Łužiski lěwanćik, čorny kobołk a kórkacy gin
Dohromady 275 000 wopytowarjow je lětuši mjezynarodny Zeleny tydźeń do Berlina přiwabił. To je 25 000 mjenje hač loni. Předewšěm stawk lokomotiwnikow dźěłarnistwa GDL je po měnjenju zarjadowarja hłowna přičina za to. Najebać to běše facit šefa Berlinskich wikow, Maria Tobiasa, njedźelu po zakónčenju zarjadowanja, pozitiwny.
W přerězku je kóždy wopytowar lětsa 150 eurow wjace hač na lońšich wikach wudał. Zajim medijow a wosebje tež politikarjow, běše na lětušim 88. mjezynarodnym Zelenym tydźenju jara wulki. Hladajo na trajace protesty burow w Němskej njezadźiwa, zo je kancler Olaf Scholz (SPD) a wosom dalšich ministrow knježerstwa wiki wopytało a rozmołwu z ratarjemi pytało. Zwjazkowy ratarski minister Cem Özdemir (Zeleni) je nimale kóždy dźeń na wustajenišću swojeho ministerstwa był a z ludźimi wo přichodźe ratarstwa a produkciji žiwidłow diskutował.
Pjaty dźeń Zeleneho tydźenja
Stawki za nowe zrěčenje
Budyšin/Drježdźany (SN). Dźěłarnistwo Verdi je na wuchodźe Němskeje k stawkowanju namołwjało. Sobudźěłaćerjo zjawneho bliskowobchada nimaja pjatk dźěło nastupić. Kaž dźěłarnistwo póndźelu zdźěli, ma stawk cyły pjatk trać. W Sakskej potrjechene su wobchadne zwjazki w Drježdźanach, Kamjenicy, Lipsku a Pławnom. W Budyskim a Zhorjelskim wokrjesu stawk njewočakuja.
Pozadk stawka su jednanja wo nowej mzdźe za sobudźěłaćerjow zjawneho bliskowobchada. W Sakskej jednaja wo nowym mantlowym tarifowym zrěčenju. Tute ma wosebje dźěłowe wobstejnosće rjadować. Verdi žada sebi mjez druhim wjac dowola a zawjedźenje přiražkow za dźěło kónc tydźenja a za nadhodźiny. Kaž praji hłowny jednaćel stawkow w Sakskej, Paul Schmidt, „wotpokazuja dźěłodawarjo žadanja wyšeje mzdy dla. Tute pak běchu trěbne. Wyša mzda pak ničo na tym njezměni, zo trjebaja přistajeni skónčnje wolóženja.“ Nowe mantlowe zrěčenje ma 24 měsacow płaćić. Tež w Durinskej a Saksko-Anhaltskej paralelnje wo nowych mzdach jednaja.
Do něhdyšich jamow inwestuja miliardy eurow
Wojerecy (AK/SN). Łužiska a srjedźoněmska towaršnosć hórnistwoweho zarjadnistwa (LMBV) chce přichodne lěta cyłkownje 19 pohórnistwowych nasypnišćow ponowić. Za to chce towaršnosć něhdźe tři miliardow eurow inwestować, cyłkownje 1,177 miliardy eurow w Sakskej a 1,867 miliardow eurow w Braniborskej. Jeničce w Sakskej je předwidźane hač do kónca 2030ych lět wosom wobšěrnych naprawow zwoprawdźić. „Chcemy zastupjerjow wokrjesow, gmejnow a wobydlerstwo sobu zapřijeć“, rozłoži nawoda wobłuka za saněrowanje Łužicy Gerd Richter na wčerawšim posedźenju zaměroweho zwjazka Łužiska jězorina Sakska we Wojerecach. Proces dyrbi za wšitkich transparentny być. „Loni rěčachmy z krajemi wo financowanju. Wo tym hižo na posedźenju zaměroweho zwjazka Łužiska jězorina Braniborska a braniborskim brunicowym wuběrku rozprawjach. Dalše terminy nětko w Sakskej sćěhuja.“
Ze słowjanskeho hrodźišća w Radušu móhła Łužica swěćić
Załožba Slavonic Europe swoju wiziju we Wětošowje předstajiła
Puć do słowjanskeho hrodźišća blisko Raduša na tejle januarskej póndźeli powabny njeje. Sně taje. Woda a zbytki lodu na puću skutkuja kaž přirodny zadźěwk. Kedźbliwje dyrbiš kročić, zo so njewobsunješ a swój zaměr wěsće docpěješ. W pozadku šumi wobchad na awtodróze A 15. Maja šoferojo w připołdnišej hodźinje scyła wid na to, štož nalěwo a naprawo magistrale leži?
Poprawom su muzeje skoro po wšej Němskej póndźelu zawrjene. A nimo toho je zyma. Za pomnik starych Słowjanow to njepřitrjechi. Byrnjež nutřkowny areal přemokany był, terasa bistra wězo wopušćena, witaja hosći hišće hač do měrca wšědnje nimo pjatka wot 10 do 16 hodź. do muzeja. Hač do naju rozmołwy njeje sej tam nichtó zastupny lisćik kupił, powěda angažowana sobudźěłaćerka, kotraž swoje mjeno w nowinje čitać nochce. Dnjej do toho bě to cyle hinak. Suche słónčne zymske wjedro bě ludźi prosće k tomu přeprosyło, sej kónc tydźenja do słowjanskeho hrodźišća wulećeć.
