Stróža (SN/at). Z nowymi studentskimi projektami stej zarjadnistwo biosferoweho rezerwata Hornjołužiska hola a haty a Wysoka šula za naslědne wuwiće w Ebers­waldźe (HNEE) swoje zhromadne dźěło lětsa dale wjedłoj. W jednym su štyri studentki styki mjez zarjadnistwom rezerwata a serbskimi wuměłskimi a kulturnymi institucijemi přepytowali. Wjeršk bě dźěłarnička w Stróžanskim Domje tysac hatow, na kotruž běchu Maria Fleckenstein, Pia Hartz, Jessica Lipinski a Laura Vogt 28 serbskich resp. šulskich zarjadnišćow, towarstwow a zjednoćenstwow přeprosyli. „Wothłós na naše přeprošenje bě skerje skromny“, so Laura Vogt diplomatisce wupraja. Studentki witachu pjeć zastupjerjow a zastupjerkow, mjez druhim serbskeje załožby, domizniskeho towarstwa Radiška, Serbskeho sejma, towarstwa Krabatowy młyn a Maćicy Serbskeje. Dokelž bě zarjadnistwo biosferoweho rezerwata temu za wobdźěłanje poručiło, wobdźěli so tež nawoda Torsten Roch.