Drježdźany/Budyšin (SN/JaW). Regionalny bliskowobchad wostanje dale zaručeny. Wo tym informujetej wobchadny zwjazk Hornje Łobjo (VVO) a zaměrowy wobchadny zwjazk Hornja Łužica-Delnja Šleska (ZVON). „Tež hdyž su šule corona-pandemije dla wot srjedy zawrjene, płaći hač do kónca tydźenja regularny jězbny plan. Wot póndźele, 23. měrca, jězdźa naše busy po prózdninskim jězbnym planje. Wo dalšich změnach sčasom informujemy“, zdźěli nowinski rěčnik VVO Christian Schlemper. Jězbne plany su tež na internetnej stronje wobchadneho zwjazka www.vvo-online.de přistupne.

Budyšin (SN/BŠe). Zo móhli přistajenych w Němskej před bjezdźěłnosću lěpje škitać, je zwjazkowy sejm minjeny pjatk zakonske postajenja k mzdam za krótkodźěło wolóžił. Wot apryla budźe za předewzaća lóšo pjenjezy přez dźěłowu agenturu dóstać. Tak móža firmy hižo próstwu zapodać, jeli jenož 10 procentow přistajenych wupadnje, a nic, kaž dotal, jedna třećina sobudźěłaćerjow. Hladajo na coronawirus a z nim zwisowacy wupad sobudźěłaćerjow běchu nowe postajenja trěbne.

Kaž Budyska dźěłowa agentura zdźěli, je naprašowanje za mzdami při krótkodźěle minjene dny hižo přiběrało. „Statistiki pak tuchwilu žane njezestajamy“, rozkładźe nowinska rěčnica Berit Karsten. Dźeń a wjac předewzaćow so wo wu­měnjenjach wobhonja. Hladajo na přiběracu potrjebu informacijow firmam je agen­tura derje přihotowana. Nimo toho su wobšěrne informacije ke krótkodźěłu tež na internetnych stronach agentury wozjewjene. Stronu prawidłownje aktualizuja. Tež na stronach zwjazkoweho knježerstwa móža so zajimcy wobhonić. Wězo je tohorunja wosobinske abo telefoniske poradźowanje móžne.

Budyske pjekarske zjednoćenstwo je wčera na tudyšej powołanskej akademiji zjawne pruwowanje chlěba a całtow přewjedło. Dohromady 32 chlěbow a 17 całtow staj Michael Isensee z centralneho zwjazka němskich pjekarjow a Wjelećanski pjekar ­Markus Thonig po formje, napohledźe, strukturje, elastice, wóni a słodźe pruwowałoj. Dohromady 34 razow spožčištaj pru­wowarjej predikat „jara derje“, jědnaće razow predikat „derje“, štyri chlěby njejstaj mytowałoj. Foto: SN/Hanka Šěnec

26lětny Chróšćanski ratar hori so za ekologiske wobhospodarjenje polow

Biologisce plahowana běrna je strowa a ma jenož mało kalorijow. Wona je wy­sokohódnotny wudźěłk z rostlinskim bělkom, balastowymi a mineralnymi maćiznami kaž tež witaminami. Hladajo na plahowanje wuńdźe bjez chemisko-syntetiskich srědkow za rostlinoškit a hnojiwow. To rozeznawa ju wot konwencionalnje plahowanych, kotrež samo za čas składowanja wšelke chemikalije trjebaja. „To je za mnje absolutnje šokowace a za přetrjebarja njefairne, dokelž scyła wo tym informowany njeje“, měni ratar Ignac Wjesela z Chrósćic. Runje to­ho­dla je so wón rozsudźił plahowansku přestrjeń swojich bioběrnow jasnje powjetšić, zo by ludźom ekologisku a re­gionalnu alternatiwu poskićił. „Bioběrna je dobra inwesticija do strowoty“, 26lětny wujasnja. Wot dotal jednoho hektara rozšěri wón płoninu lětsa na něhdźe štyri hektary, hdźež budźe družiny Laura, Linda, Adretta, Belana, Goldmarie, Otolia, Wendi, Baltic Rose a zažnej družinje Anusch­ka a Corinna plahować.