Dalšimaj projektomaj přihłosowali
Drježdźany (SN/at). Sakska móže dalšej projektaj za strukturnu změnu we łužiskim brunicowym rewěrje zwoprawdźić. Kaž statne ministerstwo za regionalne wuwiće wčera w Drježdźanach zdźěli, je Zwjazkowy zarjad za hospodarstwo a kontrolu wuwožowanja póndźelu poslednimaj dotal njewobkrućenymaj krajnymaj projektomaj „InnoCarbEnergy“ a „WALEMObase“ přihłosował. Přisłušny statny minister Thomas Schmidt (CDU) wjeseli so, „zo móžemy nětko tež wonej projektaj dale wjesć“. K hižo schwalenym předewzaćam słuša Serbski centrum wědy na Lawskim arealu w Budyšinje.
Z projektom „InnoCarbEnergy“ nastanje na milinarnjowym stejnišću LEAG w Hamorje po cyłej Europje jónkrótny a po wšěm swěće třeći slědźenski centrum za po kóštach přihodne, po měrje produkowane a „zelene“ karbonowe nitki. Na projekće wobdźělene su ekscelencny cluster MERGE „Fuzija technologijow za multifunkcionalne lochkotwarske struktury“ TU Kamjenica, Fraunhoferskej institutaj za gratowe mašiny a přeformowansku techniku a za nałožene slědźenje polymerow.
Wukubłanske wiki polěpšene
Koronapandemija bě tym, kotřiž na wukubłanskich wikach skutkuja, wosebite wužadanje. Najebać to je Budyska wotnožka zwjazkoweje agentury za dźěło wo tym informowała, zo je 98 procentow młodostnych, kotřiž běchu so we wukubłanskim lěće 2020/2021 za powołanske poradźowanje přizjewili, wukubłanje abo alternatiwu našło.
Teritorije a ličba wjelkow přiběrali
Sakski krajny wobswětowy zarjad je wčera wuslědki monitoringoweho lěta 2020/2021 wo wjelkach wozjewił. Tak zwěsćeja, zo jenož ličba wjelkow njepřiběra, ale zo je tež wjac teritorijow, w kotrychž je rubježnik doma.
Drježdźany (SN/JaW). W Sakskej je ličba wobkrućenych wjelčich teritorijow na 34 rozrostła. To su tři wjac hač před lětom, kaž z wuslědkow monitoringoweho lěta 2020/2021 wuchadźa, kotrež je Sakski krajny zarjad za wobswět, ratarstwo a geologiju (LfULG) wčera wozjewił.
Ze Sprjewje žanu wodu njebrać
Choćebuz (SN/at). Ze swětłowej instalaciju na Sprjewi je Choćebuska wobswětowa skupina předwčerawšim přećiwo planowanemu trajnemu branju wody z rěki za Janšojsku milinarnju protestowała. Na powjerch wody buchu słowa „Tale woda słuša do Błótow – nic do chłódźenskeje wěže!“ projicěrowane, kaž Zelena liga wčera informowaše. Ze swojej akciju žadachu sej škitarjo wobswěta wot braniborskeho knježerstwa, zo so wone planam zmilinjenja brunicy LEAG wotrjeknu. Předewzaće je próstwu stajił, směć wodu ze Sprjewje brać, zo by ju w Janšojskej milinarni jako chłódźensku wodu wužiwało. To je wuslědk dohlada Zeleneje ligi do aktow w braniborskim krajnym zarjedźe za wobswět. Hinak hač při zapławjenju bywšich brunicowych jamow směła milinarnja samo při niskej wodźe rědku wodu ze Sprjewje brać, rěka w zdźělence wobswětoškitarjow.
„Sprjewja trjeba přichodnje kóždy kubikny meter wody. Nětko tež hišće Sprjewinu wodu w milinarni wuparjeć, by njezamołwite było“, kritizuje Renej Šuster ze zwjazkoweho kontaktnišća brunica Zeleneje ligi.
