Tež ćišćernja ćerpi lockdowna dla
Wot koronakrizy potrjechene su tež zawody, kotrež njetrjebachu swoje dźěło přetorhnyć, kaž ćišćernja Schiemenz w Choćebuzu. Zawod bě do wudyrjenja pandemije wulki dźěl swojich dochodow z plakatami za kina a z wabjenskim materialom za hosćency, turizm, kulturne institucije a zarjadowarjow nadźěłał, kaž jednaćel Frank Schiemenz (hlej wobraz) rozprawja. Loni srjedź měrca pak běchu wšitke předewzaća skazanki wróćo sćahnyli. Tak je firma 35 procentow wobrota přisadźiła. „Tajku stratu njemóžemy hižo nachwatać“, Schiemenz měni. Wón so nětko nadźija, zo wobmjezowanja bórze zběhnu a zo móže zaso „normalnje“ dźěłać. Foto: Michael Helbig
Straty wjac hač 50 milionow eurow
Lońše ličby přenocowanjow po cyłej Łužicy dopokazuja, kak turistiski wobłuk pod koronapandemiju ćerpi. Wšudźe pak hotuja so na nowu sezonu, kotraž ma ćim wuspěšniša być. Šansy za to su po wšěm zdaću jara dobre.
Budyšin (SN/BŠe). Lońše straty turistikarjow regiona koronapandemije dla nětko skónčnje tež w ličbach předleža. Marketingowa towaršnosć Hornja Łužica-Delnja Šleska (MGO) je so z nimi bliže zaběrała. Ličba absolutnych přenocowanjow hosći, kotřiž su loni do Hornjeje Łužicy přišli, leži pola 1 578 446, štož je 434 592 mjenje hač w rekordnym lěće 2019, hdźež bě wjac hač dwaj milionaj hosći w regionje přenocowało. MGO trochuje pobrachowace dochody na něhdźe 51,5 milionow eurow. Tale hoberska ličba nam wuwědomja, kak turistiski wobłuk ćerpi. Jara pozitiwnje pak hódnoći MGO wuwiće, zo ludźo dlěje w regionje přebywaja hač hewak. Tak je so tale přerězna ličba wot 2,6 na 2,9 dnjow powjetšiła. Zaměr, přerěznje tři dny přebytka docpěć, je tuž bliski. Předewšěm campingownišća a poskićerjo dowolowych bydlenjow registrowachu dlěše přebytki.
Truty maja přichod
Jako bě słyšeć: „Piwarnja so pali!“
Warjenje piwa ma w Budyšinje dołhu tradiciju, při čimž bywše zawody bohužel wjace njeeksistuja
Nóc wot 19. na 20 februar 1996 je so mnohim wobydlerjam sprjewineho města do pomjatka zaryła. Temperatura bě wokoło nule, měšeńca sněha a dešća bě chětro njepřijomna. Přiwšěm bě w pózdnich wječornych hodźinach njewšědnje wjele ludźi na Budyskich dróhach. Wšako bě nóc wot róžoweje póndźele na póstnisku wutoru, w kotrejž mnozy swjećachu. Tak tež njezadźiwa, zo je so powěsć něhdźe w 22.30 hodź. spěšnje po měsće šěriła: „Woheń! Piwarnja so pali!“
Hižo krótko po tym zhromadźi so wulka syła ludźi wokoło markantneho kompleksa twarjenjow na wuběžku skały přez Sprjewju. Wjacore sta wobydlerjow su to, štož widźachu, ze swojimi widejowymi kamerami a fotoaparatami – smartfony tehdy hišće žane njeběchu – sćěhowali. Jako „disciplinowanych“ jich policija pozdźišo wopisowaše. Nichtó njeje hašenske dźěła mylił abo je ze swojim zadźerženjom samo wohrozył.
Tež Budyske wobchody wobswětlene byli
Budyšin (SN/BŠe). Poprawom je Budyski Center na Žitnych wikach koronapandemije dla zawrjeny, ale wčera wječor běchu tam wobchody a wukładne wokna čerwjene wobswětlene. Akcija, wotměwaca so w nakupowanišćach po cyłej Němskej, měrješe so na ministerskich prezidentow zwjazkowych krajow, kotřiž budu na swojej jutřišej konferency wospjet nastupajo wobmjezowanje swobodneho pohibowanja wuradźować. Wikowarjo skedźbnjachu tak na swoje ćežke, eksistencu wohrožace połoženje. Drobnowikowarjo měli bórze zaso swoje wobchody wotewrěć směć. „Z akciju chcemy jasnje na to pokazać, kak wikowarjo ćerpja. Mnozy so boja, zo dyrbja swój wobchod cyle zawrěć. Nimo toho je wjele dźěłowych městnow wohroženych. Z njeličomnych přepytowanjow wuchadźa, zo so jara mało ludźi při nakupowanju natyknje. Tež Roberta Kochowy institut ma infekciske riziko za snadne“, zwurazni wčera manager Budyskeho centera Christian Polkow. Poskitk click & collect nima wón za woprawdźitu alternatiwu. Wšako kóšty za personal a wobhospodarjenje wobchodow wostawaja a wobrot njenarunaja.
