Zaměrowy zwjazk Łužiska jězorina Sakska je prěnjemu wulkemu inwestorej na Kóšynskim nasypje při Borborinym kanalu mjez Lejnjanskim a Parcowskim jězorom puć za resort rubał.
Hamor (AK/SN). Jednohłósnje su radźićeljo zwjazka zawčerawšim na swojej zhromadźiznje w Hamorje wobzamknyli, zo cyłkownu 19 hektarow wulku přestrjeń předadźa. Tam ma prózdninski resort z 260 prózdninskimi domami a třomi centralnymi wobłukami, kiž změja tematiske wusměrjenje, nastać. Cyłkowna kupna płaćizna ležownosće wučinja 1,7 milionow eurow.
Jury, kotraž naprawy posudźuje, je so intensiwnje z temu zaběrała. Nadawk za twar resorta je wona na swojim posedźenju w awgusće předewzaću Dresario tzwr přepodała. Jednaćel zaměroweho zwjazka Daniel Just wopodstatni, čehodla su so za tute předewzaće rozsudźili: „Koncept Dresario wotpowěduje w dalokej měrje postajenjam za wusměrjenje twarjenjow na ležownosći.“ Pozitiwnje je jury nimo toho hódnoćiła, zo koncept regionalnu twarsku kulturu wobkedźbuje.
