Najrjeńše městna Błótow
Energija za wšitkich
W Radworskej gmejnje chcedźa drustwo załožić
Radwor (SN/BŠe). Zastaranje z milinu a ćopłotu předewšěm hladajo na nowe energijowe systemy je wosebje gmejnam we wjesnych kónčinach wulke wužadanje. W časach, hdyž steji komunam mjenje pjenjez k dispoziciji a hdyž móža so jenož hišće najnuzniše nadawki wukonjeć, je zmištrowanje energijoweje změny w dosahacej měrje skerje njemóžne. Gmejna Radwor po nowych pućach kroči a je mnohim komunam dobry přikład. Na wčerawšej zhromadźiznje diskutowachu přitomni w tamnišej jědźerni šule wo wutworjenju energijoweho drustwa.
Klimowy manager Radworskeje gmejny Marcel Bellmann so mjeztym hižo dwě lěće ze zastaranjom z milinu a ćopłotu we wjeskach zaběra. „Něhdźe wosom milionow eurow wudawaja wobydlerjo gmejny za milinu, ćěriwa a surowizny za ćopłotu, kotrež zwonka gmejny produkuja“, Bellmann rozkładźe. Jemu je wažne, zo resursy na městnje produkuja a wužiwaja, štož je na dobro wobydlerjow a nimo toho hišće regionalne hospodarstwo spěchuje.
Serbske barby na wosebitym dnju
Budyšin (SN). Zo běchu na wčerawšim Dnju Hornjeje Łužicy na Mosće měra tež serbske banćiki widźeć, běše sej župa Jan Arnošt Smoler přała, a předsyda Domowiny Dawid Statnik je so wo to postarał. Za to so jemu županka Leńka Thomasowa na posedźenju župneho předsydstwa dźakowaše, kotrež so tohorunja wčera wotmě. Měšćanska rada Budyšina bě we wobzamknjenju jenož na němske chorhoje składnostnje Dnja Hornjeje Łužicy mysliła. W serbskim sydlenskim rumje pak je serbska chorhoj runohódna, na nju njesmě so zabyć, bě župa pominała.
Přichodny projekt je Swjedźeń zetkawanja, kiž budźe 30. awgusta w Budyšinje. Na nim so tež čłonojo župneho předsydstwa ze stejnišćom wobdźěla. Nimo informacijow wo Domowinje chcedźa tam ze zajimcami nowolětki zhotowić. Rejowanska skupina Łužičanka wustupi w 14.30 hodź. na Hłownym torhošću.
Regionalna rěčnica Katja Liznarjec rozprawješe wo zhromadnym dźěle z Domowinskimi skupinami a towarstwami w župje. Dale přihotowachu kubłansku jězbu župy, kiž powjedźe lětsa do Choćebuza a na łapanje kokota do Drjenowa.
Milion za zawod w Kamjencu
Kamjenc (SN). Składnostnje swjedźenja prěnjeho zarywa za nowe twarjenja firmy Liofit wčera w Kamjencu je sakski minister za hospodarstwo Dirk Panter (SPD) jednaćelej předewzaća dr. Ralfej Güntherej spěchowansku zdźělenku přepodał. Inowatiwny swójbny zawod wěnuje so akuwam e-bikow a je reparuje. Z tym móža so nastroje dlěje wužiwać. Liofit chce nowy centrum za reparaturu, rozebranje a recycling akuwow z litiuma natwarić. „Předewzaće zjednoća pioněrski duch, wudźeržliwu technologiju a jasne wuznaće k stejnišću w Kamjencu. Spěchowanje podpěra dobre a wjele lubjace dźěło, z kotrehož region a wobswět profitujetej“, minister zwurazni. Swobodny stat naprawu w zawodźe z 1,38 milionami eurami financielnje podpěra.
