Ličbu wjelkow wobmjezować
Podstupim (dpa/SN). Braniborske ratarske ministerstwo ma za trěbne, w nuzy tež wjelki zatřělić. To je tuchwilu hišće zakazane. Mjeztym pak je pokazkow, zo móhło so tole změnić. Statny sekretar za ratarstwo Gregor Beyer, kotryž je tuchwilu za tak mjenowany wjelči management zamołwity, rozkładźe, zo je přirunujo z kónčinami po cyłym swěće hustota wjelkow w zwjazkowym kraju najwyša. „Wuchadźam z toho, zo mamy tu něhdźe 2 000 rubježnych zwěrjatow.“ W Norwegskej, kotraž je jědnaće króć wjetša hač Braniborska, je 250 wjelkow zadomjenych. Prašenje tuž je, kelko wjelkow Braniborska znjese. Statny sekretar na tym njedwěluje, zo wjelk do Braniborskeje słuša. Tola konflikty z rubježnymi zwěrjatami přiběraja. Ratarjo a škitarjo zwěriny hižo wjacore lěta wo tym diskutuja, kak z wjelkom wobchadźeć.
Škitny status na runinje EU so w přichodźe po wšěm zdaću zniži. Za to pak ma so prawo EU změnić. Hakle po tym budźe móžno, aktiwnje zapřimnyć a ličbu wjelkow w Braniborskej regulować. Gregor Beyer wuchadźa z toho, zo móhło snano hižo klětu tak daloko być.
Ratarjo regiona sej změnu politiki žadaja
Čorny Hodler (SN/BŠe). Mnohe ratarske zawody w regionje Budyšin-Kamjenc pytaja za móžnosćemi, kak móhli dale k wubědźowanju kmane wostać. „Stupace kóšty a přiběraca běrokratija nas haća“, zwurazni předsyda regionalneho burskeho zwjazka Budyšin-Kamjenc Stefan Triebs minjeny pjatk w Čornym Hodlerju. Kandidat za wólby zwjazkoweho sejma Budyskeho wólbneho wokrjesa Steffen Roschek (CDU) bě zhromadnje ze sakskim ministrom za ratarstwo a wobswět Georgom-Ludwigom von Breitenbruchom (CDU) na diskusijny wječor přeprosył. Wulka syła wopytowarjow swědčeše wo tym, zo je wjele dypkow, kiž ratarjow zaběra.
Přichodnje lěpše wuměnjenja za operacije
Wojerecy (AK/SN). We Wojerowskim klinikumje Łužiska jězorina chcedźa wobłuk za operacije přetwarić. Financowanje naprawy zaručeja srědki za změnu strukturow. Wo tym informowaše tele dny jednaćelka klinikuma Juliane Kirfe. Cyłkowne kóšty wučinjeja dohromady něhdźe 6,5 milionow eurow. Zwjazk projekt z 90 procentami spěchuje, zbytk we wobjimje dźesać procentow přewza Swobodny stat Sakska. „W januaru přihoty zahajichmy. Poprawnu twarsku fazu planujemy w meji. Wobmjezowanja nimaja nastać. Wobhospodarjenje chorownje ma normalnje pokročować“, jednaćelka zwurazni. „Nadźijamy so, zo móžemy naprawu w decembrje zakónčić“, wona doda.
Planuja wjacore twarske naprawy
Zaměrowy zwjazk Łužiska jězorina Braniborska je sej lětsa wjele předewzało. Zaměrnje dźěłaja čłonojo zwjazka na tym, jězorinu přihódnje za wobydlerjow a turistow wuhotować.
