Z „Wam k zbožu a ahoj!“
Lipsk/Zły Komorow (SN/at). Wodosportowe wiki Beach & Boat 2016 wočakuja wot jutřišeho hač do njedźele lubowarjow sporta na a we wodźe na terenje Lipšćanskich wulkowikow. „Wočakujemy zajimcow na swojim stejnišću w hali 4, kotrež je na podkładźe z widom na jězorinu LMBV natwarjene“, skedźbnja Katja Wersch z turistiskeho zwjazka Łužiska jězorina na to, zo je srjedźna Łužica na tychle specifiskich wikach znowa zastupjena. Turistikarjo ze Złeho Komorowa informuja wo Dnjomaj w jězorinje 23. a 24. apryla na wšelakich městnach, při čimž budźe hłowne srjedźišćo Hórnikečanska energijowa fabrika. Dale předstaja nowy system online-knihowanja, jězorinowu card a jězby železnicy po krajinje jězorow 19. junija, 21. julija a 11. septembra. Wuchodosakscy přećeljo železnicy z Lubija zwisk z dwórnišća Drježdźany-nowe město do jězoriny ze swojim ćěridłowym wozom zaručeja.
Sudnistwo ma rozsudźić
Drježdźany/Choćebuz (SN). Vattenfall a Zelena liga změjetej 21. apryla na Drježdźanskim zarjadniskim sudnistwje jednanje. Tam póńdźe wo spřistupjenje datow wo wot brunicoweje jamy zničenym přirodnoškitnym terenje, kaž Zelena liga zdźěla. „Sudnistwo ma rozsudźić, hač smě koncern wobswětowe daty tajne dźeržeć. Z našeho wida rani to prawo wobdźělenja wobydlerjow. W tym nastupanju móhła so naša kritika na Vattenfallu z precedentnym padom Němskeje stać“, praji rěčnik Choćebuskeje wobswětoweje skupiny dr. Martin Kühne.
Wochožanska jama bě přirodoškitnu kónčinu Běłowodźanski pralěs zničiła. W lěće 2012 je wokrjes Zhorjelc próstwu Choćebuskeje wobswětoweje skupiny wotpokazał, z kotrejž chcychu wuslědki kartěrowanja na terenje wědźeć. To rani awtorske prawo, tehdy rěkaše, a Vattenfall daty njewozjewi. „Je absurdne, zo dyrbimy 26 lět po měrliwej rewoluciji znowa wo to wojować, štož smy sej hižo tehdy žadali: wozjewić wobswětowe daty“, praji dr. Martin Kühne.
Sto swobodnych městnow w poskitku
Zhorjelc (SN). Sobotu, 27. februara, wuhotuja w Zhorjelcu štwórty tak mjenowany jobspeeddating. Dźěłopytacy a dźěławi ze zajimom za nowe wužadanje maja wot 10 do 14 hodź. w twarjenju Wichernhaus składnosć, we wosom mjeńšin trajacych krótkorozmołwach wjacorych potencielnych dźěłodawarjow zeznać. Towaršnosć Europske město Zhorjelc/Zgorzelec (EGZ) je zarjadowanje z podpěru Zhorjelskeho jobcentera iniciěrowała.
Na wikach „Prózdniny a wólny čas 2016“ kónc tydźenja w ...
Liča z kwaklu myškow
Drježdźany (dpa/SN). Sakscy ratarjo nastajeja so lětsa po miłej zymje na kwaklu pólnych myškow dla. „Njebojimy so jeje jeno, změjemy ju tež“, rjekny Manfred Uhlemann, hłowny jednaćel Sakskeho krajneho burskeho zwjazka powěsćerni dpa w Drježdźanach. Myški su w zymskich kwartěrach přetrali, dokelž njebě sněha, kotrehož wody wot taća dla bychu so hewak w dźěrach zatepili.
Tež kruty zmjerzk by nětko přepozdźe přišoł, zo by so połoženje zasadnje změniło. „Póda njeby hač do teje hłubokosće zmjerznyła, w kotrejž maja pólne myški swoje borleška“, Uhlemann rozłoži. Jenož wulka chorosć móhła jich wobstatk rozsudnje pomjeńšić.
Myški podrywaja rolu a hrymzaja koruški, tak zo zawostajeja často wotemrěte rostliny a puste pólne płoniny.
