Strowa struktura hospodarstwa po brunicy trěbna
Zwjazkowy hospodarski minister Robert Habeck (Zeleni) chce, zo tež we wuchodnej Němskej prjedy hač w lěće 2038 ze zmilinjenjom brunicy kónča. Jeho stronski kolega a sakski wobswětowy minister Wolfram Günther wočakuje ekonomiski ćišć na předewzaća tónle krok hić. Sakscy rjemjeslnicy žadaja sej w tymle procesu prioritu za strowu strukturu hospodarstwa.
Berlin/Drježdźany (SN/at). Móžnosć dočasneho kónca zmilinjenja brunicy hač do lěta 2030 su Zeleni w koaliciskim zrěčenju z SPD a FDP přesadźili. Po rozrisanju naležnosće w Sewjerorynsko-Westfalskej (NRW) chce zwjazkowy hospodarski minister Robert Habeck nětko Braniborsku, Saksku a Saksko-Anhaltsku k tomu pohnuwać. Wón na to skedźbni, zo měli wšitcy wobdźěleni tajki wustup w konsensu dojednać.
Snadny přirost bjezdźěłnosće
Budyšin (SN/at). Bjezdźěłnosć we wuchodnej Sakskej je loni w decembrje moderatnje přiběrała. Wo tym Budyska wotnožka Zwjazkoweje agentury za dźěło dźensa informuje. Aktualnje je w mjenowanym regionje 17 985 bjezdźěłnych, 414 wjace hač hišće w nowembrje. Porno decembrej před lětom rozrost 1 089 ludźi wučinja. Aktualna kwota bjezdźěłnosće je 6,6 procentow.
Předsydka jednaćelstwa Budyskeje agentury za dźěło Kathrin Groschwald rěči wo „njezměnjenych stabilnych dźěłowych wikach“ we wuchodnej Sakskej. Wuskutki zymy běchu w decembrje 2022 miłe. Mnohe zawody so prócuja, zo bychu swojich fachowcow zdźerželi. Tak je so mjenje ludźi direktnje z dźěłoweho žiwjenja bjezdźěłnych přizjewiło hač w decembrje 2021. „Přiwšěm su dźěłodawarjo dale kedźbliwiši nowy personal přistajić.“
We wobłuku bjezdźěłnostneho zawěsćenja bě pola Budyskeje agentury za dźěło loni w decembrje 6 019 jako bjezdźěłnych registrowanych. We wobłuku zakładneho zawěsćenja mějachu pola jobcenterow Budyskeho a Zhorjelskeho wokrjesa w cyłku 11 966 bjezdźěłnych.
Kórki jako forma kurječka
Stary ćah z nowym poskitkom
Mužakowska lěsna železnica po lětomaj korony zaso derje jězdźi
Běła Woda (AK/SN). Koronowych wobmjezowanjow zašłej lěće dla dyrbješe Mužakowska lěsna železnica ćežke časy přetrać, bilancuje jednaćel Heiko Lichnok. „2020 smědźachmy hakle spočatk meje sezonu zahajić, 2021 samo hakle kónc junija. Statnu koronowu pomoc pak dóstali njejsmy. Čas přetrali smy jeno z masiwnym lutowanjom“, wón zjima. Mjeztym zo mějachu do pandemije hišće 50 000 wopytowarjow, spadny jich ličba 2020 na 38 000 a lěto na to samo na 30 000. Lětsa je sezona normalnje jutry startowała. Po słowach jednaćela docpěja lětsa zaso ličbu 50 000 sobujěducych. „Jězbny plan za klětu je zdźěłany a wozjewjeny. Płaćizny dyrbjachmy hišće raz přiměrić“, praji Lichnok. Energijoweje krizy dla rozrostu wone wo něhdźe dźesać procentow.
Mjenje hromaka
Chcedźa pódlansku sezonu zesylnić
Turistiski zwjazk Łužiska jězorina z.t. je nowy marketingowy plan za lěto 2023 wozjewił. Po tutym su swójby dale hłowna cilowa skupina turistiskich poskitkow kołowokoło jězoriny.
Zły Komorow (AK/SN). „Zhladujemy z krutej dowěru do noweho lěta. Nowy marketingowy plan je zakład dźěła našeho towarstwa a skića dobry dohlad do našich planowanych marketingowych aktiwitow w lěće 2023. Z tym je wón wšitkim turistiskim akteram we Łužiskej jězorinje pomoc a orientacija“, tole rěčnica turistiskeho zwjazka Katja Wersch podšmórnje.
Klětu z dalšimi?
Wšelake wuwiće we Łužicy
Krajej Sakska a Braniborska stej tele dny statistiske wuhódnoćenje lěta 2021 nastupajo dźěłowe městna wozjewiłoj. W srjedźišću steješe wuwiće we wokrjesach. Za wokrjesy w Hornjej a Delnjej Łužicy je wuslědk rozdźělny.
Kamjenc/Podstupim (dpa/SN). W Sakskej běštej loni w přerězku něhdźe dwaj milionaj dźěłopřijimarjow přizjewjenej – 1 100 mjenje hač 2020. We wokrjesu Mišno na přikład je ličba dźěłowych městnow wo cyły procent woteběrała, Rudnohórski wokrjes a wokrjes Srjedźna Sakska slědowaštej z minusom 0,8 procentow. Porno tomu zwěsćeja za město Lipsk a wokrjes Sewjerna Sakska přiróst wo 1,1 procent resp. 0,9 procentow. We wokrjesach Budyšin, Zhorjelc a Šwikawa mějachu snadny přibytk ličby dźěławych snadnje stupała. Předewšěm w skupinje samostatnych, swójbnych podpěrowacych kaž tež přistajenych z małym dźěłowym zawjazkom registruja woteběrace ličby. Přidobytk dźěłowych městnow w Lipsku je statistiski krajny zarjad bjezwuwzaćnje we wobłuku posłužbow zwěsćił. Hubjene ličby w Mišnjanskim wokrjesu zwisowachu hłownje z negatiwnym wuwićom w produkowacym přemysle.
Stare wobćežma wotstronjowali
W Čornopumpskim industrijnišću su wobšěrne saněrowanje zakónčili. Za to su škódne maćizny z pódy wotstronjowali, kaž Łužiska a srjedźnoněmska towaršnosć hórnistwoweho zarjadnistwa (LMBV) wozjewi.
Čorna Pumpa (AK/SN). Posledni z trěbnych 147 tak mjenowanych kašćikow z deskowanymi sćěnami su 13. decembra wuzběhali. W šěsć wobłukach je LMBV kontaminowanu pódu wubagrowała. Po tym ju we wakuumotermiskej rjedźerni w industrijnišću rjedźachu. Wurjedźenu zemju su tam, hdźež běchu ju wubagrowali, zaso zasypali.
