Žadanja ratarjow chutnje brać
Budyšin (SN/BŠe). Změna klimy je tež ratarjam wužadanje, wšako dožiwjamy dale a časćišo wjedrowe ekstremy. Tajke zawostajeja zdźěla eksistencu wohrožace škody a tuž žadaja sej ratarjo w Němskej wosebite zawěsćenje, w kotrymž su wjacore ekstremne podawki sobu zapřijate. „Tajke móhło za přichod zawěsće dobra móžnosć być, rizika kaž suchotu, sylny dešć, wichor a zmjerzk zawěsćić. Fenomeny njehodźa so mjenujcy kalkulować. Hižo wjele lět znajemy zawěsćenje přećiwo škodam krupow dla, kotrež nimale wšitcy ratarjo w nalěću wobzamknu“, wujasni předsyda regionalneho burskeho zwjazka Budyšin-Kamjenc Stefan Triebs. Tola wulki rozdźěl je, zo so krupy jenož regionalnje na poměrnje małki teritorij wobmjezuja. Tu mjenowane strachi pak často cyłkowny Budyski wokrjes abo wuchodnu Saksku potrjechja. Tohodla je tajke zawěsćenje chětro drohe. Zwjazkowe knježerstwo móhło ratarjam pomhać a wěstu přiražku płaćić. To by móžna pomoc ratarjam ze stron stata była, jelizo suchota abo powodźenja zachadźeja a škody zawinuja.
Domicil za dowol a přechodnu fazu
Na regionalnej konferency Hornjołužiska hola a haty (OHTL) před tydźenjomaj w Pančicach-Kukowje zastupjerjo před wjesnjanostami kónčiny a turistiskimi poskićowarjemi wo swojich aktiwitach rozprawjachu. K tomu słuša tohorunja ekskursija, w kotrejež ramiku zajimawe projekty wopytachu.
W jězorinje wjele prózdninskich poskitkow
Wojerecy (SN/BŠe). W nazymskich prózdninach njeje trjeba so do cuzby podać. Tež w domiznje je dosć a nadosć wulkotnych dožiwjenja połnych poskitkow. Pohórnistwowa krajina we Łužicy so dale na idylisku jězorinu z přirodoškitnymi kónčinami změnja. Nihdy do toho njeje so w Europje region z wjacorymi brunicowymi jamami w tajkim měrje, z tajkim wobšěrnym ekologiskim narokom renaturěrował. Wysoke wudawki pak su so wupłaćili. Tak móža sej swójby w nazymskich prózdninach na wodźenjach abo pućowanskich čarach rjanu kónčinu wotkryć.
Alpaki drje njejsu klasiska družina wužitnych zwěrjatow w jězorinje. Na burskim statoku Cornelije Schnippa w Ptačecach při Lejnjanskim jězorje so wone přiwšěm derje čuja. Dokelž su kontakt k čłowjekej zwučene, móža so swójby z dźěćimi wot štyrjoch lět ze swěrnymi štyrinohačemi po zapokazanju na pućowanje podać. Tež ergoterapeutka Christine Berthold zmóžnja swójbam wuchodźowanje z alpakami. Wot Złeho Komorowa tury po regionje startuja.
Štó je „wučomnik přichoda“?
Druhi raz wuhotowaše Ralbičanska wyša šula wóndano „Regionalne powołanske wiki“. Njemało zajimčow a zajimcow je přichwatało. Tež podijowa diskusija bě lětsa wobstatk programa.
Štóž šulu zakónči, ma w optimalnym padźe plan, što chce ze swojim přichodom započinać. Za šulerki a šulerjow je tuž esencielne, zo informuja so wo móžnosćach wukubłanja, wšojedne, hač na uniwersiće abo w zawodach. Ralbičanska serbska wyša šula je wóndano druhi raz tajki poskitk informowanja zarjadowała.
