LEAG chce dźěłowe městna wotstronić
Choćebuz (dpa/SN). Koncern Łužiska energija a milinarnje (LEAG) předźěłuje hladajo na zakónčenje wudobywanja brunicy swoju rewěrowu koncepciju a zdobom pruwuje, hdźe móhł dźěłowe městna wotstronić. Pozadk toho su ćežke wobstejnosće na wikach, kaž LEAG wutoru zdźěli. Lětsa w běhu prěnjeju dweju měsacow su miłe wjedro, corona-wirus, swětowe hospodarstwo, płaćizny za płun a najwjetše dodawanje wětroweje miliny do syće wuslědk LEAG negatiwnje wobwliwowali. Dokładne ličby drje předewzaće dotal žane mjenowało njeje, přiwšěm so nawodnistwo prócuje šmórnjenje dźěłowych městnow socialnje znjesliwje přewjesć.
We widejowej powěsći nawody předsydstwa Helmara Rendeza je rěč wo „bolostnych rozsudach“ a wo pomjeńšenju zarjadniskeho wobłuka. LEAG dyrbi nastupajo wudawki nuznje na „borzdźidło stupić“. Zakoń wo kóncu brunicy tam tuchwilu rozjimuja. Hač do lěta 2038 dźě maja wšitke brunicowe milinarnje w Němskej zawrjene być.
Na demonstraciji so wobdźělić
Drježdźany/Budyšin (SN). Na hubjene połoženje ratarjow skedźbnić chce jutře sakske towarstwo „Wjesne kónčiny zwjazuja“ a namołwja wšěch sobudźěłaćerjow wobłuka, so na demonstraciji w stolicy Sakskeje wobdźělić.
Přičina zarjadowanja je posedźenje ratarskeho wuběrka Sakskeho krajneho sejma, kotryž chce wo zakładnych zaměrach nowelěrowanja hnojenskich postajenjow wuradźować a rozsudźić. Towarstwo, w kotrymž tež mnoho ratarjow z Łužicy sobu skutkuje, chce składnosć wužić a přitomnym rozkłasć, w kajkim špatnym stawje měrjenske stejnišća su, abo zo su na wopačnym městnje, tak zo k sfalšowanym wuslědkam dochadźa. Tež wohroženje eksistency ratarjow ma tema na Drježdźanskej demonstraciji być.
Nowi fachowcy maja wjelorake móžnosće
Wojerecy (JoS/SN). Cyłkownje 16 wučomnikow a přewuknjencow Wojerowskeje Towaršnosće za wu- a dalekubłanje (GAF) móže so wjeselić, dokelž su wuspěšnje swoje fachowe pruwowanje złožili. Prěni gratulanća minjeny pjatk běchu wučerjo a zastupjerjo wukubłanskich zawodow, kotřiž běchu přeprošenje kubłanišća sćěhowali.
Dobra bilanca, ale tójšto twarnišćow
Wjele wjac hosći hač w lěće 2018 je loni Hornju Łužicu wopytało. Marketingowej towaršnosći Hornja Łužica-Delnja Šleska je to přičina wjesela, nic pak wotpočinka.
Budyšin (UM/SN). 2019 bě dobre lěto za turizm w Hornjej Łužicy. Kaž Marketingowa towaršnosć Hornja Łužica-Delnja Šleska (MGO) zdźěla, je ličba přenocowanjow porno lětu do toho wo 116 189 rozrostła. To wučinja přirost 8,3 procentow a je wjac hač we wšěch dalšich turistiskich regionach Swobodneho stata Sakskeje. Zdobom bu prěni raz hranica dweju milionow přenocowanjow překročena. „Naša strategija płody njese“, hódnoćeše předwčerawšim jednaćel Olaf Franke na nowinarskej konferency w Budyšinje. Předewšěm měnješe wón ćežišća, kotrež zaměrnje zwičnjeja. „Při tym jedna so wo temy kaž swójbny dowol, aktiwny dowol a kulturne jězby“, zwurazni „najwyši zwičnjer“ regiona.
Wulke wužadanje lěsnistwu
Njeje lochko prawu družinu štomow za klimowu změnu namakać
Njeswačidło (JK/SN). Klimowa změna njewuskutkuje so jenož na wjedro a wotběhi počasow, ale ma drastiske wuskutki na wegetaciju, wosebje na lěsy. Tež sakske a tak łužiske lěsy su potrjechene.
Kak hodźi so na změny w lěsach a na nowu a njezwučenu situaciju reagować, bě wobsah póndźelneho zarjadowanja w Njeswačanskej přirodoškitnej staciji. Wotrjadnik w statnym lěsniskim zawodźe Sachsenforst Sven Mertens spyta wulkej ličbje zajimcow, předewšěm wobsedźerjow lěsow, pokazać, kak móhli wuskutki njedosahacych spadkow wurunać a kak hodźi so lěsnistwo do přichoda wukmanić, hdyž budźe lěs dyrbjeć wo eksistencu wojować.
