Wobaraja so akcijam iniciatiwy
Trjebinska gmejnska rada distancuje so wot akcijow protestneje iniciatiwy „Ende Gelände“, kotrež su wot 29. nowembra do 1. decembra we łužiskim brunicowym rewěrje planowane.
Trjebin (AK/SN). Jednohłósnje su so nětko radźićeljo gmejny Trjebin za to wuprajili, akcije protestneho hibanja „Ende Gelände“ zjawnje wotpokazać. „Wobaramy so kóždemužkuliž jednanju zwonkastejacych. Wotpokazujemy wšitke formy namocy“, woni wuzběhnychu.
Protestne hibanje planuje w mjenowanym času wjacore akcije. Na internetnej stronje iniciatiwnicy k tomu pisaja: „K zahajenju klimoweje konferency UNO w Santiagu de Chile chcemy zhromadnje z hibanjom Fridays for future we wobłuku akciskeho kónca tydźenja za sprawnosć nastupajo klimu protestować. Wšojedne hač šulski stawk, blokada bagrow – jeničce z njeposłušnosću móžemy klimowu krizu zadźeržeć.“ Nětko je načasu system změnić, hibanje dale wuzběhuje. Dźe zdobom wo solidaritu a wo žiwjenje bjez profita a bjezmjezneho ekonomiskeho rozrosta.
Kompetencny centrum wotewrjeny
Mongolska IHK nětko težw Delnjej Łužicy
Choćebuz (dpa/SN). Mongolska narodna Industrijna a wikowanska komora (IHK) ma wotnětka běrow w Choćebuzu. Minjeny pjatk su zastupnistwo w přitomnosći prezidenta mongolskeje komory Otgondavaa Amartuvshina wotewrěli. Južnobraniborske předewzaća pokazuja zajim na mongolskich wikach a maja je hladajo na łužiske kompetency w hórnistwje a energijowej technice za strategisce wjelelubjace. To rjekny prezident Choćebuskeje IHK Peter Kopf k nowemu partnerstwu. Wobě komorje podpisaštej kooperaciske zrěčenje. Po jeju informacijach je to prěni króć, zo so wukrajna IHK na juhu Braniborskeje zasydli.
Někotre předewzaća regiona wudźeržuja hižo styki k mongolskim partneram, při čimž maja zas a zaso přewšo wulke zadźěwki přewinyć. Te chcedźa nětko z pomocu noweho mongolskeho kontaktneho běrowa wottwarić, rjekny wotrjadnica IHK za mjezynarodne styki Silke Schwabe. Nawjedować ma běrow němskorěčny sobudźěłaćer, kiž je na zakładźe swojeho dotalneho skutkowanja z łužiskej kónčinu derje splećeny.
Tři myta spožčili
Budyšin (SN/BŠe). „Po kreatiwnych pućach – wo rozrost so starać, problemy rozrisać a sobudźěłaćerjow dźeržeć“, bě hesło Hornjołužiskeho hospodarskeho dnja wčera w Lubiju. Něhdźe 170 hosći je so tam z kreatiwnymi hospodarskimi impulsami zaběrało.
Wjeršk zarjadowanja bě spožčenje 21. hornjołužiskeho předewzaćelskeho myta, a to tónkróć pod motom „W swěće hódnoćene – we Łužicy doma“. Po Budyskim a Zhorjelskim wokrjesu pytachu za předewzaćelemi, kotřiž mjezy přesahujcy agěruja. Při tym njeńdźeše jenož wo eksport wudźěłkow, ale tež wo kooperacije we wukraju. Cyłkownje 24 předewzaćow bě lětsa nominowanych. Skónčnje móžachu so zawod August Förster z Lubija, twornja C.H. Schäfer ćěridła z Ohorna a firma ATD-modele z Rownoho nad wuznamjenjenjom wjeselić. Předewzaće ze srjedźneje Łužicy wuwiwa modele za crashtest-dummyje. Daty tworja zakład za programowanje a nastawace wobličenske modele. A te předawaja kupcam po cyłym swěće, na přikład w awtomobilnej branši, zo móhli zražki simulować, prjedy hač woprawdźite testy přewjedu. Abstraktna ideja je mjezynarodnje wulce wuspěšna.
Skutkuja nětko w zwjazkarstwje
Pančičanske klóšterske kubło strukturnje změnjene
Pančicy/Worklecy (SN/BŠe). Klóšter Marijina hwězda ma noweho nawodu ratarskeho wobłuka. Dr. Hartwig Kübler z Raitzena pola Riesy je ze serbskej kónčinu hižo dlěje zwjazany. Tak skutkowaše jako poradźowar ratarskeho zawoda maltezow we Worklecach a klóšterskeho kubła. Wot kónca lěta 1999 je wobaj zawodaj nawjedował. W lětomaj 2010/2011 so klóšterske kubło dale a bóle zesamostatnješe, lětsa krótko do žnjow pak měješe wulku nuzu. Sobudźěłaćerjej běštaj dlěje choraj, čehoždla pytaše klóšter za rozrisanjom. Dopomnichu so na dr. Küblera, kiž je jim krótkodobnje pomhał, žně domchował a so wo wobhospodarjenje polow starał. Jako pak sej zawod bliže wobhlada, fachowc zwěsći, zo měł klóšter bóle do techniki inwestować. „Po dołhim pruwowanju smy so za to rozsudźili, klóšterske kubło strukturnje změnić“, zdźěla klóšter na swojej internetnej stronje.
