Nalěćo je čas wikow. Přichodnu nje­dźe­lu změjemy hnydom dwě jubilejnej zarja­dowani. Tak přeprošuje Krabatowy mlokowy swět w Koćinje na burske wiki. Na Erlichtec dworje w Rěčicach pak změja zahrodowe wiki.

Koćina/Rěčicy (SN/BŠe). Regionalne wudźěłki su mjez kupcami jara prašane. Tomu je tež kóžde lěto na burskich wikach w Koćinje tak. Wjac hač 70 direktnych wikowarjow a rjemjeslnikow ze Sakskeje chce tam přichodnu njedźelu swoje wudźěłki prezentować. Star budźe bjezdwěla jubilejny twarožk, wšako zhladuja w Koćinje na mjeztym 10. burske wiki. Wulka a wosebita twarožkowa pokruta je z prěnich produkciskich dnjow pokazkoweje twarožkarnje Krabatoweho mlokoweho swěta. W Koćinje předźěłuja čerstwe mloko dejkow, kotrež na dworje plahu­ja, hnydom na twarožk abo dalše mlokowe wudźěłki. Jednotliwe wotběhi móža sej ludźo tam kóždy čas wobhladać. Mjeztym wopřijima sortiment twarožkoweje manufaktury něhdźe dwaceći družinow. Mjez nimi su speciality kaž „sušeny čorny młynk“. Tohorunja móža wopytowarjo wikow kreacije twarožka z domizniskich zelow woptawać.

Łužiska hospodarska iniciatiwa (WiL) je wčera wědomostne transferne myto spožčiła. Z mytom WiL wusahowace kooperacije mjez wědmosću a hospodarstwom hódnoća.

Carny Gózd (SN/BŠe). „Dźakuju so wšitkim wobdźělnikam, kotřiž su swoje projekty Łužiskej hospodarskej iniciatiwje zapodali. Kóždy jednotliwy projekt je dobry přikład za kooperaciju mjez wě­domosću a hospodarstwom we Łužicy. Wuběrneje kwality dla njebě rozsud jury jednory“, wuswětli jednaćel WiL Michael Schulz w Carnym Gózdźe (Schwarzheide), hdźež su wčera sedmy raz wědomostne transferne myto spožčili. Wšelakore wobsahi projektow pokazuja na wosebitu kwalitu kooperacijow.

Dobyćerjo su poprawom wšitcy, wšako předewzaća ze zhromadnym dźěłom z wědomostnymi institucijemi swoju kmanosć wubědźowanja skruća. Praktiske nazhonjenja w zawodach pak wobohaćeja wučbu uniwersitow a napjelnjeja wědomosć ze žiwjenjom.

„Łužica ma stawizny, kulturu a tradicije, kotrež měli ludźi zeznać“, zwurazni Sladana Stamenkovski. Minjeny tydźeń je sej Słowjenka wosebitosće łužiskeho Krabatoweho regiona bliže wobhladała, štož ma wězo swoju přičinu. Přichodnje budźe wona hłowna zamołwita za jězby po slědach Krabata alias Jana Šadowica nowozałoženeho pućowanskeho běrowa z mjenom Šadovic w Słowjenskej. Wot Chorwatskeje, přez Słowjensku, dale do Drježdźan a Łužicy móža zajimcy jeho žiwjen­ske stacije a region zeznać. „Tež wupućowarjow z Ameriki chcemy za jězby zdobyć. Na wosebite wašnje móža so ze swojim pochadom zaběrać“, Sladana Stamenkovski powěda. Wězo su tež jězby w napřećiwnym směrje móžne. Logistisce stej lětanišći w Berlinje a Zagrebje cilej za zahajenje jězbow. Krok po krok chce wona poskitki zdźěłać. Wiziju, zo docpěja pućowanja po slědach Krabata runinu wuznamnych europskich jězbow kaž na přikład do Barcelony wona z wočow njezhubi. Aktiwnje chce turistikarka přichodnje w socialnych syćach za poskitki wabić.

Lubnjow/Choćebuz (SN/at). Prěnje rozmołwy wo aktualizowanju zrěčenja wo přesydlenju Miłoraza su so minjeny pjatk a sobotu w Lubnjowje wotměli. Wo tym je hórnistwowe předewzaće LEAG wčera informowało. Wobdźěleni běchu zastupjerjo gmejny Trjebin z wjesnym dźělom Miłorazom, gmejny Slepoho jako přichodne přesydlenišćo a LEAG. Komunalny poradźowar Trjebina a Slepoho, bywši sakski minister nutřkowneho Klaus Hardraht je rozmołwy přewodźał.

Kaž bě dźensa z Miłoraza zhonić, su wjesnjenjo zazběh nowych jednanjow witali. Wochožanskeje jamy dla, kotraž wjes mjeztym k třom třećinam wobdawa, je so tam žiwjenski niwow jara pohubjeńšił. Po woprašowanju je so wjetšina wjesnjanow za přesydlenje wuprajiła.

Zakład rozmołwow je lěta 2013 dowujednane zrěčenje, tehdy z Vattenfallom, kotrež pak njebu podpisane. W Lubnjowje su wo wotškódnjenju za mějićelow a wotnajerjow kaž tež wo wotškódnjenju za přemysłowe a ratarske zawody rěčeli. Doskónčny wuslědk dotal docpěli njejsu, tohodla je dalše zetkanje předwidźane, po wšěm zdaću 4. a 5. meje.