Jězorina ma atraktiwniša być
Nowa kolesowarska šćežka wokoło Rańskeho jězora ma wotnětka wjac dowolnikow do Łužicy wabić.
Rań (AK/SN). ) Kolesowarki a kolesowarjo móža wotnětka Rański (Großräschen) jězor dospołnje wobjěć abo sej jón pěši wotkryć. Zmóžnił je to zaměrowy zwjazk Łužiska jězorina Braniborska. Nastała je nowa 2,8 kilometrow dołha kolesowanska šćežka we wobłuku wyšiny Reppister. Wona skulojća kołopuć wokoło jězora, podšmórnje sobudźěłaćerka zaměroweho zwjazka Julia Kussatz. „Hišće dosć dobre elementy při wuhladnišću smy zachowali a z pomjeńšenym zwobraznjenjom wotbagrowanych sydlišćow wudospołnili. Elementy słuža dopomnjeću na hórnistwo w regionje“, wona informuje. Nastało je nimo toho wotpočnišćo.
Chowacemu so słóncu přihladować
Budyšin (SN/MiR). Budyska Sundowner-bara wotewrje zajutřišim, srjedu, zaso swoje durje. Cyłe dźewjeć tydźenjow, wot 30. junija hač do 29. awgusta, chce iniciator Beno Brězan ze swojim mustwom srjedu, štwórtk a njedźelu wot 17 do 22 hodź., pjatk a sobotu hač do 23 hodź. wopytowarjow při rjanym wjedrje zapleńčić. Wospjet změje za to młodostnych, mjenujcy Budyskich serbskich gymnaziastow a studentow, poboku. Tak njebudu woni jenož hosći posłužować, ale tež ćežke kisty, blida a stólcy nosyć, wšitko sporjadkować a tak dale. Połdra hodźiny do wotewrjenja a runje telko časa po tym na nich dosć dźěła čaka. „Sym jara zbožowny, zo mam tónkróć tež cyły rjad młodźencow wjace hač zašłe lěta, kotřiž so nimo holcow lětsa na dyrdomdej Sundowner na najrjeńši Budyski balkon podadźa“, Beno Brězan wuswětla. Nowinka je přistup na zahrodu. Wot Mosta měra to twarskich dźěłow w Serbskim ludowym ansamblu dla móžno njeje. Tež na Rybarskej při SLA je dale twarnišćo. Tak dóstanu so tam hosćo přez poměrnje schowane durčka při Rybarskej ze směra Stareje wodarnje abo přez dwór SLA a w nim zaměstnjenu Röhrscheidtowu baštu.
Za wulkoslědźerski centrum „Fabrika přichoda Łužica“
Drježdźany (SN/CoR). W nadawku Drježdźanskeho Fraunhoferskeho instituta za keramiske technologije (IKTS) a systemy zdźěłany požadanski film „Fabrika přichoda Łužica – wotmołwy na globalny hłód za resursami“ je nětko zjawnje w interneće přistupny. W třoch mjeńšinach předstaja widejo zakładnu ideju wulkoslědźerskeho centruma za wodu, energiju a zežiwjenje we Łužicy.
Z namjetom „Fabrika přichoda Łužica“ wobdźěli so konsorcij – su to Fraunhoferska towaršnosć, Techniskej uniwersiće Drježdźany a Freiberg, Wysoka šula za techniku a hospodarstwo Drježdźany a Wysoka šula Žitawa/Zhorjelc – na idejowym wubědźowanju zwjazkoweho ministerstwa za kubłanje a slědźenje (BMBF) „Wěda twori perspektiwy za region!“. Zaměr wubědźowanja je, najlěpše koncepty za wulkoslědźerskej centrumaj we łužiskim kaž tež srjedźoněmskim brunicowym rewěrje namakać.
Wěste normy trěbne
Žadanja njehodźa so zwoprawdźić
Budyski rěznik Roman Wjenk dyrbi swoju rězarnju na Horje zawrěć
Budyšin (CS/SN). Dotal bě Budyske Wjenkec rěznistwo mjez tymi, kotřiž poskićachu swoje wudźěłki ze swójskeho rězanja. Werner Wjenk, nan dźensnišeho mějićela Romana Wjenka, běše sej rězarnju na Horje pola Bóšic zarjadował. Tola nětko dyrbi tam rězniski mišter dźěławosć nachwilnje zastajić. Přičina toho su žadanja zarjada za dohladowanje žiwidłow a weterinarstwo Budyskeho wokrjesa, kotrež Roman Wjenk krótkodobnje spjelnić njemóže. W lisće, kotryž bě wón dźeń do swjatkow dóstał, sej zarjad wot njeho žadaše, předpołožić hač do 20. junija koncept, kak chcył žadanja zwoprawdźić. Mjez druhim běchu rězniskeho mištra napominali, pomjenować dalšeho zamołwiteho za škit skotu a zo ma lěpšu dokumentaciju wjesć. Swinje měli samsny dźeń zarězać, kaž je z nakładnym awtom do rěznistwa přiwjezu. Njeje-li to móžno, měli je dale picować. Z tym pak by wjace hownow nastało, kotrež měli wotstronić. Nimo toho žada sej zarjad twarske změny w rězarni, a te by hač do 31. julija zakónčić dyrbjał.
