Drježdźany (SN/BŠe). Hižo třeće lěto za sobu maja lěsy po cyłej Sakskej wulku suchotu znjesć. Čim dlěje perioda traje, ćim wjetše a wočiwidniše su jeje wuskutki. Na zakładźe kóždolětneje lěsneje rozprawy statneho knježerstwa, kotruž stej sakski minister za energiju, škit klimy, wobswět a ratarstwo Wolfram Günther (Zeleni) a prezident krajneho lěsnistwa Utz Hempfling wčera w Drježdźanach předstajiłoj, bu 6 720 štomow wšelakich družin dokładnje přepytowanych. „Wuslědki nas jara starosća. Wjerški štomow maja štwórćinu mjenje lisća abo jehličkow. Něhdźe 35 procentow rostlin je masiwnje wobškodźenych“, Günther nowinarjam rozkładźe. Wosebje potrjechene su šmrěki, dokelž jich korjenje tak hłuboko njesahaja. Dale wobkedźbuja fachowcy zjaw, zo su tež duby wobškodźene. Dnowna woda dale a bóle woteběra, a tak so jeje staw w zymje hižo njewuruna. Wšitke družiny štomow trajneje suchoty dla ćerpja. Ćim lóšo je za škódniki, předewšěm skórniki, rostlinam škodźeć. Jeničce 21 procentow přepytowanych štomow žane škody njepokazuje.

Marketingowa towaršnosć Hornja Łužica­-Delnja Šleska (MGO) lětuše zarja­dowanja łužiskich rybowych tydźe­njow najebać koronapandemiju dosć pozitiwnje hódnoći. Štyri swjedźenje, za kotrež běchu wabili, su wopytowarjo jara derje přiwzali.

Budyšin (SN/BŠe). Koronapandemija je so lětsa tež na łužiske rybowe tydźenje wuskutkowała. Najebać mnohe wotprajenja zjawneho wułójenja rybow z hatow je so MGO rozsudźiła, zaměrnje za za­rjadowanja wabić. Tak rozdźělichu 15 000 lětakow, informowachu w radiju a nowinach wo nazymskej zwičnjenskej inicia­tiwje. Předewšěm nowa wabjenska figura z mjenom Fischers Franzi bě zasadźena a je wosebje swójby informowała. „Ně­hdźe tři miliony ludźi smy z wabjenskimi akcijemi docpěli“, MGO ze sydłom w Budyšinje informuje. Zajim mjez ludźimi bě jara wulki a njedźiwajcy hygienowych naprawow a z tym zwisowacych wobmjezowanjow je dosć ludźi na swjedźenje přišło.

Korona nas wšěch trapi. Nimo hosćencarjow skorža tež łužiscy hatarjo. Mnohe swjedźenje wułójenja rybow z hatow su lětsa wupadnyli. Tež wotbytk ryby runjewon njezwjesela, štož wšak njezadźiwa, su dźě hosćency zawrjene, kotrež hewak rybu rady swojim hosćom porjedźeja. Na někotrych wsach drje su do druheho lock­downa hišće rybu kurili a lubowarjam předawali. Byrnjež žane hoberske mnóstwa njebyli, pomha to w nuzy znajmjeńša trochu hospodarić. Wótku do žita ćisnyli pak łužiscy rybarjo a hatarjo njejsu, runje tak ludźo w dalšich powołanjach nic, kotrež zastaranje nas wšěch ze žiwi­dłami a napojemi zaručeja. Woni so najebać ćežke połoženje dale wo to staraja, zo bychmy derje kryte blido měli a zo móžemy sej we wobchodach dale mjaso, kołbasu, chlěb kaž tež łužisku rybu kupić. Zdźěla woni wjac wukonjeja, zo njeby so ničo sypnyło. Runja sobudźěłaćerjam w chorownjach a hladarnjach sej woni naš dźak a připó­znaće zasłužeja. Janek Wowčer

Hižo dlěje hač dźesać lět pomhaja sobudźěłaćerjo Neustadtskeho twarca bydlenskich mobilow Capron potrěbnym dźěćom w Sakskej, předewšěm w Hornjej Łužicy. Kóžde lěto k hodam wobdaruja woni chowancow dźěsćownjow a dźěći, kotrež bjez staršeju a dalšich přiwuznych wotrostuja. Najrjeńši dźak přistajenym je posměwk wobdarjenych. Tele dny spřihotowaštej sobudźěłaćerce Linda Gnauck a Helga Kloss (wotlěwa) w firmowej centrali pakćiki, kotrež rozdźěla hač do hód w cyłkownje 16 wšelakich zarjadnišćach – mjez druhim w Neustadće, Zebnicy, Budyšinje a Zhorjelcu – a składu je tam za dźěći pod božodźěsćowy štom. Foto: Steffen Unger