„Regionalne powołanske wiki“ – za tutym hesłom chowa so pisany poskitk. Zawody z dwurěčneje Hornjeje Łužicy jón zarjadowachu. Z wothłosom su organizatorojo jara spokojom. Jedyn z organizowacych wučerjow, Mathias Kliemank, po zarjadowanju přeradźi: „Dopołdnja běše něhdźe 500 šulerkow a šulerjow tu, kotřiž su z busom přijěli. Hala bě potajkim stajnje połna.“ Wosebje chwali sej Kliemank wulki angažement wustajerjow, kotřiž „spytachu šulerkam a šulerjam woprawdźe něšto praktiske sobu na puć dać.“ Wosebity highlight bě za njeho podijowa diskusija, kotruž běchu lětsa prěni raz zarjadowali.
Kótwišćo kultury na hračkach
Ani po wusudźe sudnistwa financowanje muzeja w Dešnje wěste njeje
Dešno (SN/mj). Stari Słowjenjo – rjemjeslnicy a wojacy muzeja pod hołym njebjom w Dešnje – su po dalšej wuspěšnej sezonje swoje stany wottwarili a so ze swojim podomkom wotsalili. Ale serbski domizniski muzej sam dyrbi dale wo swoju eksistencu wojować – najebać njedawny wusud zarjadniskeho sudnistwa w Choćebuzu. Zwada ze zarjadom hamta Bórkowy dźe dale, kotryž bě muzejej lěta 2020 swoju přiražku njejapcy šmórnył.
Na próstwje zaměrnje dźěłaja
Łužica chce so z regionom za zelenu energiju stać, kotryž je po cyłej Europje jónkrótny. Tak ma so w kónčinje prěni „Zero Net Valley“ jako pilotowy projekt přewjesć, w kotrymž so žadyn wuhlikowy dioksyd njewustorkuje. Na wiziji zastupjerjo z politiki zaměrnje dale dźěłaja. Nětko so znowa schadźowachu.
Polěpša wuměnjenja wučomnikam
Budyski wokrjes chce swoje powołanske šule směrodajnje do přichoda wuhotować. Za to budu cyłkownje 18 milionow eurow do kubłanišćow inwestować, a to najebać ćežow etata.
Budyšin (SN/BŠe). Signal Budyskeho wokrjesa za přichod je cyle jasny. Powołanske šule we wokrjesu dyrbja so nuznje modernizować. Tuž wobdźěli so wokrjes wuspěšnje na wubědźowanju EU a dóstanje z programa Just Transition Fund (JTF) spěchowanske srědki, kotrež wobšěrne modernizowanje zmóžnja.
Tele dny je Budyski wokrjesny sejmik wotpowědnje wobzamknył, trěbny swójski podźěl k dispoziciji stajić. Nětko je móžno, konkretnišo postupować a podłožki za předewzaće spřihotować. „Wobzamknjenje bě zakład za spěšne zwoprawdźenje planowaneje naprawy a polěpšenje wuknjenskich kaž tež wukubłanskich wuměnjenjow na powołanskich šulach“ wuzběhny prěni přisydnik wokrjesa a zamołwity za šule we wokrjesu Jörg Szewczyk. „Nětko dyrbimy na přizwolenje čakać. Paralelnje móža zamołwići wokrjesa hižo dalše plany zhotowić a z tym spěšne zwoprawdźenje projektow zaručić.“, wón měni.
Powołanje serbsce wuspytali
Na Ralbičanskich powołanskich wikach šulerjow z poskitkami zahorili
Ralbicy (SN/lmc). Druhi raz je wčera Serbska wyša šula Ralbicy regionalne powołanske wiki přewjedła – a to znowa z połnym wuspěchom. Lětsa njeběchu powołanske wiki – dźakowano mnohostronskemu wabjenju – přewidźeć. Mnohe plakaty, zhotowjene wot šulerkow a šulerjow Ralbičanskeje šule, wupyšachu poslednje tydźenje wokolinu kołowokoło delanskeho kubłanišća. Młodostni z wosom šulow a mnozy dalši zajimcy su dopołdnja na zarjadowanje do Ralbic přichwatali. Wot napoł dźesaćich pjelnjachu zajimawe rozmołwy, zetkanja a smějace mjezwoča sportownju wyšeje šule. Na spočatku drje hišće tróšku wahacy a zdźeržliwi pohibowachu so šulerjo a šulerki 7. do 10. lětnika na kóncu cyle wotewrjeni a wjeseli.
