Bjez wokołopućow zaměr docpěli

srjeda, 21. měrca 2018 spisane wot:

Bjez wokołopućow su wučomnicy Wojerowskeje towaršnosće za wu- a dalekubłanje (GAF) swój zaměr docpěli. Njedawno su tam jědnaće wučomnikow a dweju překubłancow z wukubłanja wuwjazali. Jedyn z prěnich gratulantow bě nowy jednaćel GAF Torsten Eckelmann, kiž zastojnstwo wot noweho lěta wukonja.

Minjene lěta wukubłachu so młodostni w zawodach z dołhej tradiciju, tak na přikład w Kamjenjanskej kaolinowni a w Bóščanskej Zeibinje.

Ze wšěch zawodow su zastupjerjo na wuwjazanje swojich wučomnikow do Wojerec přijěli. Mjez nimi běchu tež wučerjo Běłowodźanskeho powołanskošulskeho centruma, hdźež je wjetši dźěl młodostnych swoje teoretiske wukubłanje absolwował. Wšitcy dźě mějachu zhromadny zaměr, zo wučomnicy swoje wukubłanje wuspěšnje zakónča, štož je so poradźiło.

Tež Serbja tema na wikach ITB byli

wutora, 20. měrca 2018 spisane wot:

Hornja Łužica je jedna z najmnohotnišich dowolowych regionow Němskeje. Wo tym móžachu so wopytowarjo njedawneje Mjezynarodneje turistiskeje přehladki w Berlinje přeswědčić. Tradicije a nałožki Serbow běchu tam tohorunja tema.

Budyšin (SN/BŠe). Dobre hospodarske połoženje w Němskej stara so wo dobru naladu mjez ludźimi. Znajmjeńša začuwachu to zarjadowarjo lětušeje Mjezynarodneje turistiskeje přehladki (ITB) w Berlinje. Hladajo na 110 000 fachowych a dalšich 60 000 priwatnych wopytowarjow běchu organizatorojo z ličbu a wothłosom přewšo spokojom.

W sakskej hali prezentowaše so mjez druhim Marketingowa towaršnosć Hornja Łužica-Delnja Šleska (MGO). Sobu we wačoku měješe hnydom tři nowe tematiske turistiske wudźěłki – Kulturnowotkrywanski kraj, Dźěćaca dožiwjenska krajina a dźiwowpołna kónčina. Wosebity wjeršk wikow bě spožčenje myta Złotych měšćanskich wrotow. We wubědźowanju docpě imageowy film hornjołužiskeho zwjazka šesćiměstow z mjenom „Wotkrywanske města w Hornjej Łužicy“ druhe městno w kategoriji region.

Kamjenc (SN/mwe). Kamjenska měšćanska biblioteka chce „Serbski róžk“ z knihami a dalšimi medijemi za Serbow a za tych, kotřiž so za nich zajimuja, zarjadować. To zdźěli Thomas Käppler, referent Kamjenskeho wyšeho měšćanosty a nowinski rěčnik města, Serbskim Nowinam na naprašowanje. „To so přichodnje stanje, wosebje hladajo na dźěćacu literaturu. Bohužel je próstwa Załožbje za serbski lud wo financne spěchowanje serbskorěčnych titlow zwrěšćiła. Wopodstatnili su wotprajenje z pokiwom, zo słušeja wulke dźěle Kamjenca k serbskemu sydlenskemu rumej, tak zo Lessingowe město w tym padźe spěchować njemóža“, Käppler wuswětli. Nětko chce to město Kamjenc ze swójskimi srědkami po małych krokach realizować.

Nowa sezona zahajena

pjatk, 16. měrca 2018 spisane wot:

Dźiwaja na wjace dwurěčnosće a serbske poskitki w parku błudźenkow

Wochozy (CK/SN). Swoju 15. sezonu je wčera Wochožanski park błudźenkow zahajił. Za to su tam na małej žurli wopytowarskeho centruma wustajeńcu „W holi – Serbskosć na nasypje“ wotewrěli. Lěta 2012 wot Budyskeho Serbskeho muzeja koncipowana přehladka pokazuje proces přewróta we łužiskej holi. Tehdy, tak rjekny Manfred Hermaš, njeby jeho nichtó přerěčeć móhł, lawdaciju přednjesć. Přejara běchu wo brunicu wojowali. „Mjeztym smy so w Slepjanskim regionje nowym wuměnjenjam přiměrili a za serbskosć w Slepom něštožkuli docpěć móhli“, rozłoži župan župy „Jakub Lorenc-Zalěski“. Podpěra Swobodneho stata Sakskeje a Zwjazka pak je dale trěbna. „Dźensa njesteji jeno přichod Serbow na hračkach, ale cyłeje Łužicy“, Hermaš wuzběhny. Wo hudźbne wobrubjenje postara so Slepjanski serbski dźěćacy chór. Dalšu wustajeńcu přihotuja wo serbskim žiwjenju we Wochožanskej wosadźe.

Za zwoprawdźenje swojich idejow

srjeda, 14. měrca 2018 spisane wot:

Wojerecy (SN/BŠe). Swoje ideje we wjesnej kónčinje zwoprawdźić njeje stajnje lochko, wosebje hladajo na financowanje. Program Leader móže ideje ludźi podpěrać. Wot spočatka měrca Leaderowy region Łužiska jězorina 8. raz zajimcow namołwja, so wo spěchowanske srědki požadać. Cyłkownje 1,2 milionaj eurow stej k dispoziciji. Za spěchowanje projektow we wobłuku rybarstwa je přidatnje 325 000 eurow zaplanowanych.