Hišće 70 požadarjow bjez městna
W Hornjej Łužicy je hišće 371 wukubłanskich městnow njewobsadźenych. To je 120 wjace hač před lětom, kaž ze statistiki Budyskeje agentury za dźěło nastupajo wukubłanske wiki wuchadźa.
Budyšin (CK/SN). Pytajo wukubłanske městno běchu so lětsa 3 304 młodostni registrować dali, 140 mjenje hač loni. To je wuraz demografiskeho wuwića a wotbłyšćuje woteběracu ličbu porodow spočatk 2000tych lět, zwěsći Thomas Berndt, hač do kónca oktobra šef Budyskeje agentury za dźěło. Nimale dźesać procentow požadarjow póńdźe na wyše kubłanišćo abo na studij.
Njezastaranych je hišće 70 młodych ludźi. Dźěłaja „intensiwnje na tym, młodostnym, kotřiž chcedźa so wukubłać dać, zastup do powołanskeho žiwjenja zmóžnić“, rjekny bywši šef dźěłoweje agentury. Wonych 66 požadarjow, kotřiž su jako ćěkancy němski šulski system absolwowali, je so po słowach Berndta „woprawdźe etablěrowało“. Ličba poskićenych wukubłanskich městnow wotpowěduje z 2 893 nimale lońšej.
Kritizuja wašnje komunikacije
Chcedźa wo Zhorjelsku a Kamjensku chorownju wojować
Kamjenc/Zhorjelc (SN/BŠe). Wotpohlad, chorowni maltezow swj. Jana w Kamjencu a Carolusowu w Zhorjelcu předać, je zjawne zarjady a sakske socialne ministerstwo chětro překwapiło. Rozsud bu jenož w medijach wozjewjeny, štož je wulku kritiku zbudźiło. „Po wjacorych rozmołwach w minjenych měsacach bě stejnišćo w Zhorjelcu z jasnymi planami do přichoda po dobrym puću“, zdźěli tamniši wyši měšćanosta Octavian Ursu (CDU). To je nawodnistwo maltezow tež wjackróć wobkrućiło. To bě zdobom zakład rozmołwy z jednaćelstwom Carolusoweje chorownje, kotruž měješe wyši měšćanosta hakle spočatk zašłeho tydźenja, hdźež dźěše wo dalše wuwiće a kooperacije. „Zo su maltezojo nětko najprjedy medije informowali, je wjele dowěry zničiło“, Octavian Ursu wuzběhny. Jasne je, zo stej Carolusowa chorownja a měšćanski klinikum wažnej medicinskej zastaranišći w Zhorjelcu a regionje. „Wojujemy wo dobre rozrisanje a zachowanje dźěłowych městnow.“ Mjeztym je hižo namjet, zo měł Zhorjelski klinikum Carolusowu chorownju přewzać.
Wo powołanjach so wobhonili
Wodychnyć njemóža
Drježdźany (SN/at). Wukubłanje w rjemjesle je atraktiwne, wšako leži ličba nowych wukubłanskich zrěčenjow wo 5,2 procentaj (plus 108) nad niwowom lěta 2018. To rěka, zo 2 176 młodych ludźi swoje „karjeru“ w zawodach Drježdźanskeje rjemjeslniskeje komory zahaji. Kaž wona wčera informowaše, je so lětsa hač do kónca oktobra 493 žonow a 1 683 muži za rjemjeslniske wukubłanje rozsudźiło. Komora w tym zwisku rozprawja, zo startuja wone/woni swoje powołanske wuwiće pola „pódlanskeje hospodarskeje mocy“.
Zo je so wjace powołanskich započatkarjow za wukubłanje w rjemjesle rozsudźiło, budźi optimizm Andreasa Brzezinskeho, hłowneho jednaćela Drježdźanskeje rjemjeslniskeje komory. Docpěte „ličby su wuraz atraktiwity rjemjesła. Wodychnyć pak njemóžemy. Wo wjele bóle wužiwamy mjezywuslědk za to, zo bychmy za lěpšiny dualneho wukubłanja w rjemjesle a za wotpowědne wobłukowe wuměnjenja wabili“, Brzezinski wuswětla. Powołanje wozydłoweho mechatronikarja steji na dale čole nowych wukubłanskich zrěčenjow.
Wjace za potrjechenych činić
Žadanja nastupajo aktualizaciju brunicoweho plana za jamu Wochozy
Zhorjelc (AK/SN). Regionalny planowanski zwjazk Hornja Łužica-Delnja Šleska chce brunicowy plan za Wochožansku jamu dokładnje předźěłać, aktualizować a dale wjesć. Zaměr je prawnisku wěstosć docpěć, kaž předsyda Bernd Lange (CDU), Zhorjelski krajny rada, minjenu srjedu na zhromadźiznje zwjazka podšmórny. Jednohłósnje su zwjazkowi radźićeljo wobzamknyli, zo budu nastorki a pokiwy wotwažować, zapodate k wobswětowej rozprawje a k strategiskemu wobswětowemu pruwowanju. Na zakładźe wobzamknjenja ma nětko wobswětowa rozprawa nastać.
