Wojerecy (AK/SN). Něhdźe dźesać milionow eurow je Wojerowska bydlenjotwarska towaršnosć (WGH) loni inwestowała. Tamniše ćežišća běchu nowotwar, modernizacija a saněrowanje. To zdźěli jednaćel Steffen Markgraf w swojej bilancy za lěto 2021. Jedne z wulkich předewzaćow bě bydlenski park na Paula Ehrlichowej, kotryž twarja wot lěta 2019. Mjeztym su tři wjacebydlenske domy hotowe, štwórty dokónča w druhim kwartalu 2022. W kóždym domje je wosom bydlenskich jednotkow. Do wudźeržowanja wobstejacych bydlenjow su 4,4 miliony ­eurow inwestowali. Hłownje zatwarichu lifty a wotstronichu barjery, z čimž su bydlenja atraktiwniše za seniorow a swójby.

WGH móžeše loni na 30. róčnicu wobstaća zhladować. Při tej składnosći su na 30 městnach města nowe ławki nastajeli. Towaršnosć je najwjetši přenajer bydlenjow we Wojerecach. Dohromady maja 7 415 bydlenskich jednotkow, 249 přemysłowych jednotkow a 192 garažow. 86 procentow wšeho wobstatka je pře­na­ja­tych. Po informacijach Steffena Mark­grafa něhdźe tysac bydlenjow prózdnych steji. Zdźěla chcedźa je wottorhać, tak ­na Bachowej a Händelowej.

Turistiska bilanca Marketingoweje towaršnosće Hornja Łužica-Delnja Šleska (MGO) 2021 wujewja porno předlětu jasny deficit. Přiwšěm branša optimistisce do přichoda zhladuje.

Budyšin (SN/bn). „Loni smy najniši dypk docpěli. To so nam hišće raz njestanje“, zjima jednaćel MGO Olaf Franke wčera we wobłuku nowinarskeje rozmołwy w Budyskim krajnoradnym zarjedźe. Hač do nowembra 2021 zwěsćichu we wo­krjesomaj Budyšin a Zhorjelc dohromady nimale poł miliona přenocowanjow mjenje hač w času do pandemije, štož wučinja cyłkowny minus něhdźe 60 milionow eurow. Wot awgusta do kónca oktobra 2021 pak je mnóstwo tu knihowanych nóclěhow inkluziwnje campinga wo 7,2 procentaj rozrostło, štož je turistikarjam dobre znamjo do přichoda.

Tradiciske předewzaća, kaž Budyske Eule-pišćeletwar, bědźa so ze samsnymi problemami kaž kóždažkuli druha firma tež. Je ćežko zdobyć za naročne dźěławosće derje wukubłanych fachowcow. Jedyn puć je swójske wukubłanje. Hdyž zajimcow z wulkej prócu wukmanješ, sej wosebite zakłady wšelakich rjemjeslniskich přemysłow teoretisce a praktisce přiswojić, maja woni wězo dobre šansy na krute přistajenje. Wšako maja trěbne znajomosće. ­Ze stron předewzaća nałožowana próca so na kóždy pad wudani. Zo su pjećina tuchwilnych dźěławych Budyskeje pišćele­twarskeje firmy młodźi ludźo we wukubłanju, skerje wo tym swědči, zo njetrjebaš so specifiski powołanski dorost nastupajo na swobodne wiki zepěrać. A hišće něšto napadnje, štož rěči za firmowu filozofiju, zawěsćić sej fachowcow: Předewzaće z kupcami ze wšeho swěta je hladajo na personal mjezynarodnje nastajane. To renomej tradiciskeho zawoda w Budyšinje přidatnje powjetša. Axel Arlt

Budyšin (SN/BŠe). W někotrych němskich nowinach kopja so nawěški, z pomocu kotrychž ludźo ze strowotniskeho wobłuka nowe dźěłowe městno pytaja. Tež w minjenym wudaću tydźenika Oberlausitzer Kurier bě cyła strona z nawěškami pjelnjena. Inseraty mějachu přewažnje samsny wobsah: chorobna sotra/hladarka atd., nješćěpjena, pyta wot 16. měrca nowe wužadanje. Redaktor rozhłosa RBB Andreas Rausch je so z nawěškami rozestajał a 18 razow spytał pod podatym telefonowym čisłom někoho docpěć. Ani jenički telefonat pak njemóžeše z potrjechenej wosobu wjesć, kaž wón w internetnej syći Twitter zwurazni, mjenujo inseraty falšowane.

Z naprašowanja SN w redakciji tydźenika wuchadźa, zo je najwjac kupcow swoje nawěški online zapodało. Płaćizna za tajki wučinja jědnaće do 20 eurow. W zwisku z přepruwowanjom njejsu zamołwići lokalneje nowiny žane njedostatki hladajo na wobchodniske wu­měnjenja, zakonske abo zarjadniske postajenja zwěsćili. „Jenož mało inseratow měješe direktne politiske wuprajenje, ­čehoždla je wotpokazachmy“, rěka w oficialnej zdźělence redakcije.