Pod přerězkom
Budyšin (SN/JaW). Dźěłarnistwo Cyrobizny, požiwadła a hosćency (NGG) kritizuje špatne mzdy w hotelach a hosćencach. Kaž NGG wčera medijam zdźěli, njezadźiwa, zo dale a bóle fachowcy pobrachuja. „Hdyž přistajeni w hotelownistwje a gastronomiji w Budyskim wokrjesu 30 procentow pod přerězkom zasłužeja, njesmě so nichtó dźiwać, zo sej za čas koronakrizy nowe dźěło pytaja. Mnozy wšak dyrbjachu měsacy dołho z pjenjezami z krótkodźěła wuńć, někotři přeco hišće. To su wulke straty při hižo niskich dochodach“, zwurazni jednaćel wotnožki NGG Drježdźany-Kamjenica Thomas Lißner.
Braniborsku jězorinu chcedźa dale wuwić
Tornow (AK/SN). Zaměrowy zwjazk Łužiska jězorina Braniborskeje liči lětsa z tójšto mjenje wopytowarjemi a přenocowanjemi hač loni. To pokazuje mjezybilanca, wozjewjena 30. septembra. Jako hłownu přičinu mjenuje předsyda zwjazka Detlev Wurzler koronapandemiju, kotraž wobćežuje korčmarjow kaž tež wobsedźerjow hotelow a pensijow. Hač do kónca septembra 2020 wopyta něhdźe 49 000 hosći jězorinu, lětsa bě jich z 43 000 wo 13 procentow mjenje. Tež ličba přenocowanjow wot 231 000 (2020) na 217 000 (2021) je wo sydom procentow spadnyła.
Kniha wo hosćencach zajim zbudźiła
Wjace ćahow do Drježdźan
Drježdźany/Kamjenc (SN/at). Z płaćiwosću noweho jězbneho plana wot 12. decembra zastopnjuja železniski zwisk Drježdźany–Kamjenc jako liniju měšćanskeje železnicy S 8. Wo tym wobchadny zwjazk Hornje Łobjo (VVO) dźensa informuje. Wosebje dojězdźowarjam pomha, zo jězdźa ćahi potom do wobeju směrow wot póndźele do pjatka rano w času wot 4.30 do 8.30 hodź. a popołdnju mjez 14 a 18.30 hodź. w połhodźinskim takće, město dotal kóždu hodźinu. Stopnjowany takt ćahow, wobšěrnje modernizowana infrastruktura z bjezbarjernymi nastupišćemi, ze zwiskom k lokalnym busowym linijam a ze šěsć parkowanišćemi wuskutkuja, zo wotpowěduje čara Drježdźany–Kamjenc nětko standardej měšćanskeje železnicy.
Zapisane je lěpše železniske přiwjazanje Lessingoweho města na krajnu stolicu w nowym zrěčenju za dieselowu syć VVO, kotrež stej VVO a DB Regio dźensa w Kamjencu podpisałoj. Tale syć rozrosće wo nimale 0,3 miliony na wobjim dweju milionow ćahowych kilometrow. Přidatne srědki tež za čaru do Kamjenca přewostaji sakske ministerstwo za wobchad.
Wobšudnicy z e-mailemi łakaja
Ludowa banka: Porsty preč wot wopačneho digitalneho serwisa
Budyšin (mwe/SN). „Změnimy našu polisu“, „Změna wužiwanskich wuměnjenjow“ abo „Wažne wozjewjenje“ – to su jenož někotre nadpisma mejlkow, kotrež pječa Ludowa banka tele dny wužiwarjam swojich posłužbow sćele. Su pak to dospołnje njeseriozne mejlki, kotrež njeměli adresaća božedla z wotpowědnym klikom na přikazane městno wočinić. Wobšudnicy z tak mjenowanymi phishingowymi e-mailkami łakaja, zo bychu ludźom pjenjezy z kapsy ćahali.
Při tym so wopačny digitalny serwis Ludoweje banki dosć rjenje a serioznje čita. „Noweje EU-reformy dla dyrbimy wužiwarjow našich posłužbow wo nowe přizwolenje prosyć“, w tajkej mejlce mjez druhim rěka. A z „Přijomny dźeń a najlěpše postrowy – waš serwis Ludoweje banki“ so informacija kónči. Wšitko pak wěrno njeje, a kóždy, kiž na to skoči, sebi samomu škodźi.
