Z kolesom do ćaha njesměš
Na nóc kulturow
Serbski film a KI
Slědy hišće njezawěsćeja
Zhorjelc (SN). Po tym zo je so dom w Zhorjelcu sypnył, fachowcy za statiku pódlanske chěže přepytuja. Hakle po zwěsćenju škodow móže policija na městnje njezboža slědźić započinać. Specialna firma tuchwilu testy při pódlanskich chěžach přewjeduje. Kak dołho tole traje, hišće wěste njeje. Ručež informacije předleža, zo móža zastojnicy bjez rizika k rozpadankam přistupić, chcedźa započeć slědy zawěsćić. Ćěła třoch zemrětych pak móža hižo přepytować. Po informacijach rěčnika policije njejsu tele přepytowanja hišće zakónčene.
Dom w Zhorjelcu je so minjenu póndźelu sypnył. W twarjenju běchu wjacore bydlenja za dowolnikow. Žonje w starobje 25 a 26 lět kaž tež 48lětneho muža su wohnjowi wobornicy mortwych z rozpadankow wućahnyli. Zasadźenje traješe 72 hodźinow. Fachowcy Techniskeho pomocneho skutka su na spočatku zasadźenja sensory na sćěnach pódlanskich twarjenjow připrawili, kiž měli pomocnikow warnować. Sensory su zwěsćili, zo so sćěny hibaja. Přičina njezboža móhła eksplozija płuna być. Móžne pak su tež hinaše techniske problemy.
Dorost za Silicon Saxony z Łužicy
Žitawa/Zhorjelc/Drježdźany (SN/MiP). Hnydom dwaj nowej studijnej směraj poskića wot lětušeje nazymy na Wysokej šuli Žitawa/Zhorjelc (HSZG), mjenujcy „Mechatroniku za zhotowjenje“ a „Połwodźakowe procesy a chemija materialijow“. Wuwili su jej zamołwići wysokeje šule we wuskej kooperaciji z hightech-syću Silicon Saxony. Jasnje wusměrja so z tym na mjezynarodne předewzaća chipoweje branše kołowokoło Drježdźan. Tute maja wulku potrjebu za specifisce kwalifikowanymi fachowcami.
Hentschke dobył
Před 75 lětami „Postup“ załožili
Zwjazanosć wobydlerjow gmejny Hornja Hórka ze „swojej“ twornju tež dźensa hišće wulka
Tajkile hołk a tołk hale Dźěžnikečanskeje twornje syčomłóćawow a ratarskich mašinow dołho wjace dožiwili njejsu! W lěće 2016 běchu tu poslednje neonowe swěcy hasnyli. Před nimale dwěmaj tydźenjomaj, sobotu, 2. meje, pak so tu z ludźimi mjerwješe. Składnostnje 75. róčnicy załoženja twornje „Postup“ běše gmejna Hornja Hórka zhromadnje z tamnišim wjesnym klubom na jubilejny swjedźeń přeprosyła.
Hladajo na něhdźe 600 hosći na dworje při něhdyšim zarjadniskim twarjenju zawoda zwěsći wjesnjanosta Thomas Polpitz (CDU) w swojej witanskej narěči, zo drje je w gmejnje lědma domjacnosće, z kotrejež njeby znajmjeńša jedyn swójbny w tworni dźěłał. „Wulka ličba wopytowarjow wotbłyšćuje wuznam, kotryž je zawod něhdy měł a kotryž hač do dźensnišeho saha“, wón podšmórny.
Negatiwna serija nima kónca
ST 1922 Radwor –
FSV Łuty 0:3 (0:2)
Za Radworske mustwo zasadźeni: Pěčak – B. Grubert, M. Grubert, Schäfer, Hetaš, Mička, Wróbl (46. Adam), Wencl (70. Bišof), Lawka (85. Buk), Elsner, Dźisławk (85. Saad Aldeen)
Nabožina online
Drježdźany (SN). Sakske kultusowe ministerstwo a Drježdźansko-Mišnjanske biskopstwo kročitej po nowych pućach. Po prěnich pozitiwnych nazhonjenjach w zwisku z hybridnym poskitkom předmjeta nabožiny KathReliOnline w 9. a 10. lětniku ma so naprawa tež na 11. lětnik rozšěrić a jako zakładny kurs zmóžnić. Poskitk su fachowcy sakskim wučbnym planam wotpowědujo zestajeli. We wirtuelnych widejowych konferencach šulerjo zhromadnje wuknu, wěsty dźěl wědy pak maja sej sami přiswojić.
„KathReliOnline zmóžnja šulerjam předewšěm tež mjeńšich šulow, so po nowych pućach na wučbje katolskeje nabožiny wobdźělić. Šulerjo wuknu fleksibelnje, samostatnje a z digitalnej podpěru“, zwurazni sakski kultusowy minister Conrad Clemens (CDU). Biskop Heinrich Timmerevers so wjeseli, zo je model w Sakskej wuspěšny. „Nazhonjenja wotbłyšćuja, zo ma wučba dobru kwalitu“, biskop wuzběhny. Aktualna skupina wuknjacych su šulerjo z cyłeje Sakskeje, mjez druhim z Biskopic. Přichodnu póndźelu móža so zajimcy, předewšěm starši, we wobłuku widejoweje konferency wo poskitku informować.