Mjenje běrokratije na dobro regionalnych producentow
Berlin (SN/MiP). Hladajo na nadal so wotměwace protesty burow w Němskej du politikarjo do dialoga z nimi – tež na 88. mjezynarodnym zelenym tydźenju w Berlinje. Zhromadnje ze zwjazkowym ministrom za ratarstwo Cemom Özdemirom (Zeleni) wopyta kancler Olaf Scholz (SPD) wčera wšelake wustajenišća, mjez druhim wjacore ekologiske zawody. W rozmołwje z ratarjemi wuzběhny wón, „zo chce knježerstwo jich z wottwarom běrokratije na zwjazkowej kaž tež europskej runinje pragmatisce podpěrować.“
Jedne serbske předewzaće zastupjene
Gmejna reaguje: Žane sydlišćo „Němskeho kralestwa“ w ...
Na ležownosći bywšeho Bjerwałdskeho hrodu ma sydlišćo nastać. „Předwidźane su mjeńše domčki, w kotrychž chcedźa so čłonojo sekty Němske kralestwo zasydlić. Trajne bydlenske prawo ma 20 000 eurow płaćić“, wuswětli dr. Dirk Belling ze Sakskeho krajneho zarjada za wustawoškit. Tam wón wotrjad wuhódnoćenje prawicarskeho ekstremizma nawjeduje. Njedawno je zajimcam w Hamorskim wjesnym domje přednošował, hdźež so informaciski wječor za wobydlerjow wotmě. Přeprosyła bě Hamorska gmejna. Andreas Tietze ze zjednoćenstwa ciwilna kuraža Pirna je moderaciju wječora přewzał. Jako wěcywustojni běchu připosłucharjam Dirk Belling, policist Torsten Beck, kiž je zdobom čłon syće fachowcow za prawicarski ekstremizm a sobudźěłaćerjo Sakskeho nutřkowneho ministerstwa k dispoziciji.
Zwjazk projekt LAB podpěruje
Berlin/Budyšin (SN/at). Etatowy wuběrk zwjazkoweho sejma je wčera wobkrućił, zo zwjazkowe knježerstwo nowy Zwjazkowy centrum za twarske slědźenje „Living Art of Building (LAB)“ spěchuje. LAB ma w Budyšinje nastać.
Sakski zapósłanc Torsten Herbst (FDP) ma za „dobre znamjo, zo je so zwjazkowy sejm znowa k tomu wuznał, twarski slědźerski centrum zwoprawdźić“. Po słowach Herbsta njebudźe LAB jenož „woprawdźita swětłownja za inowatiwne twarstwo“, wón wočakuje zdobom čujomne nastorki łužiskemu a sakskemu hospodarstwu. „Wot wuskich stykow slědźenskeho projekta z hospodarstwom tež twarske předewzaće směrodajnje profituja“, zdźěli zapósłanc.
Srědki Zwjazka za natwar a dźěło LAB wučinja po podaću Herbsta lětsa 3,6 milionow eurow, wot 2025 hač do 2028 budźe jich 65 milionow eurow.
Nowe slědźenišćo ma wuslědźić, kak budźe w přichodźe móžno za klimu neutralnje a resursy lutowace twarić. Po informacijach města Budyšina chcedźa z LAB wjace hač 1 200 dźěłowych městnow we wědomosći a technice wutworić.
Inwestuja do zeleneje miliny
Yados chce w Narću płoninu za produkciju podwojić
Narć (SiR/SN). Štož bě so w lěće 2009 skerje małe započało, je mjeztym kruta a wuspěšna institucija na hospodarskich wikach. Předewzaće Yados měješe spočatnje 40 sobudźěłaćerjow a produkowaše na 2 300 kwadratnych metrow wulkej přestrjeni. Dźensa ma předewzaće, kotrež produkuje wudźěłki za eficientne wužiwanje energije, dohromady 320 sobudźěłaćerjow. Produkciska přestrjeń je na 16 000 kwadratnych metrow rozrostła. Yados słuša k Hoval-skupinje a ma 60 milionow eurow lětneho wobrota.
Zesylnjeja swoju „druhu nohu“
Předewzaće Jägermeister swój skład w Kamjencu dale rozšěrja
Kamjenc. Cyłkownje 80 dubowych sudow, kotrež so přeco hišće w ručnym dźěle zhotowjeja, steji dotal w Kamjenskim zawodźe Jägermeister k dispoziciji. W nich składuja zakładne přidawki za woblubowany liker. Kóždy sud ma městno za hač do 10 000 litrow. Mjeztym pak je přemało městna za sudy, zo móhli potrjebu předewzaća dołhodobnje zaručić. Tohodla je towaršnosć zawoda rozsudźiło, skład rozšěrić. Loni kónc nowembra su tam zamołwići zaryw swjatočnje woswjećili. Cyłkownje chcedźa při Kamjenskim stejnišću Jägermeister wjacore miliony eurow inwestować. W nowym składźe za sudy ma městno za hač do 225 dalšich dubowych sudow być.
Wudźeržliwosć je samozrozumliwa