Pjekarjo na certifikat za słódny chlěb a całty hordźi
Budyšin (SN/mwe). 24 pjekarjow z Budyskeho wokrjesa je so dźensa na zjawnym pruwowanju chlěba a całtow zjednoćenstwa rjemjesnikow hornjołužiskeho regiona w sprjewinym měsće wobdźěliło. Mjez nimi běštaj pjekar Tomaš Vacek z Pančic-Kukowa a młody pjekarski mišter Maćij Kupka z Kulowa. „Je mi wažne wědźeć, kak fachowcy naše pječwo posudźuja, hdźe stejimy a što móhli hišće polěpšić“, praji 29lětny Kupka. Wšako je kóždy pjekar hordy, su-li jemu certifikat přepodali, kotryž so jako wopismo zjawnje w pjekarni wupowěsnje.
W Budyšinje móžachu dźensa spřisahaneho pruwowarja pječwa Michaela Isenseeja witać. Wón pruwuje přez cyłe lěto w Němskej pječwa najwšelakorišich pjerkarnjow. Jednaćelka Budyskeho wokrjesneho zjednoćenstwa pjekarjow Sabine Gotscha-Schock zwurazni, zo chcedźa wosebje mjeńše pjekarnje wědźeć, kak eksperta jich chlěb a całty z móžnych sto dypkow z wotpowědnym predikatom hódnoći. Kaž pjekarscy mištrojo Serbskim Nowinam wobkrućichu, sej ludźo dźensa zaso radšo chlěb „pola swojeho pjekarja“ kupuja, kiž ma domjacy recept.
Nowozasydlenje
Rozwjazanje zrěčenjow mjerzace
Rjemjeslniske powołanja su loni młodych ludźi w Budyskim wokrjesu třeće lěto za sobu bóle do wukubłanja wabili. Problematiske wostanje, zo dale něhdźe pjećina wučomnikow wukubłanske zrěčenje rozwjaza.
Budyšin (SN/at). „Rjemjesło zaso wjace młodych ludźi wabi. To nas zwjesela.“ Słowa jednaćelki Budyskeho wokrjesneho rjemjeslnistwa Sabiny Gotscha-Schock poćahuja so na fakt, zo zwěsćichu třeći raz za sobu přiběracu ličbu wukubłanskich zrěčenjow w Budyskim wokrjesu. Dokładnje bě jich 433 – to je 0,7 procentow wjace hač w lěće 2014. Loni mějachu dale wjace młodych žonow, kotrež nětko powołanje wuknu. Nastupajo podźěl wučomnicow mjez nowačkami (25,6 procentow) pak njeje Budyski wokrjes přerězk komory docpěł.
Nowy w zastojnstwje jednaćela
Mnohim w Budyšinje kaž tež w Hornjej Łužicy je Matthias Klemm znaty jako angažowany dźěłarnik přećiwo prawicarstwu w zwjazkarstwje Budyšin je pisany. Po tym zo bě so sobuzałožer strukturow Němskeho dźěłarniskeho zwjazka (DGB) we wuchodnej Sakskej a wjelelětny jednaćel Bernhard Sonntag na předwuměnk podał, jeho Matthias Klemm wot minjeneje póndźele naslěduje.
47lětny je woženjeny a nan dweju dźowkow a syna. W měrcu 2003 wón bě do Budyšina přišoł, zo by jako dźěłarniski sekretar DGB wuchodneje Sakskeje dźěłał. Z časa dweju studijow wot lěta 1989 do 1996 w Zhorjelcu Klemm Hornju Łužicu dosć derje znaje, štož jeho skutkowanju zdobom tyješe. Wot toho časa je wón kruty partner wšěm tym, kotřiž wobaraja so prawicarskoekstremistiskim machinacijam w Budyskim wokrjesu. „Angažement přećiwo prawicarstwu je zasadna naležnosć DGB“, nowy regionalny jednaćel wujasnja.
Nakupować w Budyšinje, ale prošu serbsce!
Serbsce rěčeć móžeš jenož doma a w cyrkwi? To wšak njetrjechi. Tež při nakupowanju to móžeš, dyrbiš pak wědźeć, hdźe. Na wsach ludźo zwjetša wědźa, kotreho předawarja a kotru předawarku móža pola pjekarja abo rěznika serbsce narěčeć. W městach pak je kóždažkuli přiležnosć maćernorěčneho posłužowanja skerje priwatna rěčna kupa. A dokelž su tajke často njeznate, je so Weronika Žurowa raz w Budyšinje za móžnosćemi rozhladowała, hdźež će serbskorěčnje posłužuja.
Center na Žitnych wikach, z wjac hač 70 wobchodami najwjetši Hornjeje Łužicy, je mnohim kupcam prěnja adresa w Budyšinje. „W centeru dźěła něhdźe 300 předawarjow. Hač pak su mjez nimi tež Serbja, njemóžu rjec“, zdźěli centerowy manager Christian Polkow na naprašowanje a doda, „mamy pak wšitke informaciske a orientaciske taflički serbsce a němsce popisane.“