Móžnosće financneje podpěry priwatnych a komunalnych předewzaćow su wšelakore. Mjez druhim hodźa so naprawy zawěsćenja twarjenjow, rozšěrjenja abo přisydlenja předewzaćow kaž tež wuwiće turistiskich poskitkow pjenježnje spěchować. W Němcach nasta loni z podpěru Leader dowolowy dom z třomi by­dlenjemi, z čimž bu poskitk wot lěta 1993 wobstejaceho hosćenca rozšěrjeny.

Rjemjeslnicy bychu ćerpjeli

póndźela, 12. měrca 2018 spisane wot:

Debata wo zakazu dieselowych awtow zaběra předewšěm małe zawody

Drježdźany/Düsseldorf (SN). Diskusija wo planach, dieselowe awta w němskich wulkoměstach zakazać, njezaběra jenož šoferow dieselowych wosobowych awtow, ale předewšěm tež rjemjeslnikow.

„Zakaz wužiwanja dieselowych awtow je drje po tuchwilnych zakonjach zasadnje móžny, wšako je to Zwjazkowe zarjadniske sudnistwo we wusudźe wobkrućiło“, piše Jörg Dittrich, prezident Drježdźanskeje rjemjeslniskeje komory. Wón pak na to skedźbnja, zo wšak su tež wuwzaća za rjemjeslniske předewzaća předwidźane. Najebać to wusud debatu wo tajkich jězdźidłach dale přiwótřa. Dittrich w tym zwisku warnuje: „Dokelž je tójšto wuchodoněmskich rjemjeslnikow z dieselowymi jězdźidłami po puću, by zakaz tutych awtow předewšěm małe přede­wzaća masiwnje potrjechił.“

Wjace wučomnikow hač loni wuwjazali

póndźela, 12. měrca 2018 spisane wot:

Budyšin (CS/SN). Budyske wokrjesne ­rjemjeslnistwo je njedawno wučomnikow w powołanjach mechanikar připrawow, metalotwarc a elektronikar ­swjatočnje wuwjazało a jim rjemjeslniske wopisma přepodało. Najlěpši z nich smědźachu, ­zastupujo wšěch tamnych, karančk piwa z wokrjesnym rjemjeslniskim mištrom Frankom Scholzu a wyšimi mištrami zjednoćenstwow wupić.

Cyłkownje 42 wučomnikow dósta w Budyskim Dźiwadle na hrodźe swoje wuswědčenje. Ličba je so tuž porno lońšemu, hdźež běchu 31 młodych ludźi wuwjazali, powjetšiła. Mjez młodostnymi, kotřiž su po połštwórta lěta swoje wukubłanje zakónčili, bě tež Anne-Marie Schmidt z Rěčic. Wona smědźeše swoje wukubłanje na rěznisku předawarku wuběrnych wukonow dla poł lěta prjedy skónčić.

Składnosć wužiwali?

štwórtk, 08. měrca 2018 spisane wot:
Powołanske wiki skića młodostnym składnosć, so z fachowcami wo swojich powołanskich předstawach rozmołwjeć. Wjac hač 80 wustajerjow měješe wčera w Kamjencu wobšěrny poskitk spřihotowany. Hač metalotwarc, šwalča, škleńčer, zawěsćenska překupča atd. – wuběr bě wulki. Jako pak so z młodostnymi wčera rozmołwjach abo jich wobkedźbowach, sym pytnyła, zo nimaja mnozy žanu předstawu wo swojim přichodźe. Ći jedni rozmysluja, hač chcedźa tola abituru złožić, kotraž zmóžnja jim studij. Dalši chcedźa na polu digitalizacije a nowe medije dźěłać. Někotři pak wužiwaja wiki jako orientaciju, štož mam za spomóžne. Zajimcow z konkretnymi předstawami sym mało dožiwiła. Přiwšěm so nadźijam, zo je so próca wustajerjow a organizatorow wudaniła a zo móžachu tomu abo tamnemu šulerjej rozsud wolóžić abo znajmjeńša powołanski směr pokazać. Bianka Šeferowa

Zjednoćenstwo sakskeho hospodarstwa (VSW) je bywšeho ministerskeho prezidenta Stanisława Tilicha z čestnym mytom wuznamjeniło a tak jeho wjelelětne skutkowanje kaž tež zasłužby za sakske hospodarstwo a Swobodny stat Saksku hódnoćiło. Prezident VSW dr. Jörg Brückner (naprawo), kiž myto přepoda, wuzběhny mjez druhim angažement Stanisława Tilicha při pěstowanju hospodarskich stykow z Ruskej, ale tež za wotkryće chinskich wikow. Kaž VSW zdźěli, chce Tilich mytowanski pjenjez 10 000 eurow přewostajić dźěćacemu hospicej Wutroba mjedwjedźa w Lipsku, klóštrej Marijinej hwězdźe a wosadźe Łuty-wjes. Foto: Kathleen Pfennig

Z wotmachom hotuja so w Genfje na lětuši Mjezynarodny awtowy salon, kotryž zajutřišim, štwórtk, wotewru. Na nim pokaza 180 wustajerjow cyłkownje 900 modelow. Mjez druhim prezentuja tam nowu „přezpólnu“ Škodowku Vision X. Wažna tema ­budu diskusija wo dieselowych awtach a hrožace cła za wuwoz europskich jězdźidłow do USA. Foto: Uli Deck/dpa

nawěšk

nowostki LND