Nimale 70 milionow eurow za Čornu Pumpu
Regionalny přewodźacy wuběrk Łužiskeho rewěra (RBA) je na swojim posedźenju wčera, dalši wutwar parka industrije w Čornej Pumpje, nimo dalšich projektow, wobkrućił.
Zhorjelc (AK/SN). Park industrije w Čornej Pumpje chcedźa do wuchodneho směra powjetšić. K tomu je so regionalny přewodźacy wuběrk Łužiskeho rewěra (RBA) wčera, srjedu, na swojim sedmym posedźenju wuznał. Wón wobkrući projekt změny strukturow „Park industrije Čorna Pumpa rozšěrjenska płonina juh“. „Nam dźe wo wuměnjenja planowanja a wo wotkryće. Perspektiwisce maja nowe dźěłowe městna w industriji nastawać“, podšmórny Zhorjelski krajny rada dr. Stephan Meyer (CDU), kotryž je lětsa předsyda RBA, po posedźenju. Wuběrk so z dohromady 12 projektami zaběraše, kotrež maja cyłkowny wobjim 171 milionow eurow. Někak 140 milionow eurow ma z nich Zwjazk z pomocu zakonja k zesylnjenju strukturow spěchować. Jědnaće projektow je RBA wobkrućił.
Na pochad Krabata dopominać
Kulow woswjeći „400 lět Janko Šajatović“
Swoje poslednje žiwjenske lěta je Janko Šajatović přewažnje we Łužicy skutkował. Wot lěta 1691 do 1704 bydleše wón na wuměnku we Wulkich Zdźarach. Chorwatski obrist Janko Šajatović (1624-1704), historiska wosoba, kotraž je mnohim awtoram zakład jich powědkow wo Krabaće, je we Łužicy daloko sahace slědy zawostajiła. Kulow dopomina wot 14. do 16. junija ze swjedźenskim kóncom tydźenja na 400. narodniny Šajatovića. Wo nastorku, motiwaciji a wobsahach je so Andreas Kirschke z koordinatorku Beatu Hufnagel rozmołwjał.
Što je motiw za město Kulow swjedźenski kónc tydźenja wuhotować?
B. Hufnagel: Krabata jako mytisku figuru mnozy ludźo znaja, Janka Šajatovića porno tomu pak wo wjele mjenje. Dźakowano Hansej-Jürgenej Schröterej, kiž je wo Šajatoviću slědźił, wěmy, zo je so wón jako historiska wosoba z protagonistom powěsćow stał. Na to chcemy přichodnje bóle dopominać.
Što zwjaza Šajatovića z Kulowom?
We Wojerecach nastanje dalša swětłownja za inowaciju
Wojerecy (AK/SN). We Wojerecach zamołwići zaměrnje na změnje hospodarskich strukturow dźěłaja. W bywšej produkciskej hali předewzaća Robotron w Ćiskowskim industrijnišću nastanje „Centrum za twarjenje a bydlenje“. Tam maja so nowe maćizny a technologije wuslědźić a za zasadźenje w praksy přepruwować. Nošer projekta je Łužiski technologiski centrum Lautech, kotryž dźěła wusko ze zwjazkowej inowaciskej syću „BauRaumWerk“ hromadźe. W industrijnišću ma mjez druhim zhotowjenska hala, labor, seminarna rumnosć a składźišćo za material nastać. Cyłkownje 5,8 miliony eurow naprawa płaći. 5,7 milion eurow spěchuje so ze zakonja za inwesticije we wuhlowych kónčinach. Łužiski technologiski centrum Lautech, wužiwar industrijoweje hale, tohorunja podźěl přewza.
Spěchowanje po modelu Samow
Změnu strukturow dale forcěruja
Čorna Pumpa (SN/BŠe). W sakskim dźělu industrijoweho parka w Čornej Pumpje so tójšto hiba. Za wuwiće stejnišća na mjezy do Braniborskeje je zaměrowy zwjazk spěchowanske pjenjezy dóstała. Z cyłkownje 28 milionami eurow z hornca inwesticiskeho zakonja za brunicowe regiony spěchuje sakske knježerstwo industrijnišćo. Wotpowědnu zdźělenku je zastupowaca předsydka zaměroweho zwjazka industrijoweho parka Christine Herntier zawčerawšim přiwzała. Kaž sakski minister za regionalne wuwiće wobkrući, móža so z pjenjezami ramikowe wuměnjenja polěpšić. Tak zmóžnja spěchowanje nakup nowych ležownosćow we wobjimje 368 241 kwadratnych metrow. Tohorunja ma so wobchadna infrastruktura polěpšić. Rozšěrjenje industrijoweho parka w Čornej Pumpje je jedyn z 15 projektow wobłuka hospodarsce bliskeje infrastruktury Łužiskeho rewěra.
