Łaz (AK/SN). Po móžnosći hišće w lěće 2026, najpozdźišo pak w lěće 2028, ma łódź za pasažěrow po pjeć łužiskich jězorach jězdźić. Wo to prócujetej so zhromadnje zaměrowej zwjazkaj Łužiska jězorina Sakska a Braniborska. Wot Złokomorowskeho jězora ma łódź po Lejnjanskim jězorje, Parcowskim jězorje, Sedlišćanskim jězorje hač na Rański jězor jěć. Po móžnosći ma so to na zakładźe zakonja za inwesticije w brunicowych kónčinach zapłaćić. Swójski podźěl, kotryž dyrbjałoj zaměrowej zwjazkaj přewzać, potom pjeć procentow wučini. 95 procentow naprawy móhł Zwjazk financować. „Łódź za pasažěrow je woprawdźe trěbna, wšako z njej kwalitu turistiskich poskitkow polěpšimy“, wuzběhny předsyda zaměroweho zwjazka Łužiska jězorina Sakskeje a krajny rada Budyskeho wokrjesa Udo Witschas (CDU) wčera na zhromadźiznje zwjazka we Łazu.
Zaměr gremija nětko je financowanje łódźe do klětušeho hospodarskeho plana zapřijeć. Wobhospodarjenje ma so eksternje wupisać. Při tym chcetaj wobaj zaměrowej zwjazkaj wusko hromadźe dźěłać.
