Jednanje so dliji
Choćebuz (SN). Sudniske rozestajenje w zwisku ze zakazowej deklaraciju (Unterlassungserklärung) mjez energijowym koncernom LEAG a dwěmaj aktiwistomaj skupiny „Ende Gelände“, kotraž so za škit klimy a wobswěta zasadźuje, so dliji. „Jednanja móžneho zwonkasudniskeho dojednanja dla njeběchu wuspěšne“, to je rěčnik krajneho sudnistwa wčera w Choćebuzu zdźělił. Přichodny termin jednanjow budźe 19. septembra.
Serbske aktiwity TDDK z nowym wupłodom
Prezident a jednaćel twornje za klimowe kompresory TDDK, Yoichi Terao, je wčera prezidij Domowiny w předewzaću w Nadróznej Hrabowce witał. Při tutej składnosći předstajichu hosćićeljo najmłódši wupłód němsko-serbsko-japanskeje wzajomnosće w zawodźe, wosebite wudaće brošurki TDDK Echo z titlom „Technika, tradicija a wizija“.
Nadrózna Hrabowka (SN/at). „Najebać wšelakorosć kulturow, kotrež so pola nas zetkawaja, zhotowjeja wšitcy zhromadnje jednotny produkt. W srjedźišću stejitej tež serbska kultura a rěč“, wuzběhny Yoichi Terao. To zdobom nowa brošurka wuwědomja. Z njej chce zawod TDDK předewšěm serbsko- a němskorěčnych młodostnych docpěć. Na přichodnych powołanskich wikach w Ralbičanskej wyši šuli budźe z njej zastupjeny, zdobom měł to poskitk šulskim rjadowanjam być, kotrež předewzaće wopytaja. Brošurka informuje wo zawodźe samym, wukubłanskich a studijnych powołanjach, poda pokiwy za požadanje kaž tež spomóžny přehlad wo serbskich aktiwitach předewzaća w minjenych lětach. Wšitke wobsahowe teksty w serbskej a němskej rěči předleža.
Firmy a serbšćina
Zhotowjeja samo swójske graty
Zeleny Powerhouse struktura přichoda
Koncern Łužiska energija a milinarnje (LEAG) so nětko na wodźaceho poskićerja za rozrisanja z naslědnymi energijemi strategisce wusměrja. To je dohladowanska rada dźělneju wobłukow hórnistwo a milinarnje wčera w Choćebuzu wobzamknyła. Rozsud runa puć za wobšěrnu transformaciju druheho najwjetšeho producenta miliny kraja.
Choćebuz (SN/at). So z brunicu rozžohnować a hač do 2040 nimale 14 gigawattow wobnowjomnych energijow wuwiwać je LEAG prěni raz 2022 připowědźiła. Sydom gigawattow chcedźa hač do 2030 docpěć. Stołpy schwaleneho nowowusměrjenja su tři nowe operatiwne towaršnosće, kaž předewzaće w nowinskej zdźělence piše. Towaršnosće LEAG Renewables, LEAG Clean Power a LEAG Biomass su samostatne wobchodniske wobłuki, kotrež zjimaja pod třěchu noweje holding z mjenom LEAG tzwr. Wone tworja zakład „Zeleneho Powerhouse“ předewzaća, kaž nowinski rěčnik Thoralf Schirmer rozłožuje.
Zhromadne dźěło na dobro dwurěčnosće chcedźa pohłubšić
30 lět wobsteji biosferowy rezerwat Hornjołužiska hola a haty. Nimale runje tak dołho traja prócowanja, nic jenož Budyskeje župy „Jan Arnošt Smoler“, serbsku rěč w jeho skutkowanju zakótwić. Zarjadnistwo biosferoweho rezerwata chce tu skónčnje widźomny krok doprědka přińć. Wuchadźišćo za to tworjachu wobdźěleni na workshopje wčera w Domje tysac hatow.
Dźěłaja zaměrnje na wiziji „Zelena Łužica“
Mužakow (AK/SN). Łužica chce so z regionom za zelenu energiju stać, kotryž je po cyłej Europje jónkrótny. Tak ma so w kónčinje prěni „Zero Net Valley“ jako pilotowy projekt přewjesć, w kotrymž so žadyn wuhlikowy dioksyd njewustorkuje. Wizija ma so nětko přez konkretne zaměry a žadanja komunow a wokrjesow formulować a sakskemu kaž tež braniborskemu knježerstwu sposrědkować. Runje tak maja so zaměry a žadanja komunow parlamentej EU předstajić, zo móhli za wiziju wabić. Tole wobzamknychu čłonojo Łužiskeho kruha minjeny štwórtk na swojim posedźenju w Mužakowskim Nowym hrodźe.
Chcedźa znowa próstwu zapodać
Zaměrowy zwjazk Łužiska jězorina Sakska podpěruje komuny při jězorach nastupajo wobhospodarjenje přibrjohow a šćežkow, za čož wužiwaja spěchowanske srědki Zwjazka. Bórze pak so doba zakónči.
Wojerecy (AK/SN). Zaměrowy zwjazk Łužiska jězorina chce komunam, kotrež su čłonojo w gremiju, nastupajo wobhospodarjenje přibrjohow a kolesowarskich šćežkow při jězorach sylnišo podpěrać. Předewšěm maja so spěchowanske srědki ze zwjazkoweho programa STARK wužiwać, wo kotrež chce so zwjazk prócować. Program Zwjazka je za kónčiny ze změnu strukturow předwidźany. Radźićeljo wobzamknychu na wčerawšim posedźenju we Wojerecach jednohłósnje, zo dyrbi so spěšnje wotpowědna próstwa zdźěłać. Nowe spěchowanje měło wot klětu spočatka septembra do kónc awgusta 2029 płaćić. „Dźe wo to jězdźidła, graty a wosebite mašiny kupić. Chcemy komuny wolóžić a sami nadawki při jězorach přewzać. Tak maja so na přikład přibrjohi wurjedźić a kolesowarske šćežki hladać“, wuswětli jednaćel zaměroweho zwjazka Łužiska jězorina Sakska Daniel Just.
Radworscy starši so wobaraja
Nimale 70 milionow eurow za Čornu Pumpu
Regionalny přewodźacy wuběrk Łužiskeho rewěra (RBA) je na swojim posedźenju wčera, dalši wutwar parka industrije w Čornej Pumpje, nimo dalšich projektow, wobkrućił.
Zhorjelc (AK/SN). Park industrije w Čornej Pumpje chcedźa do wuchodneho směra powjetšić. K tomu je so regionalny přewodźacy wuběrk Łužiskeho rewěra (RBA) wčera, srjedu, na swojim sedmym posedźenju wuznał. Wón wobkrući projekt změny strukturow „Park industrije Čorna Pumpa rozšěrjenska płonina juh“. „Nam dźe wo wuměnjenja planowanja a wo wotkryće. Perspektiwisce maja nowe dźěłowe městna w industriji nastawać“, podšmórny Zhorjelski krajny rada dr. Stephan Meyer (CDU), kotryž je lětsa předsyda RBA, po posedźenju. Wuběrk so z dohromady 12 projektami zaběraše, kotrež maja cyłkowny wobjim 171 milionow eurow. Někak 140 milionow eurow ma z nich Zwjazk z pomocu zakonja k zesylnjenju strukturow spěchować. Jědnaće projektow je RBA wobkrućił.
