća dźěłowej agenturje něhdźe 20 800 swobodnych wukubłanskich městnow přizjewili. Něhdźe 18 600 młodostnych su sobudźěłaćerjo wuspěšnje sposrědkowali. Z tym je wjace hač 2 000 městnow swobodnych.
Rjemjeslnicy w Sakskej sej wot noweho knježerstwa w swobodnym staće wjace pomocy a pjenjezy za lěpše kubłanje a powołanske wukubłanje žadaja. To je hladajo na pobrachowacych fachowcow trěbne, zdźěli Zwjazk sakskich rjemjeslnikow. Dyrbimy wyše šule „ke kowarnjam talentow“ wuwiwać, wottam dale rěka. Wyše šule trjebaja najlěpše wuhotowanje. Tež dosć wučerjow ma tam k dispoziciji stać. Kubłanje a powołanske kubłanje dyrbitej za nowe krajne knježerstwo najwažnišu prioritu měć.
