Budyšin (SN/AN). Na přeprošenje społnomócnjeneje za serbske naležnosće w Budyskim wokrjesu Haleny Jancy­neje, schadźowaše so wčera na krajnoradnym zarjedźe w Budyšinje zamoł­wity dźěłowy kruh za serbske nalež­nosće.

Gremij diskutowaše wo strukturje a nutřkownym rjadowanju dźěłoweho kruha. Sobustawojo buchu namołwjeni, informacije wo aktualnym stawje dźěławosće gremija zběrać, kotryž budźe na jednym z přichodneju zetkanjow hłowna tema. Wospjet namjetowachu přitomni čłonojo a čłonki, zo měł so wuběrk wutworić. Dale informowaše Halena Jancyna wo stawje planowanja projekta kolesowarskeje čary „serbske impresije“, kotryž je w zamołwitosći towarstwa Serbskeho kulturneho turizma a kotryž ma Hornju a Delnju Łužicu přez kolesowarsku čaru zwjazać. Tež wo ličbje wuknjacych serbskeje rěče wuradźowachu­ a lětuše hłowne předewzaća wobzamknychu: wudźěłać konkretne naprawy, kiž dopomhaja dalewuwiću a spěchowanju serbskeje rěče we wokrjesu.

Wědomosć a hospodarstwo we Łužicy hišće bóle hromadźe dźěłatej. Wo tym swědči wčera w Choćebuzu podpisane kooperaciske zrěčenje mjez uniwersitu a wažnym předewzaćom Němskeje.

Choćebuz (SN/BŠe). Němska železnica (DB) a Braniborska techniska uniwersita (BTU) Choćebuz-Zły Komorow stej wčera ramikowe kooperaciske zrěčenje wo intensiwnym zhromadnym dźěle za sylne železniske a kubłanske stejnišćo Choćebuz podpisałoj. Partneraj chcetej so we wobłukach studij, wučba a slědźenje na BTU kaž tež nastupajo temje perspektiwy za přistajenje a přihot na powołanje studowacych hišće sylnišo splesć a zhromadnje jednać.

Z kooperaciju chce BTU přidatnych studowacych do Choćebuza wabić, wosebje w tak mjenowanych MINT-předmjetach (matematika, inženjerske a přirodowědne kaž tež technika). DB budźe studowacym powołanske perspektiwy w železniskej branši a nowej tworni ICE w měsće wotbłyšćować a móžnosće za dalše powołanske móžnosće pokazować.

Halštrowska Hola (SN). Po zawrjenju zawoda Maja w Kulowje loni nazymu (SN rozprawjachu) zwosta dalše wukubłanje wučomnikow wotewrjene. Nětko su nowu powołansku domiznu namakali. Woni wukubłuja so w zawodźe PEWO Energietechnik w Halštrowskej Holi. Dohromady 30 wučomnikow tam tuchwilu maja, zdźěli rěčnik zawoda. Po jeho wuprajenjach steja šansy za dalše powołanske wuwiće po zakónčenju wukubłanja dosć derje: „Šansy za přewzaće do zawoda, kotryž słuša do firmoweje skupiny Viessmann, su jara dobre“, dale rěka. Před krótkim hakle su štyrjo wučomnicy swoje wukubłanje w Halštrowskej Holi wuspěšnje zakónčili. Z nich třo w zawodźe zwostanu. Dohromady poskićuje PEWO wosom wukubłanskich směrow a tři dualne studijne směry. Prěnje rozmołwy ze zajimcami za nowe wukubłanske lěto hižo wjedu. Zawod PEWO Energietechnik produkuje klučowe elementy při zastaranju domskich z ćopłotu. Tuchwilu je 500 sobudźěłaćerjow w zawodźe přistajenych, kotrež wobsteji hižo wot lěta 1991 a produkuje na sydom městnach w Němskej a Awstriskej.

Kamjenica/Budyšin (SN/MiP). „W Sakskej su ličby bjezdźěłnosće w nowym lěće jasnje stupali“, to wozjewi šef regionalneje direkcije dźěłoweje agentury Klaus-Peter Hansen w nowinskej zdźělence, srjedu w Kamjenicy. W januarje bě w Sakskej 141 200 ludźi bjezdźěłnych registrowanych, nimale 7 procentow wjace hač loni w decembrje. Z tym je kwota bjezdźěłnosće w přirunanju z předměsacom wo poł procenta na 6,7 procentow stupiła.

W Budyskim wokrjesu je ličba bjezdźěłnych porno zašłemu měsacej wo 7,2 procentaj stupała. Corina Franke, zjawnostna rěčnica dźěłoweje agentury w Budyšinje, zdźěli na naprašowanje SN, zo je so ličba dźěłowych poskitkow we wokrjesu w tutym měsacu wo 193 znižiła. „To nima jenož sezonalne přičiny, ale zwisuje tež z hospodarskej situaciju. Předewzaćeljo su tuchwilu jara skedźbni, hladajo na nowe přistajenja“. Najebać to je we wokrjesu wjele dźěłowych městnow wakantnych, to pak su k 87 procentam městna za fachowcow. „Kóždy druhi z našich za dźěłom pytacych pak pyta městno za pomocnikow“ praji Corina Franke.