Hospodarski spěchowar Wojerec ma wulke wizije
Hižo wot apryla nawjeduje Alexander Kühne wobłuk hospodarskeho spěchowanja města Wojerec. Poprawom bě rodźeny Wojerowčan powołanje fyzioterapeuta nawuknył, je jako tajki tež někotre lěta dźěłał a so zesamostatnił. Po studiju zjawneho hospodarstwa na Budyskej powołanskej akademiji bě wón sydom lět projektowy manager Wojerowskeho Łužiskeho technologijoweho centruma Lautech tzwr. Z bywšej hospodarskej spěchowarku města Franzisku Tennhardt je wón wšelake iniciatiwy kaž „hospodarsku snědań“ sobu organizował. Wo nowym dźěle, wo wužadanjach strukturneje změny kaž tež wo hospodarskich wizijach města a wokoliny je so z nim Andreas Kirschke rozmołwjał.
Čehodla trjeba město Wojerecy hospodarskeho spěchowarja?
Nowe areale sej wotkrywać
Choćebuz/Běła Woda (SN). Dalši dźěl znowawužiwajomneje pohórnistwoweje krajiny je předewzaće Łužiska energija a hórnistwo (LEAG) wčera při Ćežkej horje na kromje Běłeje Wody za wopytowarjow wotewrěła. Kaž koncern zdźěli, wjedu wot tamnišeje wuhladneje wěže bjezbarjerne puće po hižo lěta 2015 zapołoženych terasach do noweje prioritneje přirodoškitneje kónčiny. Tafle skedźbnjeja wopytowarjow na to, što maja na dale pod hórniskim dohladom stejacym terenje wobkedźbować. Areal twori nowowutworjenu južnu skłoninu Ćežkeje hory, kotraž bu Wochožanskeje jamy dla w lětach 2006 do 2008 po dwěmaj třećinomaj wotbagrowana.
Rekultiwowana kónčina na juhu Běłeje Wody wobsteji ze sto hektarow emisiskeho škitneho lěsa z tudyšimi družinami štomow a kerkow a z 340 hektarow wulkeje płoniny z wotewrjenej krajinu. Z njeje móžeš sej z hórskimi terasami nětko nimale 10,5 hektarow wulki areal pěši wotkryć. Terasy su z drjewinami zwosadźane, kaž su to dorničel, dźiwja róža a jałorc. Rozšěrjene wobłuki, mjez druhim z pěskowej holu, je dominuja.
„Poslednju milu“ přewinyć
Choćebuz (SN/at). Łužiska agentura mobility móže komuny we wjesnych kónčinach podpěrać, „poslednju milu“ přewinyć. To wuchadźa ze studije, zdźěłaneje w nadawku Hospodarskeho regiona Łužica we wobłuku projekta Łužiskeje dźěłarnje přichoda. „Poslednju milu“ mjenuja wotrězk, kotryž njeje hižo na zjawny bliskowobchad přiwjazany. Na wsach z toho njelěpšiny wurostu, dokelž su wobydlerjo na swójske wozydło pokazani.
Awtorojo studije namjetuja Łužisku agenturu mobility, kotraž wobchadne zwjazki přesahujcy w Sakskej a Braniborskej skutkuje. Agentura móhła na městnje gmejny nastupajo naležnosće mobility poradźować a je podpěrać konkretne naprawy zeskutkownić. Nastać ma regiony přesahowacy atraktiwny wobchadny poskitk. Studija wuchadźa za tajku agenturu z lětnych kóštow 1,6 milionow eurow. Dołhodobnje poručeja samostatnu towaršnosć krajow Sakskeje a Braniborskeje.
Prěnje testy w praksy běchu lětsa wot januara hač do meje we wokrjesomaj Dubja-Błóta a Zhorjelc a wunjesechu komunam rjad jednanskich poručenjow.
Po krizy z efektiwnišej strukturu
Z efektiwnišimi strukturami chcedźa turistikarjo w Hornjej Łužicy po ćežkim času korony dla na wuběrne wuwiće spočatk lěta nawjazać. Za to rozpušća Turistiski zwjazk Hornja Łužica-Delnja Šleska a přenjesu jeho nadawki regionalnej marketingowej towaršnosći.
Budyšin (SN/at). Dwójna struktura efektiwnemu dźěłu lědma polěkuje. A zo je přewšo wunošne za jedyn cil mocy wjazać, to su w Rudnych horinach z jeničkim turistiskim zwjazkom dopokazali. Budyski krajny rada Michael Harig (CDU), zdobom předsyda Turistiskeho zwjazka Hornja Łužica-Delnja Šleska (TVO) a dohladowanskeje rady Marketingoweje towaršnosće Hornja Łužica-Delnja Šleska (MGO), mjenowaše tónle přikład na njedawnej nowinarskej rozmołwje MGO takrjec mosćik k temje, kotraž tudyšim zamołwitym za turizm hižo dlěši čas pod nochćemi pali. Wot lěta 2016 běchu so z njej zaběrali.
Plany Tesle zjawnje wupołoža
Podstupim (dpa/SN). Změnjene twarske podłožki za planowanu twornju awtotwarca Tesla z USA w juhobraniborskej Grünheidźe we wokrjesu Wódra-Sprjewja chcedźa wot jutřišeho zjawnje wupołožić. To je braniborske wobswětowe ministerstwo wčera zdźěliło. Dohlad do podłožkow změja ludźo na krajnym zarjedźe za wobswět we wotnožce Frankfurt nad Wódru, w radnicy gmejny Grünheide, w radnicy w Erkneru a na hamće Spreenhagen. Wobmjezowanjow koronapandemije dla pak dyrbja so zajimcy do toho telefonisce přizjewić. Tak chcedźa zaručić, zo njeje přewjele ludźi w samsnym času na samsnym městnje.