„Najebać pandemiju turizm móžny“
Drježdźany (SN/BŠe). Zo druhi lockdown mjez druhim tež turistiski wobłuk chětro poćežuje, je znate. Němski zwjazk hotelow a hosćencow (Dehoga) so zaměrnje za branšu zasadźa. Jeho zastupjerjo su so njedawno ze sakskim ministerskim prezidentom Michaelom Kretschmerom (CDU) rozmołwjeli. Wosebje hladajo na jeho wuprajenje, zo dowol k jutram zawěsće móžny njebudźe, je jich trjechiło. Akterojo rysowachu jemu dramatiske połoženje, skedźbnichu pak zdobom na hygienowe koncepty kaž tež na schodźenkowe plany, z pomocu kotrychž móhli hotele a hosćency wotewrjene być.
Hišće wjace z regiona
Wobmjezowanje strach načinja
Heike Bergmann je we Wojerecach před dlěšim časom wobchod z mjenom „Der Etwas Andere Laden“ wotewrěła. Silke Richter je so z 59lětnej Ćišćanku wo akciji „click & collect“ rozmołwjała.
Wjele wobchodow tuchwilu wo přežiwjenje wojuje. Kak posudźujeće swoju aktualnu situaciju?
H. Bergmann: Dyrbjachmy swój wobchod wjacore měsacy zawrěć a njewěmy, kak dołho to hišće tak wostanje. Nimamy dosć pjenjez, zo bychmy hišće dlěši čas zawrjenja přetrali. Mamy hižo w normalnych časach wojować, zo kupcy wobstajnje k nam přichadźeja. Wšako wulke kupnicy-samoposłužowarnje za čas lockdowna drastu a črije předawaja a małe wobchody tak pomału kóncuja. Přiwšěm mamy za podruž, pódlanske kóšty, chorobnu kasu a zawěsćenja dale płaćić. Tež bychmy wo wróćostajenje tychle kóštow prosyć móhli, dyrbimy je na kóncu přiwšěm zapłaćić. Spytamy tuž druhdźe mjenje wudać a lutować. Bojimy so wšědnje wo eksistencu. Moja partnerka we wobchodźe Ingrid Gräwert a ja smój wobě samokubłacej maćeri. Ja mam zbrašenu dźowku, kotraž je wot nowembra doma. Boju so, zo so na dźěle z koronawirusom natyknje.
Wjele poskitkow schadźowanja
Budyšin (SN). Schadźować so w časach pandemije poprawom móžno njeje. Internetna strona www.schadźowanka.de pak skići wjele zajimawych wirtuelnych zetkanjow a zarjadowanjow. Hižo minjenu sobotu přewjedźechu tam hru „Tabu“. Dźensa, pjatk, slěduje w 17 hodź. serbske kino w póstnym času. To je interaktiwne zarjadowanje z filmom „Gilles“ z kwisom a mytami.
Přichodne filmowe popołdnjo z filmom „Karla & Katrina“ budźe 5. měrca. Dźeń pozdźišo budu jejka wóskować. Zaměr toho je, zo maja sej wosebje dźěći jutrowny nałožk spřistupnić a so wuměłsce wukmanić. A wězo móža so ze swojimi kreacijemi na wubědźowanju wo najrjeńše jutrowne jejko wobdźělić. Zarjadowanje wotměje so live ze studija. 12. měrca potom běži pask „Syn Winnetouwa“, a dźeń pozdźišo budźe móžno z Rafaelu warić. Dotal posledni poskitk planuja 20. měrca klankodźiwadło. Štóž ma dalše namjety abo ideje wirtuelneho schadźowanja, smě so rady na Budyske studijo SAEK wobroćić.
Trjebaja perspektiwu
Mjeztym druhe zastajenje zjawneho žiwjenja w běhu jednoho lěta ze zawrjenymi hosćencami, hotelemi a dalšimi dowolowymi přebywanišćemi turistisku branšu jara poćežuje. Po słowach Budyskeho krajneho rady Michaela Hariga (CDU) je połoženje katastrofalne. Přiwšěm widźi wón swětleško na kóncu tunla.
Budyšin (SN/BŠe). „Dźakuju so wšitkim turistikarjam, kotřiž dale kruće do wotewrjenja zjawnych domow wěrja a koncepty zdźěłuja.“ To rjekny wčera krajny rada Budyskeho wokrjesa Michael Harig (CDU) na digitalnej nowinskej konferency, kotruž je Marketingowa towaršnosć Hornja Łužica-Delnja Šleska (MGO) přewjedła. Zhladujo na minjene lěto 2020 je Michael Harig přiwšěm optimistiski. Straty z nalěća móžachu wjacore zawody zdźěla nachwatać. Byrnjež turizm po cyłej Sakskej chětro wosłabił, to za Hornju Łužicu a Delnju Šlesku cyle njepřitrjechi. MGO registrowaše loni 21,6 procentow mjenje přenocowanjow hač lěto do toho. Po cyłej Sakskej bě to porno tomu minus 35 procentow.
