Twornja TDDK za němske klimowe kompresory w Nadróznej Hrabowce je zašły kónc tydźenja swoje 25lětne wobstaće woswjećiła. To zwjazachu ze swjatočnym poswjećenjom šesteho twarskeho wotrězka a dozhotowjenjom nowych­ halow.

Nadrózna Hrabowka (SN/MiR). Rajs na twarske kamjenje sypajo a z japanskim sake sej připiwajo zwuraznichu přitomni swoje wjeselo nad docpětym. Sakski ministerski prezident Michael Kretschmer (CDU), kiž bě wospjet hósć TDDK, zwurazni před wjace hač sto hosćemi z Japanskeje a regiona kaž tež před sobudźěłaćerjemi předewzaća, zo „běše sakskej krajnej politice stajnje wažne, tutu japansku inwesticiju w swobodnym staće Sakska měć.“