Priwatna iniciatiwa tež wjesce a wokolinje tójšto dobrotow přinjese

Jako bě molerski mišter Steffen Frencel před 12 lětami hromadźe z mandźelskej statok srjedź Ralbic kupił, bě najprjedy raz wjesoły, zo měješe za swoju molersku firmu skónčnje wotpowědne sydło. Na dworje wotstaji awta firmy a wšědnje bě dwór statoka wuchadźišćo přistajenych firmy na dźěło. Firma so tu derje wuwiwaše a tež priwatnje běše swójba spokojna a zbožowna. Dokelž pak stare twarjenja po času lěpše njebywaja, bě trěbne wo tym přemyslować, kak substancu zachować a statok jako wosebitosć wobchować.