Kóšyna (AK/SN). Krajinowa značka „Zerzawy hozdźik“ blisko Košynka ma so za wopytowarjow porjeńšić. Zaměrowy zwjazk Łužiska jězorina Braniborska chce tam wulce inwestować. Ležownosć dyrbi so rjeńšo wuhotować. Tohorunja planuje tam zwjazk wobchadne připrawy a małki přistaw. Tole wuzběhny předsyda Detlev Wurzler zaměroweho zwjazka zawčerawšim na lětnej rozmołwje z nowinarjemi. „W nazymje chcemy twarić započeć“, wón rozkładźe. Srědki su hižo k dispoziciji. „Předewšěm chcemy zymske połlěto 2025/26 za twarjenje wužiwać, tak zo wopytowarjow wulce njemylimy.“ Ludźo smědźa dale wuhladnu wěžu wužiwać. Mjeztym dźěłaćerjo tam hižo prěnje dźěła za přihotowanje twarnišća wukonjeja a štomy podrězaja, štož hajnik rewěra Harald Koncak dohladuje.
Přemysłowy park motor regiona
Nadrózna Hrabowka (SN). Wažny měznik za dalše wuwiće hospodarstwa we Łužicy bu wčera w Nadróznej Hrabowce iniciěrowany. Sakski ministerski prezident Michael Kretschmer (CDU) je w foyeru twornje TDDK swjatočnje přizwolenje za rozšěrjenje tamnišeho přemysłoweho parka přepodał. Planowane je, přemysłowu přestrjeń wo 36 hektarow rozšěrić. „Z tutym projektom tu industrijnišćo přichoda nastanje, štož je dalši sylny signal za změnu strukturow we Łužicy“, je Kretschmer přeswědčeny.
Cyłkownje chcedźa zamołwići 18,4 miliony eurow, z toho něhdźe 15,3 miliony eurow spěchowanskich srědkow z hornca za strukturne wuwiće brunicowych regionow, na stejnišću inwestować. Njedźichowski měšćanosta Harry Habel wuzběhny wuznam naprawy za město: „Přemysłowy park je motor za wuwiće Njedźichowa a cyłkowneho regiona. Z tutym projektom dalši króć dopokazamy, zo tu atraktiwne stejnišćo za předewzaća poskićamy.“ Wulki zajim za rozšěrjene parka ma předewzaće Pletzer Gruppe, kotrež chce na arealu twornju twarić, hdźež ćopłotne klumpy zhotowja.
Wědu wo starych rjemjesłach šěrić
Błótowske towarstwo je loni dźěłarnički zarjadowało, hdźež so zajimcy z twarom wosebitych čołmow zaběrachu
W ramiku wot Błótowskeho towarstwa z.t. organizowanych dźěłarničkow, na kotrychž zaběraja so zajimcy z twarom drjewjanych čołmow w Błótach, wopytachu wobdźělnicy njedawno mjez druhim dźěłarnju w Tuchowje pola Łucki. Do toho pobychu w metalotwarskej firmy Jakubik w Bórkowach, Tšupčanskej kowarni kaž tež pola Wolfganga Gahla w Lědach.
Myto Lessinga přepodali
Tež we Łužicy mało dorosta
Monika Cyžowa je předsydka Zwjazka serbskich rjemjeslnikow a předewzaćelow (ZSRP), kotryž je w lěće 2000 Domowinje přistupił. Wona starosći so, dokelž ličba serbskich rjemjeslnikow a předewzaćelow dale a bóle woteběra.
Nowa Jaseńca (SN/MiP). „Lěto 2024 zahajili smy kaž kóžde lěto z ekskursiju do Drježdźan w januarje. Mjez druhim smy Muzej hygieny wopytali“, Monika Cyžowa rozprawja. Na dalšu zhromadnu wuprawu podachu so čłonojo towarstwa w juniju z kolesom do Krabatoweho młyna w Čornym Chołmcu a sej tam hornčernju Andreasa Hegewalda wobhladachu. Na dalšej tři-dnjowskej ekskursiji wobhladachu sej zběharnju łódźow w Eberswaldźe. „Lěto zakónčili smy w decembrje z wjedźenjom po starym Budyšinje a wopytom rejowanskeje estrady w Serbskim ludowym ansamblu“, předsydka towarstwa naspomni.
