Dwurěčnosć konsekwentnje zwoprawdźa
Łužisku kupjel we Wojerecach w najwšelakorišich wobłukach wobšěrnje modernizuja
Šulerjo we Łužiskej kupjeli płuwać nawuknu. Při kromje 25meterskeho basenka słuchaja woni na přikazy sportoweho wučerja. Najebać twarske dźěła w zbytnym dźělu kupjele tam wučbu dale poskićeja. „Płuwać nawuknu tu šulerjo zakładneje šule z Wulkich Zdźarow, Łutow, Lubuša, Wojerec, Kulowa, Njedźichowa, Złeho Komorowa a spěchowanskeju šulow ´Friedrich Wolf´ a ´Nikolaus Kopernikus´ z Wojerec“, wuswětli jednaćel kupjele Matthias Brauer. „Zdobom přichadźeja tu prawidłownje policisća a wohnjowi wobornicy. Smy wukubłanišćo za Saksku krajnu wohnjowobornu a katastrofowu škitnu šulu w Narće. Zmóžnimy towarstwam a skupinam płuwanske kursy a kursy za rehabilitaciju. Za to je wjele organizacije trěbne.“ Nuznje trěbne bě rozšěrjenje Łužiskeje kupjele. Naprawa je jedna z najwažnišich w zwisku ze změnu strukturow w měsće.
Na perspektiwy a šansy regiona skedźbnili
Wojerecy (AK/SN). Na mjeztym druhich powołanskich wikach „#WHY!“ we Wojerecach minjeny pjatk a sobotu wabjachu wustajerjo intensiwnje za dźěło, wukubłanje a studij w regionje. Cyłkownje 40 wustajerjow z wobłukow industrija, rjemjesło, hladanje, posłužby kaž tež zarjady a institucije je so we Łužiskim centeru prezentowało. „Chcemy na perspektiwy za čas po zakónčenju wudobywanja brunicy skedźbnjeć. Wojerecy a wokolina atraktiwne dźěłowe městna skića. Město ma tež wjele socialnych a kulturnych zarjadnišćow. Ludźo móža region sobu wuhotować a to maja wiki wotbłyšćować“, zwurazni Susann Metasch z organizaciskeje skupiny za přehladku. Marketingowe towarstwo HOY je zhromadnje z mnohimi partnerami na wiki přeprosyło. K tomu słušachu Regionalne stejnišćo za kubłanje, demokratiju a žiwjenske perspektiwy, město Wojerecy, Łužiski center, agentura za dźěło a nowina Hoyerswerdaer Tageblatt.
Wosušk z Worklec za Brüssel
Kreacije ze swójskim rukopisom
Pozitiwny wusud
Drježdźany. (SN/MiP). Wyše krajne sudnistwo w Drježdźanach (OLG) je wčera wusud w prawniskim rozestajenju mjez Budyskim twarskim předewzaćom Hentschke Bau a rešeršowacym kolektiwom „15 Grad Research“ wozjewiło. Kolektiw zastupuje Zjednoćenstwo přesćěhanych nacistiskeho režima – Zwjazk antifašistow w Sakskej (VVN-BdA). W aktualnym wusudźe so wusud krajneho sudnistwa w Drježdźanach skoriguje.
Pomoc w ćežkich chwilach
„Hdyž lubeho čłowjeka zhubiš, maš jednoho jandźela pěstonja wjace poboku“ – tute hrónčko nas z aspektom našeho žiwjenja konfrontuje, na kotryž rady zabywamy. Smjerć pak je runje tak wažny dźěl našeho byća kaž kóždy druhi wokomik, kotryž směmy dožiwić. Wjeselo, zrudoba, radosć, hórkosć; sylzy wjesela a zrudoby – wšo to je žiwjenje. A za wšo to budźmy dźakowni. Wšako hakle přez swoje emocije pytnješ, zo sy žiwy. Přiwšěm bywa wokomik smjerće lubeho čłowjeka stajnje zaso ćežki – za swójbu, znatych a přećelow. W tajkich chwilach trjebaš ludźi, na kotrychž móžeš so spušćeć. Tajcy ludźo su sobudźěłaćerjo pohrjebnistwow. Woni wědźa, što ma so činić a kak móže so wšitko za dostojne chowanje zrjadować. Z tym nam, kotřiž na swěće hišće zwostawamy, móžnosć poskićeja, woměrje žarować, bjeztoho zo dyrbiš so wo běrokratiju abo wo městno na pohrjebnišću starać. Kedźbnosć, sensibilitu a kompetentne poradźowanje, často tež w našej maćeršćinje, při tym nazhonjamy.