Direkcija hišće njerozsudźiła
Bjerwałdski jězor ma hladajo na přirodoškit nadregionalny wuznam
Budyšin (SN/BŠe). Wosrjedź Bjerwałdskeho jězora ma přirodoškitne pasmo nastać, kaž z naćiska krajneje direkcije Sakskeje wuchadźa. Gmejna Hamor a turistiski zwjazk Łužiska jězorina wšak warnujetej, zo je potom na turistiku wusměrjene hospodarstwo wohrožene. „Najprjedy chcedźa wudobywanje brunicy zakónčić, a nětko zniča dalšu hospodarsku hałzu při Bjerwałdskim jězorje“, wobžaruje sakski předsyda FDP Frank Müller-Rosentritt. Budu-li wodowy sport, čołmikowanje a wudźenje zakazane, tež turisća njepřijědu. „Město toho zo so krajna direkcija z tajkimi naležnosćemi zaběra, měła přeća wobydlerjow gmejny wobkedźbować a jim nowu perspektiwu dać“, Müller-Rosentritt wuswětla.
Alstom dotalne spekulacije wobkrućił
Nětko njejsu to hižo žane spekulacije, ale wobkrućene informacije. Francoski koncern Alstom je wčera wozjewił, zo jednaja tuchwilu z kanadiskim koncernom Bombardier wo tym, jeho železnisku spartu přewzać.
Budyšin (SN/BŠe). Němska hospodarska nowina Handelsblatt bě minjeny tydźeń informowała, zo chce předewzaće Bombardier swój železniski wobłuk za něhdźe sydom miliardow eurow zhotowjerjej železniskeje techniki Alstom předać. Hač do wčerawšeje póndźele běchu to hišće ryzy spekulacije, doniž njeje francoske předewzaće informacije wobkrućiło. Přiwšěm Alstom zdźěli, zo hišće ničo doskónčnje rozsudźene njeje.
Štomowy tykanc a lód z manufaktury
Marie Läser sej són wo swójskim předewzaću spjelnja a zawěsća zdobom zachowanje staršiskeho zawoda
Aromatiski a pikantny klasiski štomowy tykanc słodźi. Pječwo změšeja pjekarjo z jejkow, butry, cokora, muki, marcipanoweje masy, korjeninow a dalšich přidawkow. „Pječemy wšelake warianty. Předewšěm rokotnik (Sanddorn) a cymt stej za słód charakteristiskej. Štomowy tykanc přihotujemy tu hižo w pjatej generaciji“, wuswětla konditorska mišterka Marie Läser ze Stareje Darbnje. We wubědźowanju wo łužiske myto załožerjow eksistency (LEX), kiž bu loni spožčene, wudoby sej jeje koncept „Załoženje dožiwjenskeje kofejownje z manufakturu“ druhe městno. Za to přepoda jej Łužiska hospodarska iniciatiwa (WiL) myto we wysokosći 2 500 eurow. „Tole mje jara zmuži a chětro zwjeseli. Jury je mi po tym hišće drohotne pokiwy hladajo na załoženje firmy, zwičnjenje a turizm dała“, młoda konditorka wuswětli.
Image łužiskeje ryby polěpšić
Bjez rybarjow kulturna krajina Hornjołužiska hola a haty hižo njeeksistuje. Runje ći pak maja so dźeń a ćešo. Wjedrowe kapriole, njepřipóznawace hódnoćenje jich dźěła, stupace kóšty atd. jich poćežuja. Minjeny pjatk zahajeny projekt ma nětko pomhać.
Rakecy (SN/BŠe). Łužiska ryba je marka, ale nima po wšěm zdaću tajku hódnotu, kaž sej to rybarjo, turistikarjo a hosćencarjo přeja. Minjeny pjatk su tuž w Rakecach zahajenske zarjadowanje wosebiteho projekta přewjedli, při čimž chcedźa iniciatorojo – Marketingowa towaršnosć Hornja Łužica-Delnja Šleska (MGO) kaž tež Leaderowa kónčina Hornjołužiska hola a haty – za nowymi pućemi a idejemi pytać, zo móhli image łužiskeje ryby zesylnić. „Nimamy-li hižo dosć rybarjow, njeje tež škit přirody w hatnej kónčinje zaručeny“, wuzběhny Zhorjelski krajny rada, prezident krajneho rybarskeho zarjadnistwa Bernd Lange (CDU), a skedźbni na wažnosć projekta. Ludźo měli sej wuwědomić, zo wobhospodarjene haty kulturnu krajinu zachowuja a zawěsćeja. Łužiska ryba je tuž trěbna a bytostna.
Boja so mjenje hosći z Chiny
Drježdźany (dpa/SN). Sakska je tež chinskim turistam powabna kónčina. Hač na Bastaju w Sakskej Šwicy, w krajnej stolicy abo w Lipsku, wšudźe zetkawaš wćipnych ludźi z wulkeho kraja srjedźizny. Aktualne wuwiće nastupajo rozšěrjacy so corona-wirus pak sakskej turistiskej branši strach načinja. Hotelownicy, gastronomojo a dalši posłužbnicy branše boja so pobrachowacych dochodow, njepřipućuja-li chinscy hosćo, kaž su knihowani.
„Zakaz wupućowanja a šmórnjene lěty wězo tež turistikarjam škodźa“, zdźěli Ines Nebelung, rěčnica Towarstwa turizm-marketing Sakskeje, na naprašowanje powěsćernje dpa. Dokładne wuskutki pak njehodźa so dotal w jasnych ličbach zwuraznić. Januar a februar njejstej měsacaj z jara wjele turistami w swobodnym staće. Hač do hłowneho pućowanskeho časa w lěću so sakscy turistikarjo nadźijeja, zo so połoženje zaso změruje.
W lěće 2018 mějachu w Sakskej přibližnje 71 400 přenocowanjow chinskich hosći. Hač do lońšeho nowembra bě jich 69 200. Cyłkownje widźane pak su woni jeno snadny dźěl turistow z wukraja.
