Grodk (JoS/SN). Na zjawny wobydlerski forum „Jasna Sprjewja“ bě akciski zwjazk tele dny w Grodku přeprosył. Něhdźe 30 zajimowanych wobydlerjow bě přeprošenju sćěhowało. Na spočatku zarjadowanja wopytachu přitomni neuralgiske dypki w nutřkownym měsće, hdźež so bruna Sprjewja wosebje wotbłyšćuje. Tam wopytachu dom čołmikoweho towarstwa Jednota SG. Wobdźělnicy foruma njerjany napohlad wuhladachu. „Čołmy so přebarbjeja. Tohorunja hižo pjeć lět zwěsćamy, zo dale a wjace rostlinow při přibrjohu rosće, štož njeje za naš motorski čołm optimalne. Čołm nas za čas treninga přewodźa a ma wuchowansku funkciju“, čłonojo towarstwa rozjasnichu. Jasne je, zo wobsteji zwisk mjez žele­zowym hydroksydom a njerodźu. Po­trjechene je tež spušćadło a slalomowa čara, kotruž za trening abo za narodne a mjezynarodne wubědźowanja wužiwaja.

Budyšin (SN/MiP). Tež dźensa wjedu při­stajeni regionalneho bliskowobchada po cyłej Sakskej swój sobotu rano zahajeny stawk dale. „Najebać to, zo smy dobu za wudźěłanje lěpšeho tarifoweho poskitka ze stron Zwjazka dźěłodawarjow w bliskowobchadźe (AVN) podlěšili, njeje nam wón ničo předpołožił. Tak dyrbimy znowa k stawkowanju namołwjeć“, pisa dźěłarnistwo ver.di w zdźělence na swojej internetnej stronje. Paul Schmidt, nawoda fachoweho wobłuka wobchad pola ver.di zdźěli, zo chcetej so wobě stronje dźensa dopołdnja na jednansku rozmołwu zeńć. „Potom rozsudźimy, hač stawki dale wjedźemy abo nic“. Ver.di žada sej 22 procentow wjace mzdy za přistajenych. Dźěło­dawarjo běchu naposledk zwyšenje mzdy 13,7 procentow a přidatnje inflaciske wurunanje poskićili.

Rakecy (SN/BŠe). Kedźbu towarstwa a gmejny, namołwja regionalny management Leaderoweje kónčiny Hornjałužiska hola a haty. Tak su tuchwilu spěchowanske pjenjezy za mjeńše projekty we wobjimje hač do 20 000 eurow k dispoziciji. „To móhli na přikład mjeńše wotpočnišća abo ławki při pućowanskich abo kolesowarskich šćežkach być. Tež instalacije kreatiwnych wuměłskich objektow z historiskim poćahom móhli so zwoprawdźić“, rozłoži Katrin Kubašowa z regionalneho managementa Leaderoweje kónčiny. Rozsudne pak je, zo dyrbja so naprawy hišće lětsa w lěću krótkodobnje realizować. Hižo loni hodźachu so z pjenjezami projekty zwoprawdźić. Wjesny klub w Kulowcu je mjez druhim swoju wonkownu ležownosć wuhotował a je stawizny dworow na informaciskich taflach zwobraznił.

Lejno (AK/SN). Swětłownja při Lejnjanskim jězorje je atraktiwny cil za wulěty hosći zbliska a zdaloka. Tohorunja je hotel při jězorje woblubowane zetkawanišćo za zjězdy abo swójbne swjedźenje, rozprawja jednaćelka swětłownje Heike Strutthof minjeny pjatk na swjedźenju, hdźež zhladowachu na 10lětne wobstaće swětłownje w gmejnje Halštrowska hola. „Njejsmy žadyn ryzy hotel za wellness a dźěći, ale wotewrjeni za wšitke wopytowarske skupiny“, wona hódnoći. „Wěnujemy so mórskej temje a našu kwalitu chcemy sej wobchować.“ Zhromadnje ze swojej swójbu, sobudźěłaćerjemi, wobydlerjemi, dodawaćelemi, twarskimi dźěłaćerjemi, planowarjemi a zastupjerjemi z politiki a hospodarstwa je jednaćelka jubilej woswjećiła.