Je to hižo druhe wobdźělenje wobydlerjow w procesu přizwolenja po zwjazkowym emisiskim zakonju. Změny planow za twar tak mjenowaneje gigafabriki chcedźa w hamtskim łopjenu wozjewić. Hač do 3. septembra 2020 maja wobydlerjo składnosć, swoje wobmyslenja zapodać. Tesla bě w zwisku z procesom přizwolenja twarske plany na dobro přirody we wjacorych dypkach změniła. Wšitke podłožki planowanje nastupajo su tež internetnje přistupne.
Region a stejnišći Bombardiera trjebaja wěstotu
Drježdźany (dpa/SN). Bombardier trjeba wěsty přistaw, rjekny sakski knježerstwowy šef Michael Kretschmer (CDU). Přistaw rěka Alstom; planowana fuzija z francoskim producentom ćahow pak hišće schwalena njeje. Tohodla chce twarc kolijowych wozydłow Bombardier Transportation z rukowanjom Zwjazka a krajow nadawki a dodawarjow zawěsćić. To je předsyda němskeho jednaćelstwa Bombardiera Michael Fohrer wčera po rozmołwje ze sakskim premierom a hospodarskim ministrom Martinom Duligom (SPD) wozjewił. Wo detailach nochcyše rěčeć. Kaž Kretschmer rjekny, ma Bombardier z rukowanjom přichodne měsacy podpěru dóstać. Sakska so angažuje, zo by dźěło na stejnišćomaj w Budyšinje a Zhorjelcu zaručiła.
Wěstota njewěsta?
Region před zajimawym tydźenjom
Berlin/Drježdźany (SN/BŠe). Tydźeń, kotryž so z dźensnišim dnjom zahaji, budźe hladajo na přichod łužiskeho brunicoweho rewěra jara zajimawy. Hišće do lěćneje přestawki dźě chcedźa zwjazkowy sejm a zwjazkowa rada zakoń wo zakónčenju wudobywanja brunicy schwalić. Njezadźiwa, zo w Sakskej jara kritisce na wobzamknjenja zhladuja, wšako chcedźa spušćomnu strukturnu změnu. Sakski wobswětowy a energijowy minister Wolfram Günther (Zeleni) žada sej na přikład dalše polěpšenja. „Wobmyslić měli postajenja k financowanju sćěhow, kotrež je wudobywanje brunicy wuskutkowało“, wón wuswětli a mjenuje na přikład problem dnowneje wody. „Sakska sedźi tu na financnej časowej bombje“, wón wuzběhny a pokaza na dojednanja mjez zwjazkowym knježerstwom a brunicowymi předewzaćemi, kotryž buchu minjene tydźenje wobzamknjene.
Maja jasnje mjenje dochodow
Zaměrowy zwjazk chce přiwšěm hač do kónca lěta čorne ličby pisać
Łaz (AK/SN). Turistiski wobłuk při Złokomorowskim jězoru měješe minjene tydźenje koronapandemije dla jasnje mjenje dochodow. To wuswětli minjenu wutoru předsyda zaměroweho zwjazka Łužiska jězorina Braniborska Detlev Wurzler we Łazu. „Wjac hač 80 procentow přenocowanjow smy hač k jutram zhubili. Hač do kónca meje so tele wuwiće njezměni“, wón rozkładźe. W struchłych ličbach so połoženje dokładnje wotbłyšćuje. Cyłkownje bě to 57 procentow mjenje hosći. „Přiwšěm smy hladajo na kónc sezony hišće optimistiske. Tak móžemy hač do kónca lěta přiwšěm hišće čornu nulu docpěć, najebać to zo mějachmy 800 000 eurow mjenje wobrota“, Wurzler rjekny.
Wotpočnišćo nad jězorom ma prioritu
Zaměrowy zwjazk sakska łužiska jězorina inwestuje lětsa 1,13 milionow eurow do wšelakich projektow, za čož sam 192 000 eurow nałoži. Jedne ćežišćo je twar wotpočnišća za wódnych pućowarjow nad Lejnjanskim jězorom z twarjenjemi a wonkownymi připrawami.
Łaz (AK/SN). Projekt je wobstatk lětušeho etata. Tón kaž tež hospodarski plan zaměroweho zwjazka 2020–2023 su radźićeljo předwčerawšim na posedźenju zwjazkoweje zhromadźizny we Łazu jednohłósnje schwalili.
Wupisanje za wotpočnišćo za wódnych pućowarjow su spočatk junija zahajili, hač do wutory mějachu poskitki předležeć. Zaměrowy zwjazk je štyri losy wupisał. „Zaměr je lětsa kónc awgusta twarić započeć“, rozjasni jednaćel Daniel Just. Nastać maja multifunkcionalne twarjenje, wonkowne připrawy za camping a caravaning kaž tež sanitarne připrawy. Na hornim poschodźe chcedźa zhromadnu wodowu stražu braniborskeje a sakskej wodoškitneje policije zaměstnić. Za zarjadnišćo su rumnosće z cyłkownej płoninu 180 kwadratnych metrow předwidźane.
