Drježdźany (SN). Drježdźanska rjemjeslniska komora je wurjadne naprašowanje nastupajo atraktiwnosć předewzaćelstwa přewjesć dawa. Jedyn z wuslědkow je: kóždy druhi předewzaćel w Sakskej wot­radźuje, so na puć do samostatnosće po­dać. „To je alarmowacy signal – za naše rjemjesło, ale tež za naše hospodarstwo scyła“, komentuje prezident Drježdźanskeje rjemjeslniskeje komory Jörg Dittrich tutón wuslědk. K najwjetšim wužadanjam liči 71 procentow předewzaćelow financielne rizika. Dwě třećinje předewzaćelow skoržitej přez wysoku měru běrokratije a třećina předewzaćelow mjenuje njerjadowane dźěłowe časy jako wužadanje. Nic naposledk poda 29 procentow naprašowanych wulku potrjebu fachowcow jako wužadanje, před kotrymž pospochi steja. Jörg Dittrich widźi nadawk, přićahliwosć předewzaćelstwa zwyšić, „jako dołhodobny, w kotrymž je wjele akterow zapřijatych.“ Hladajo na běrokratiju „pak widźu cyle jasnje stat w zamołwitosći“, wón praji a doda: „W přerězku nałožuje předewzaćel jedyn z pjeć dźěłowych dnjow za běrokratiju – zdźěla samo połojcu swojeho dźěłoweho časa.