Christian Schramm wuznamjenjeny
Kupcow rady zapleńča
Region dale zhromadnje zwičnjeć
Turizm tež we wuchodnej Sakskej wažnu rólu hraje. Mjeztym je wjele poskitkow, kotrež maja so zwičnić. Turistiske zjednoćenstwa, kaž na přikład Nysowy kraj, pomhaja za region wabić. Tež serbscy turistikarjo su mjez čłonami tajkich zwjazkow.
Zhorjelc (AK/SN). Najebać pandemiju Turistiske zjednoćenstwo (TGG) kónčiny Nysowy kraj nadźijepołnje do přichoda zhladuje. To podšmórnyštaj turistiska koordinatorka Maja Daniel-Rublack a předsyda Ralf Brehmer na njedawnym posedźenju sobustawow w Zhorjelcu. „Nadźijam so, zo budźe 2022 dobre lěto za turizm. Wjeselu so na wuměnu nazhonjenjow z turistikarjemi a komunalnymi zastupjerjemi ze zhromadnym zaměrom, zo móhli Nysowy kraj dale wuwić“, rjekny Ralf Brehmer. W klětušim marketingowym a financnym planje je wjele ćežišćow zakótwjenych.
Tuchwilu ma zjednoćenstwo 80 čłonow, z nich je 57 z turistiskeho wobłuka. Jim přisłušeja tež Slepjanski Serbski kulturny centrum, Wochožanski park błudźenkow, towarstwo Serbski kulturny turizm a wjacore gmejny z kónčiny.
Busy budu ze „zelenej energiju“ jězdźić
Cyłkownje 55 busow Choćebuskeho wobchadneho předewzaća budźe přichodne lěta na ćěrjenje z wodźikom přestajene. Minjeny štwórtk je Braniborska připowědźiła, zo chce prěni komunalny a priwatno-hospodarski projekt pjenježnje podpěrać.
Choćebuz (SN/BŠe). Wosebje inowatiwny wobchadny projekt bu hižo loni w lěću předstajeny. Tak chce bliskowobchadne předewzaće w Choćebuzu dźěl swojich busow na wodźik přestajić, zo bychu wone tak ze „zelenej energiju“ po puću byli. Je to zhromadny plan komunalneho předewzaća a brunicoweho koncerna Łužiska energija a milinarnje (LEAG). Minjeny tydźeń je braniborske knježerstwo připowědźiło, zo chce plany ze spěchowanjom 5,62 milionow eurow podpěrać. Přizwolenje je hospodarski minister prof. Jörg Steinbach (SPD) štwórtk w Choćebuzu přepodał.
Plany koncerna Alstom wótrje šwikane
Francoski koncern Alstom chce w Němskej něhdźe 1 300 dźěłowych městnow šmórnyć, kaž nawodnistwo minjeny pjatk wozjewi. Potrjechenej stej tež zawodaj w Budyšinje a Zhorjelcu. Předewzaće je železnisku spartu Bombardier w Němskej hakle lětsa přewzało.
Budyšin/Zhorjelc (SN/BŠe). Koncern Alstom chce na Budyskim stejnišću něhdźe 150 a na Zhorjelskim hač do 400 dźěłowych městnow wotstronić. Dźěłarnistwo IG metal je mjeztym hižo spjećowanje připowědźiło. „Je bjezrespektne, zo dóstanu sobudźěłaćerjo krótko do hód tajke špatne powěsće, kotrež jich zatrašeja“, zwurazni prěni społnomócnjeny dźěłarnistwa IG metal wuchodneje Sakskeje Uwe Garbe. „Zawody wucycać a knowhow wotćahnyć njeje prawy puć, zo móhli přichodne nadawki zmištrować.“ Dźěłarnik wočakuje, zo Alstom zamołwitosć přewozmje. Wšako móhł hladajo na klimowu změnu wažne nadawki přewzać a mobilitu zaručić. „Železniska branša hraje w přichodnych procesach w zwisku z energijowej a wobchadnej změnu wažnu rólu“, Uwe Garbe podšmórny.
Ludnosć njepačić!