Z nowej techniku młodźata wuchowaja
Ratarjo a hajnicy dźěłaja wokoło Radworja hromadźe a chcedźa mnohotnosć družinow zwěrjatow zachować
Z wulkimi mašinami jězdźa ratarjo po łukach a trawu syku. W nalěću do směra lěća pak je to za dźiwinu wulki problem. Łuki su wažny žiwjenski rum. Předewšěm sorny chowaja swoje młodźata we wysokej trawje a so jim hdys a hdys přidruža a sornjatka zastaraja. Tohorunja škita wěsty přinarodźeny instinkt młodźata před njepřećelemi. Tak so wone při zwukach abo pohibach cyle hłuboko do trawy stłóča a njećeknu. Tohodla je ratarjo we wysokej trawje scyła nic abo jenož cyle ćežko wuhladaja. Wjele młodźatow tuž su wopory trawusyčakow.
LEAG wjesne srjedźišćo w Nowym Miłorazu přepodała
Přesydlenje Miłoraza chcedźa hač do kónca 2024 wotzamknyć. Wjes dyrbi so Wochožanskeje brunicoweje jamy dla wotbagrować. „To je poslednja w Němskej přesydlena wjes. Tu nastachu wuměnjenja za woprawdźite čiłe wjesne žiwjenje w přichodźe“, podšmórny dr. Philipp Nellessen, předstejićer LEAG za produkciju, sobotu při přepodaću noweho wjesneho srjedźišća.
Nowy Miłoraz (AK/SN). Areal wotkrywać su w juliju 2019 zahajili. Na 15 hektarach nastachu jednoswójbne chěže, wjesne srjedźišćo z domom wjesneje zhromadnosće, busowe zastanišćo, hrajkanišćo, drjewjana skulptura „Štom žiwjenja“ a swjedźenišćo. Na sewjernej kromje namakaš hódnoty dopominanja, kaž su to wojerski pomnik, „wjelči kamjeń“, „kamjeń hońtwjerskeho hrodu“ a drjewjany křiž „Protestantka“. Na třoch informaciskich taflach wujasnjeja stawizny Miłoraza wot prěnjeho naspomnjenja w lěće 1536, přesydlenišćo Miłoraz kaž tež wjesnu strukturu ze žiwjenjom tam. Na zapadnej kromje steji dźensa zwónica. Nimo njeje dopominaja tež tři dróhi „Nawjes“, „Puć na hońtwjerski hród“ a „Při nasypje“ na prjedawši Miłoraz.
Mjenje mrětwy a tohodla wolóženja
Zhorjelc/Budyšin (SN/BŠe). Prěni króć po wudyrjenju afriskeje swinjaceje mrětwy w Zhorjelskim wokrjesu su zamołwići postajili, zawěranske pasmo pomjeńšić. Wulke płoniny, na kotrychž njejsu ludźo abo hajnicy minjenych dwanaće měsacow abo dlěje žane pady mrětwy pola skoćatow zwěsćili, su změnjeny status dóstali. Potajkim so tam škitne postajenja změnichu. To potrjechi předewšěm wobłuki zapadnje zwjazkoweje dróhi B178 wot Lubija do Žitawy a mjez Žitawu a Oybinom. We wotpowědnych kónčinach zamołwići wobmjezowanja za ratarjow, lěsnikow a hajnikow wolóža.
Tež Budyski wokrjes je wolóženja připowědźił. Wo kotre kónčiny so dokładnje jedna, njebě hišće cyle jasne. Hač do redakciskeho kónca njeje zdźělenka hišće předležała.
Za symboliske wotškódnjenje pólskich woporow wójny
Uniwersita prof. dr. Klausa Ziemera z 23. Mytom Viadriny počesćiła
Europska uniwersita Viadrina je w Frankfurće nad Wódru štwórtk tydźenja prof. dr. Klausa Ziemera, němskeho politiskeho wědomostnika a bywšeho direktora Němskeho historiskeho instituta we Waršawje, z 23. Mytom Viadriny počesćiła. Přez lětdźesatki hižo je Ziemer jako fachowc a wuběrny analyst němsko-pólskich poćahow znaty.
Spěchowanje za łužiske předewzaće
Firma KARA Service tzwr w Běłej Wodźe je so mjez druhim na zatwar tepjenjow kaž tež připrawow za klimatizaciju specializowała. Póndźelu je Thomas Kralinski, sakski statny sekretar za hospodarstwo, dźěło a wobchad jednaćelej łužiskeho předewzaća spěchowanske pjenjezy přepodał.
Běła Woda (SN). 522 000 eurow je cyłkowna suma spěchowanskich pjenjez, kotryž je jednaćel předewzaća Milko Kara z rukow statneho sekretara Thomasa Kralinskeho přijał. Łužiske předewzaće ze 17 sobudźěłaćerjemi swjeći lětsa swoju 40. róčnicu wobstaća. Wone planuje přećah zawoda a zdobom rozšěrjenje kapacitow. Do rozšěrjenskeho projekta chce Kara Service tzwr dohromady 1,3 miliony eurow inwestować.
