W lěće korony wjele wuknyli
Wo „lěće z wužadanjemi za nas wšitkich“ rěči Kathrin Groschwald, předsydka jednaćelstwa Budyskeje wotnožki Zwjazkoweje agentury za dźěło, zhladowaca na lěto korony 2020.
Budyšin (SN/at). Přerěznje 18 278 bjezdźěłnych, porno lětu 2019 wo 3,8 procentow wjetšu bjezdźěłnosć a pola předewzaćow zwěsćenych 10 068 socialneho zawěsćenja winowatostnych swobodnych dźěłowych městnow – to su dźěławosć Budyskeje wotnožki dźěłoweje agentury charakterizowace hrube ličby za minjene lěto. Zarjad je zhladowanje wčera w zwisku z aktualnymi ličbami dźěłowych wikow wozjewił.
Z dobrej radu za domjace zwěrjata
Management spyta změrować
Budyšin/Zhorjelc (dpa/SN). Hač do kónca januara chce francoski zhotowjer ćahow TGV Alstom přewzaće twornjow konkurenta Bombardier Transportation (BT) w Němskej wotzamknyć. To potrjechi tež stejnišći w Budyšinje a Zhorjelcu.
Z wida managementa Bombardier njetrjebaja so přistajeni po tym wjetšeho šmóranja dźěłowych městnow bojeć. „Naše knihi su połne nadawkow, trjebamy našich němskich inženjerow a fabriki, zo bychmy je zdokonjeli. Přichodnej dwě, tři lěta předewšěm wo to dźe“, cituje tydźenik Frankfurter Allgemeine Sonntagszeitung prezidenta BT Dannyja Di Pernu. Po jeho měnjenju njeje z dźensnišej wědu za wotwidźomny čas program restrukturowanja trěbny. „Organizaciju pak wězo stajnje optiměrujemy.“
Zastupjerjo dźěłopřijimarjow so procesa fuzije dla starosća, wšako přisłušeja Bombardierej w Němskej dalše twornje hač tej w Budyšinje a Zhorjelcu. Najwjetši zawod Alstoma je w delnjosakskim Salzgitteru. Šef dohladowanskeje rady BT Rüdiger Grube z toho wuchadźa, zo „Alstom móc na němskich stejnišćach ignorować njemóže a to tež njebudźe“.
Dowol we wukraju dale njewěsty
Hórnikečanski jězor za dwě lěće zaso spřistupny
Hórnikecy (SN). Sakski wyši hórniski zarjad je nětko plany za wotzamknjenja naprawow při Hórnikečanskim jězorje wozjewił. „Kupy, kotrež móhli so zesunyć, wostanu zawrjene. Wone pak njetrjebaja so geotechnisce saněrować“, wuswětli zastojnik hórniskeho zarjada prof. dr. Bernhard Cramer. Saněrowanje kupow by masiwnje do přirody zapřimnyło a tež zasydlenu zwěrinu wohrozyło. Tež kóšty a čas akterojo nětko lutuja. „Tak móhli jězor k lětnjej sezonje 2022 ludźom zaso spřistupnić“, fachowc měni. Zwostawace wužiwanske wobmjezowanja kupow a zbytne rizika podłu přibrjohow móže hórniski zarjad zastupować, w předležacym wozjewjenju rěka.
Hižo wot lěta 2014 je Hórnikečanski jězor zašlahany a njepřistupny. Přibrjohi je Łužiska a srjedźoněmska towaršnosć hórnistwoweho zarjadnistwa w nadawku sakskeho wyšeho hórniskeho zarjada saněrowała a zawěsćiła. Po wosom lětach smědźa ludźo jězor potom skónčnje zaso wužiwać.
Nowosć z Łužicy
Korzym/Lubij (dpa/SN). Piwowy palenc je nowostka z Łužicy, kotraž ma bórze w Sakskej spirituozowej manufakturje w Korzymju nastawać. Mysličku za nju měještaj šef Lubijskeje piwarnje Steffen Dittmer a Korzymski palencar Martin Wagner. Přičina za nowostku je koronapandemija, kaž wobaj wobkrućištaj.
Nowostku bych woptał
Prózdny nowy móst Bombardiera
Koncern bě sej posylnjenje zapadneho přijězda za swój Budyski zawod naležnje žadał. Nimale dwaj měsacaj po přepodaću je tutón dale njewužiwany. To ma přičiny.
Budyšin (UM/SN). Hdyž kanadiski wulkokoncern Bombardier po najnowšich informacijach kónc januara swoju spartu kolijowych wozydłow a z tym tež Budyski zawod francoskemu konkurentej Alstom woteda, potom z nahladnym wěnom w formje wutwarjeneho druheho přijězda za nakładne awta. Přijězd wjedźe wot zapada přez Sprjewju k na tradicije bohatemu stejnišću wagonotwarca a ma dotalny jenički na wuchodnej stronje wolóžić. Wšědnje hač do 110 transportow ma nowa dróha zmištrować, tak rěkaše směrnica na planowanski běrow.
Přiwabliwe hospodarske stejnišćo
Znaty je Budyšin hladajo na historiske stare město, žonop a kulturu předewšěm wokoło jutrow. Tola tež jako hospodarske stejnišćo ma město wulki wuznam, kaž z wozjewjenych statistiskich ličbow wuchadźa.
Budyšin (SN/BŠe). Nimale 18 000 wosobow wšědnje do Budyšina na dźěło jězdźi. A wobroty zaměstnjenych předewzaćow su samo wyše hač w Drježdźanach. Płonina industrijnišćow a přemysłownišćow je so w minjenych lětach podwojiła. Tele a dalše informacije wopřijima aktualizowana publikacija „Budyšin – hospodarstwo w ličbach 2021“. Na 46 stronach posrědkuja statistikarjo dokładne detaile a přehlady. Čitarjo pak měli wobkedźbować, zo złožuja so ličby předewšěm na čas do koronapandemije. Najebać to so wujewja, zo je so město Budyšin přikładnje jako hospodarske stejnišćo wuwiło.
Serbske baje sobu zapřijate
Přirodowa dožiwjenska šćežka „Hućinjanske haty a Olbaski jězor“ chcedźa hač do klětušich swjatkow znowa koncipować a twarsce wobdźěłać. Prěnje naprawy su w oktobrje hižo zahajili.
Hućina/Stróža (AK/SN). Přirodowa dožiwjenska šćežka „Hućinjanske haty a Olbaski jězor“ wupřestrěwa so mjez Malešanskimaj wjesnymaj dźělomaj Hućinu a Stróžu. Jeje koncept budźe wobsahowje předźěłany a z twarskimi naprawami wuhotowany, zdźěli biosferowy rezerwat UNESCO Hornjołužiska hola a haty na swojej internetnej stronje. Prěnje dźěła běchu zamołwići kónc oktobra/spočatk nowembra zahajili. Podłu šćežki nětko wšitke stare pućiki a platformy wotstronja. „Paralelnje pak přihotuja hnydom dźěła za nowe twarske naprawy. Wopytowarjo změja tuž přichodnje z haćenjemi ličić, dokelž njebudu jednotliwe elementy a stacije wužiwać móc“, zamołwići biosferoweho rezerwata informuja.