Rjemjeslnicy a wikowarjo zwjetša ze Sakskeje
Čorna Pumpa (JoS/SN). Wulke to wodychnjenje rjemjeslnikow, wikowarjow, wopytowarjow a organizatorow: Z rjemjeslniskimi wikami při kolijach 19 w Čornej Pumpje su minjeny kónc tydźenja woprawdźe wuhibki do směra na přichod normalneho žiwjenja stajili. Tele wuprajenje stej wažnej postawje města Grodka Cindy Ahne jako sprjewina nyksa a Veronika Dubau jako hrodowa knježna Jutta von Kittlitz wobkrućiłoj.
Lětsa trochu mjenje hromaka
Hózk (hh/hš/SN). Lětuša hromakowa sezona je so před dwěmaj měsacomaj zahajiła a skónči so na dnju swjateho Jana 24. junija. Michał Domanja rozprawja wo žnjach na swojim statoku w Hózku. „Wob lěto žnějemy něhdźe 4 000 kilogramow běłeho hromaka, lětsa pak to bohužel tróšku hinak wupada, tónraz je mjenje hromaka.“ Wón měni, zo zaleži to sprěnja na suchim wjedrje loni, ale runje tak na chětro zymnych temperaturach minjenych měsacow. Njebudu tuž telko hromaka žnjeć kaž w předchadźacych lětach. Sezonu cyle jednorje podlěšić pak so tež njehodźi. Rostliny trjebaja poměrnje dołho za regeneraciju, zo bychu přichodne žně dobre byli. Tež plahowanje w rostlinarni móžne njeje. Sezonu podlěšeja ratarjo hižo z pomocu čornych planow, kotrež ćopłotu składuja, z běłymi zrawjenje trochu do dołhosće ćahnu.
Za ratarstwo wobdarjeni
Domanic swójba z Hózka dźiwa na produkciju strowych wudźěłkow
Hižo wot 18. lětstotka je burski statok w Hózku we wobsydstwje Domanic swójby. Po towaršnostnym přewróće bě so swójba wo to postarała, zo jej něhdy swójske płoniny prodrustwa wróćichu. Michał Domanja natwari sej na to wikowanske předewzaće, kotrež přez lěta dale a bóle rozšěrješe. 1998 natwari sej prěnju wulku rostlinarnju za kórki a tomaty. W lěće 2004 je syn Matthias z mandźelskej Claudiju statok přewzał.
W Domanic předewzaću maja 25 přistajenych, dźěl pochadźa z Pólskeje. Wšojedne dokal hladaš, wšudźe su pilni a kmani dźěłaćerjo. Hižo 15 lět dźěłaja tam tež angažowani ludźo z ćělnym abo duchownym zbrašenjom. „Zbrašeni naše předewzaće wobohaćeja“, měni Michał Domanja.
Kamjenscy slědźerjo truty w Njebjelčicach předstajili
Njebjelčicy (BG/SN). Trutam słuša přichod. Wo tym je Peter Pfeifer z Kamjenskeho slědźenskeho a wupruwowanskeho centruma za awtonomnu a elektrisku lětańcu přeswědčeny. Cyle jasnje pytnyć bě to wčera wječor w Njebjelčanskim gmejnskim domje. Pfeifer rozprawješe tam wo technologijach trutow a wo móžnosćach jich wužiwanja. Rólu hraja wašnja ćěrjenja, zaručace nastrojam wulke dalokosće. W Kamjencu slědźa hižo na motorach z wodźikowej technologiju. „Dźe wo cyłotne nasady pod wobkedźbowanjom ekonomiskeje, ekologiskeje a towaršnostneje naslědnosće“, wón wuzběhny.
Zo by w Njebjelčicach za mjenowane wuwiće a za zhromadne dźěło z gmejnu wabił, měješe Pfeifer wčera trutoweho pilota Mika Hohmanna poboku. Na terenje Kamjenskeho lětanišća nastawa tuchwilu hala za twar trutow-prototypow. Tajke lětace nastroje žadaja sej wulku wěstotu, čehoždla dyrbja jich piloća wotpowědnje wukubłani być. Tež wo to so w Kamjencu hižo staraja. Wot lětušeho septembra poskića na tamnišim lětanišću kursy za trutowu „jězbnu“ dowolnosć.
Tež woda wulku rólu hraje
Dubrawka (CS/SN). Mjeztym 25 lět ma Hessec swójbny ratarski zawod w Dubrawce blisko Barta pospytne pola. Tam plahuja wšelake družiny rěpika, pšeńcy, rožki, ječmjenja a soje. Płoniny nimaja žanu dobru pódu, wone su poměrnje suche, a tak dyrbi syno swoju kwalitu dopokazać. Žitne družiny su nětko tak daloko narostli, zo móžachu tam wčera přehladku družin wotměć.