Po słowach dr. Ralfa Günthera je nowe twarjenje zakład za to, hišće wjace akuwow zachować a resursy škitać. „Přidatnje k tuchwilnemu dźěłu móžemy w přichodnych měsacach pilotowu připrawu natwarić. To ma kombinacija reparatury a recyclinga być. Tež wyši měšćanosta Kamjenca Roland Dantz (njestronjan) sej inowatiwny duch zawoda chwali.
Poslednje hrjady wućahnyli
Kóń: Symbol a přećel serbskeho ludu – něhdy a dźensa
Konje běchu stajnje hižo wažny pomocnik čłowjeka. Tež pola nas w Serbach běchu burja lětstotki dołho wot tutych swěrnych zwěrjatow jako přežny skót wotwisni. Što pak je mytologiski woznam konja w našej kulturje a čehodla jěchaja poprawom křižerjo jutry wot wosady do wosady? Michał Domanja je so tutym prašenjam wěnował a podawa swoje wotmołwy.
Jara mało wěmy wo nałožkach, swjatnicach a bohach našich prjedownikow z Łužicy. Jedne je wěste: Naši prjedownicy njeběchu bjezbóžni.
Wšitko, štož wěmy – hač je to wot kupy Rujany, z Braniborskeje, Durinskeje, Lübecka, Oldenburg abo tu z Łužicy posrědkowane – přińdźe z pjera nowych křesćanskich knjezow a bu wot mnichow w klóštrach napisane.
Zelena liga na rizika skedźbnja
Choćebuz (SN). Wobswětowy zwjazk Zelena liga kritizuje próstwu koncerna Łužiska energija a milinarnje (LEAG). Předewzaće chce Wochožansku brunicowu jamu wo dźělne polo Miłoraz rozšěrić a tam hač do lěta 2038 brunicu wudobywać. Hač do 28. awgusta móža ludźo znapřećiwjenja zapodać. Plan je tuchwilu hišće zjawnje přistupny. Wčera je Zelena liga swoje wobšěrne stejišćo wo tym wozjewiła. „W próstwje LEAG je mnoho přećiwkow. Nimo toho nowa brunicowa jama hižo do dźensnišeho časa njesłuša“, zwurazni čłon zwjazka René Šuster.
Sćěhi toho su wulke a so hač do Berlina wuskutkuja, wón potwjerdźi. „W Sprjewi je wulke mnóstwo sulfata. To hódnoty pitneje wody w stolicy Němskeje poćežuje. W planje jenož pegel Sprjewje hač do Grodka-Byhlowa wobkedźbuja“, Šuster měni. Tola tež potrjecheni wobydlerjo na kromje jamy měli sej plan LEAG wobhladać, Zelena liga namołwja. Tak njejsu na přikład wěstotu pobrjohow planowaneho jězora w próstwje podali.
Wona pomha, z wuměłcom so stać
Žně něhdy a dźensa
Foće wo žnjach pochadźatej z wobšěrneho archiwa 93lětneho Ralbičana Pawoła Roty. Lětdźesatki běše žiwjenje w Delanach swěru dokumentował – z pisakom a kameru. Jeho foto „Na Holach w Sernjanach“ je z lěta 1965:
Dobry wukon a tola minus
Sorabia: Naprawy za hospodarski wuspěch so poněčim wuskutkuja
Nowoslicy (JK/SN). Na swoju 33. hłownu zhromadźiznu su so wutoru w Nowosličanskej Dinarjec swjedźenskej žurli akcionarojo Róžeńčanskeje agrarneje AG Sorabia zetkali. Wobsah a wotběh zhromadźizny podležeštej znatemu krutemu porjadej. Wosebje na rozprawu wo lońšim hospodarskim lěće noweho předsydy předsydstwa, Chrisa Fabiga, běchu přitomni wćipni. Fabig předewzaće wot lětušeho 1. januara nawjeduje. Na spočatku witaše přitomnych předsyda dohladowanskeje rady, Dirk Urban, a wozjewi obligatorisce ličby přitomnych akcionarow a z tym přitomneho kapitala akcijoweje towaršnosće. Kaž hižo minjene lěta bě jenož snadny dźěl kapitala zastupjeny.
