Wobchadny zaměrowy zwjazk Hornja Łužica-Delnja Šleska dźěła dale zaměrnje na poskitkach za swojich sobujěducych. Nimo dweju noweju jězdźidłow dźěše na wčerawšim posedźenju tež wo nowy kubłanski tiket.

Budyšin (SN/BŠe). Wobchadny zaměrowy zwjazk Hornja Łužica-Delnja Šleska (ZVON) je na swojim posedźenju wčera w Budyšinje wo skazankach busowych linijow w Budyskim wokrjesu za nowy jězbny plan rozsudźił. „Wobjim tež w přichodnym planje samsny wostanje“, wuswětli jednaćel ZVON Hans-Jürgen Pfeiffer. Kóžde lěto dyrbja radźićeljo konceptej přihłosować, a tak móža jězbny plan za lěto 2021/2022 nětko zestajeć. „Runje železniskim předewzaćam je to wažne, dokelž maja wotpowědnu potrjebu na trasach zawěsćić“, jednaćel postupowanje rozkładźe. Trěbne financne srědki ma ZVON k dispoziciji.

Wojerecy (AK/SN). Zaměrowy zwjazk Łužiska jězorina Sakskeje chce lětsa něhdźe dwaj milionaj eurow do kónčiny inwestować. Najwšelakoriše naprawy su za to předwidźane. Dźakowano spěchowanju we wobjimje 90 procentow su wone móžne. Zwjazk ma swójski podźěl 320 000 eurow nałožić. Na to dorozumichu so njedawno radźićeljo zjednoćenstwa na swojim posedźenju we Wojerecach, hdźež su plan etata za lěto 2021 wobzamknyli.

Ćežišći stej wodowe wotpočnišćo při Lejnjanskim jězorje kaž tež druhi dźěl systema za wodźenje po pućach“, wuswětli jednaćel zaměroweho zwjazka Łužiska jězorina Sakskeje Daniel Just. Swójski podźěl zwjazka za wodowe wotpočnišćo wučinja 238 000 eurow, za tamnu naprawu 30 000 eurow.

W ćopłej wodźe předewzaće Chrjebjanska rybjaca tzwr w Čornej Pumpje přez zymu ryby plahuje. Młode karpy a jasotry bórze do normalnych hatow přećahnu. Rybarjo liča lětsa z lěpšimi wuměnjenjemi.

Čorna Pumpa (JoS/SN). W ćopłowódnej plahowarni předewzaća Chrjebjanska rybjaca tzwr na industrijnišću Čorna Pumpa je přez zymu 160 000 karpow a 3 000 jasotrow na šwarne młodźata narostło. Loni w septembrje běchu je jako małe rybički do připrawy sadźili. Karpički běchu jedne lěćo stare, małe jasotry něhdźe pjeć centimetrow wulke. Wone su nětko hač do 50 centimetrow dołhe. Hižo nazymu budu na předań, runje tak karpy. W ćopłej wodźe su ryby jedne plahowanske lěto přeskočili. Ručež wjedro to dowoli, budu ­wone do normalnych hatow přesadźene.

Ćopłowódna plahowarnja w Čornej Pumpje je cyłu zymu bjez problemow dźěłała. Jeno šěre čaple wopokazachu so z wyšiny jako wohrožace za drohotny wobstatk w basenkach. Zo bychu ryby škitali, buchu rubježne ptaki z banćikami ­zešerjene.

Towarstwo za wuwiće kónčiny Hornjołužiska hola a haty (OHTL) chce idejowe wubědźowanje přewjesć, zo by so turistiska infrastruktura polěpšiła. Hač do 19. meje móža zajimcy swoje koncepty zapodać.

Rakecy (SN/BŠe). Wot Pančičanskeho klóštra na zapadźe hač k Stróžanskemu Domej tysac hatow na wuchodźe regiona, wot Kulowskich Zelderec hatow na sewjeru hač na Budyski hród na juhu – po cyłej kónčinje Hornjołužiska hola a haty maja so kreatiwne ideje za wubědźowanje nańć, kotrež wěnuja so poskitkam za turistow a wobydlerjow.