Janšojce (SN/BŠe). Koncern Łužiska energija a milinarnje (LEAG) dale derje do přichoda hlada. Před něšto dnjemi su dźěłaćerjo započeli, prěni wulki projekt solarneje připrawy w Janšojskej brunicowej jamje twarić. Solarny park wobjima něhdźe 40 hektarow wulku płoninu deponije Janšojce I, kotraž leži na rekultiwěrowanych płoninach Janšojskeje jamy. Za to je wotrězk deponije předwidźany, kotryž je zawrjeny. W tamnym dźělu deponije gips składuja.

Za nawodu předsydstwa LEAG Thorstena Kramera je zahajenje twarskich dźěłow wažna kročel za naslědny přetwar łužiskeho rewěra. „Nowozasydlenje předewzaćow w kónčinje je bjez přichoda kmaneho zastaranja z energiju lědma móžne. Z GigawattFactory, kotrejž solarny park přisłuša, wutworimy wobswětej přihódne zastaranje z energiju. A to na přestrjenjach, kotrež so tak prawje wužiwać njehodźa“, tak Kramer.