Z Delnjej Łužicu so zeznajomnili
Budyšin (SN). Towarstwo Serbski kulturny turizm je wčera wšitkich zajimcow – wosebje turistow a pućowanskich žurnalistow – na jónkrótnu wuprawu pod titulom „FAM-Trip“ přeprosyło. „FAM“ – to je skrótšenka jendźelskeho słowa „familiarization“. Přełožk zapřijeća je: Z něčim so zeznajomnić. Runje to běše tež wotmysł poskitka towarstwa: Zajimcow z turistiskeje branše ze serbskej kulturu kaž tež z kulturno-turistiskimi poskitkami łužiskeho regiona hłubšo zeznajomnić a tak turizm we Łužicy dale spěchować.
Něhdźe 40 zajimcow je so z busom na turu po romantiskej krajinje Delnjeje Łužicy podało, mjez druhim do Dešna, do Gatojc a do Janšojc. Na stacijach, kaž na př. w domizniskim muzeju abo w muzeju pod hołym njebjom „Stary lud“ w Dešnje su tójšto wo stawiznach, tradicijach a nałožkach Serbow zhonili.
Powołanje za dale a wjac holcow atraktiwne
Budyšin (CS/SN). Wothłós na mjeztym pjaty camp molerjow na Budyskej Edisonowej je přewšo dobry. Wšitkim 11 wobdźělenym je so dźěłarnička jara lubiła. Selina je jedna ze šěsć holcow, kotrež so na campje wobdźělichu. Wona bydli w Pančicach-Kukowje a je wučomnica w Bilkec molerskim zawodźe. Na dźěle rěča tež serbsce, 16lětna powěda. Lubosć k powołanju molerja maja w jeje swójbje mnozy, wšako staj tež dźěd a wuj molerjej. Selinje so na powołanju wosebje mnohostronskosć a wužadanje kreatiwneho razu lubitej. Tole drje je tež přičina, čehoždla so dale a wjac holcow za tute powołanje rozsudźa, praji molerska mišterka Gabriele Sporka, kotraž młodostnych přez cyły tydźeń přewodźowaše. Selina hori so wosebje za techniku špachtlowanja, druhim wobdźělenym so airbrush jara lubješe. Za tutu techniku bě krótkodobnje molerski mišter Andreas Hentsch ze Šunowa jako nawoda zaskočił. W jeho zawodźe nałožuja techniku w něhdźe 50 procentach nadawkow.
Łódź z Lipska do Łužicy přiwjezli
Žadanja ratarjow chutnje brać
Budyšin (SN/BŠe). Změna klimy je tež ratarjam wužadanje, wšako dožiwjamy dale a časćišo wjedrowe ekstremy. Tajke zawostajeja zdźěla eksistencu wohrožace škody a tuž žadaja sej ratarjo w Němskej wosebite zawěsćenje, w kotrymž su wjacore ekstremne podawki sobu zapřijate. „Tajke móhło za přichod zawěsće dobra móžnosć być, rizika kaž suchotu, sylny dešć, wichor a zmjerzk zawěsćić. Fenomeny njehodźa so mjenujcy kalkulować. Hižo wjele lět znajemy zawěsćenje přećiwo škodam krupow dla, kotrež nimale wšitcy ratarjo w nalěću wobzamknu“, wujasni předsyda regionalneho burskeho zwjazka Budyšin-Kamjenc Stefan Triebs. Tola wulki rozdźěl je, zo so krupy jenož regionalnje na poměrnje małki teritorij wobmjezuja. Tu mjenowane strachi pak často cyłkowny Budyski wokrjes abo wuchodnu Saksku potrjechja. Tohodla je tajke zawěsćenje chětro drohe. Zwjazkowe knježerstwo móhło ratarjam pomhać a wěstu přiražku płaćić. To by móžna pomoc ratarjam ze stron stata była, jelizo suchota abo powodźenja zachadźeja a škody zawinuja.
