W Leaderowym regionje Hornjołužiska hola a haty (OHTL) je wjele angažowanych towarstwow, kotrež dobru zhromadnosć pěstuja. Tole dopokazachu zjednoćenstwa we wobłuku wubědźowanja Leaderoweje kónčiny.

Njebjelčicy (SN/BŠe). „W kónčinje Hornjołužiskeje hole a haty móžemy na čestnohamtsce skutkowace towarstwa twarić. Bjez tajkich njemóhli telko za region docpěć“, wuzběhny minjeny pjatk Rakečanski wjesnjanosta Swen Nowotny (CDU) w Njebjelčicach. Tam je towarstwo Leaderoweje kónčiny cyłkownje 18 projektowych idejow zjednoćenstwow wuznamjeniło. Prěnje městno, a z tym 5 000 eurow je Njebjelčanska młodźina dóstała. We wobłuku wjesneho swjedźenja, chcedźa woni inkluziski rejowanski wječor z mjenom „Danci“ přewjesć. Zhromadny swjedźeń ze zbrašenymi ma tomu přinošować, zo ludźo inkluziske dźěło zeznaja a strachi přewinu.