Za pućowanje a putnikowanje
Drježdźany/Smochćicy (SN). Sakska chce pućowansku a putnisku akademiju wutworić a tak přiběracej woblubowanosći za pućowanske a putniske tury w swobodnym staće wotpowědować. Kaž tudyše statne ministerstwo za kulturu a turizm wčera informowaše, předwidźi wone za spěchowanje wotpowědnych aktiwitow – a załoženje akademije k tomu słuša – w aktualnym dwójnym etaće kóžde lěto 300 000 eurow. Přisłušna ministerka Barbara Klepsch (CDU) spóznawa w tym wobłuku „wulki potencial, tójšto hosći zbliska a zdaloka zdobyć“.
Regionalne pućowanske towarstwa, iniciatiwy putnikow, wosady a hospody móža za swoje projekty spěchowanje hač do 2 000 eurow na lěto dóstać. Próstwy móža so lětsa hišće hač do 15. decembra zapodać. Tež w Smochčanskim kubłanišću swj. Bena wo tym rozmysluja, kak móhli poskićenu podpěru wužiwać.
W nastawacej akademiji chcedźa ludźi wukmanjeć, zo bychu wšelakim adresatam pućowanje we wšěch jeho fasetach pokazali. Putnikow přewodźacy tam wuknu, hosćom nabožne a spirituelne aspekty putnikowanja spřistupnić.
Wulka pomoc wuchowanskej straži
We łužiskej jězorinje kładu wulku wažnosć na kilometrowe sćežory. Wšako su wone bytostny wobstatk hladajo na wuchowanje ludźi. Stołpy dyrbja tuž nětko zaso ponowić.
Tež „serbske“ wosuški pruwowałoj
Něchtóžkuli hižo tydźenje do adwentneho časa prěni wosušk woptawa, druzy popřachu sej tule dobrotu hakle při prěnjej zaswěćenej swěčce. Kóžde lěto fachowcy wosuški pruwuja, tónraz pod trochu hinašimi wuměnjenjemi.
Budyšin (CS/SN). Michael Isensee z Němskeho chlěboweho instituta je sej předwčerawšim w Budyšinje dohromady 31 wosuškow z 18 pjekarnjow Budyskeje rjemjeslniskeje komory bliže wobhladał a posudźował. Korony dla wotmě so posudźowanje wosuškow lětsa njezjawnje w rumnosćach rjemjeslniskeje komory a nic kaž hewak w lutowarni abo na hinašim zjawnym městnje. Přirunujo ze zašłymi lětami je so tónraz wjele mjenje pjekarnjow wobdźěliło. To zaleži po słowach wyšeho pjekarskeho mištra Lutza Neumanna předewšěm na tym, zo wjele pjekarnjam personal pobrachuje. Hišće loni bě 34 pjekarnjow wobdźělenych.
„Změna strukturow je wulka šansa“
We Wojerowskej kupjeli maja sobudźěłaćerjo wulke wizije a sadźeja mjez druhim tež na turizm
Při zachodźe stejachu ludźo w dołhich rynkach. Swójby, poriki a mnohe skupiny chcychu spočatk nazymskich prózdnin do Wojerowskeje Łužiskeje kupjele. Přichadźa w prózdninskim času stajnje wjele wopytowarjow? „Poprawom haj“, měni Matthias Brauer, wot lěta 2020 jednaćel kupjele. „Kupjel je skerje warianta za špatne wjedro, ale wona je hišće wjele wjace. Cyłe lěto móža ludźo přińć.“ Lětuše lěćo drje bě trochu přerosćene. Jeničce w awgusće je so tam 18 508 ludźi wočerstwiło, štož bě wot wotewrjenja w lěće 1999 rekord. W dobrych lětach mějachu we Łužiskej kupjeli přerěznje něhdźe 13 600 wopytowarjow wob měsac. „Nutřkokrajny turizm přiběra. Mjeztym přichadźeja ludźo samo ze Sylta abo Garmisch-Partenkirchena, zo bychu so z Łužicu zeznajomili“, Matthias Brauer rozprawja. „Město Wojerecy ma we łužiskej jězorinje najwjetšu dožiwjensku kupjel.“ Cyłkownje maja tam 35 sobudźěłaćerjow, kotřiž najwšelakoriše wobłuki zastaruja.
