LBMV chce mjez składowanskim basenkom Łaz II a Sprjewju škitnu murju twarić. Tale naprawa je za přichod wažny stołp za mjenje zežołćenu Sprjewju, zhonichu na njedawnym wuradźowanju Łužiskeho kruha w Baršću.

Baršć (AK/SN). Wobběh wody we Łužicy renaturěrować je daloko sahacy proces, zwjazany z mnohimi naprawami. To je Gerd Richter, nawoda wobłuka LMBV saněrowanje we Łužicy, njedawno čłonam Łužiskeho kruha w Baršću rozłožił. Richter skedźbni na dwaj lětdźesatkaj dźěłacu centralu za napjelnjenje z wodu w Złym Komorowje. „Priority smy jasnje z krajemi wothłosowali“, rjekny wón. Aktualnje je hraničny wodowy staw w jězorach docpěty. Při Sedličanskim jězoru su geotechnisce trěbny wodowy staw 98,4 metrow docpěli. To zmóžnja dalše saněrowanske dźěła wukonjeć a kanal twarić. Hraničny wodowy staw leži tu mjez 98,2 a 98,5 metrami. Runje tak je Złokomorowski jězor z wodowym stawom 99 metrow derje pjelnjeny. Richter z toho wuchadźa, zo budźe to wuparjenja dla w lěću tróšku woteběrać. „W cyłku smy z pjelnjenjom w nalěću jara spokojom.“