Wobchadny zwjazk tarify zwyšił
Po dwěmaj lětomaj je wobchadny zaměrowy zwjazk Hornje Łobjo (VVO) swoje tarify 1. awgusta wo přerěznje 3,9 procenty zwyšił. Hač do klětušeho pak měli płaćizny najprjedy raz stabilne wostać.
Budyšin (SN/mwe). Wobchadny zaměrowy zwjazk VVO widźi přičiny zwyšenja swojich tarifow wot 1. awgustej 2020 hłownje w stupacych kóštach za energiju kaž tež w płaćenju wyšich mzdow swojim sobudźěłaćerjam. Potrjechene wot přiměrjenja tarifow za jězdźenki su wosebje ći, kotřiž su w městach z nadróžnej a z busom po puću. Płaćizna za jednu jězbu w jednym tarifowym pasmje je na přikład we Wojerecach a Budyšinje wo dźesać centow na 2,50 eurow rozrostła. Za dlěše jězby přez wjacore tarifowe pasma postupi płaćizna na jednu jězbu samo wo 20 hač do 40 centow. Dnjowe karty za jedne tarifowe pasmo su po pjeć lětach prěni króć wo 50 centow dróše. Za dlěše čary kaž tež za swójby a małe skupiny stupaja płaćizny hač do dwaj euraj. Tydźenske jězdźenki wostanu stabilne, měsačne karty pak su nětko wo přerěznje 3,3 procenty dróše.
Za energijowy přewrót a stabilizaciju milinoweje syće
Po jednym lěće twarskeho časa „BigBattery Łužica“ LEAG na probu dźěła
Milina zdawa so w Němskej samozrozumliwa być. Smy so na to zwučili, zo je zastaranje zaručene. Na časy, w kotrychž elektriska energija wjacore hodźiny k dispoziciji njebě, so snano starše generacije hišće dopominaja. Miks energijow, dźensa do zastaranskeje syće dodawanych, je wo tójšto wobšěrniši hač hišće před třomi lětdźesatkami. Tohodla je syć druhdy jara wućežena, samo hač k hranicy přećeženja. Trjeba tuž je zastaranje z milinu stabilizować.
Zaso raz steji Čorna Pumpa z projektom w srjedźišću energijownistwa, kotryž ma směrodajny do přichoda być. A zdawa so, zo koncern Łužiska energija a milinarnje (LEAG) z nim mjenje kontrowersow w ludnosći zbudźa hač předchadnik Vattenfall Europe w lěće 2008 z pilotowej připrawu k wotšćěpjenju wuhlikoweho dioksida z milinarnjoweho procesa. Tehdyše prócowanja, klimješkodźacy płun dlěje do powětra njepušćeć, běchu zwrěšćili, dokelž je wobydlerjo njeakceptowachu.
Dalša kročel do směra přesydlenje
Nowa štyrnaće hektarow wulka twarska přestrjeń na sewjeru Slepoho je hotowa. Tam móža wobydlerjo „stareho Miłoraza“ bórze twarić započeć, informuje Choćebuski koncern Łužiska energija a milinarnje (LEAG).
Slepo (AK/SN). Přizamknjenje stejnišća Noweho Miłoraza sewjernje Slepoho mjez Lěskowskej a Dźěwinskej drohu je hotowe, zdźěli nowinski rěčnik předewzaća Łužiska energija a milinarnje (LEAG) Thoralf Schirmer. Wot julija za tam prěnje chěže twarja. „Napřećo wobydlerjam Miłoraza a wšitkim potrjechenym smy přilubjenja spjelnili a wšitke dźěła za nowe stejnišćo po planje běža“, wuswětli nawoda wobłuka infrastruktura a hórnistwo pola LEAG Martin Klausch. „Hižo w nazymje budu prěnje fundamentowe betonowe platy za nowe domy widźeć, kotrež na dospołnje přizamknjenych twarskich parcelach kidaja.“ Zo su tak spěšnje z dźěłami postupowali, bě dźakowano miłemu wjedru móžno. Zdobom wobchadźeše LEAG jara fairnje a konstruktiwnje z nowymi wobydlerjemi, z Trjebinskej a Slepjanskej gmejnu kaž tež ze wšěmi wobdźělenymi předewzaćemi.
Zdźěłaja knihu wo rjemjesle
Lubin (SN/MiR). Nowa kniha ma wo rjemjesle w Błótach powědać. Za to je braniborske ministerstwo za hospodarstwo, dźěło a energiju spěchowanskemu towarstwu Aquamediale w Lubinje 20 000 eurow přewostajiło. Pjenjezy pochadźeja z lotowych srědkow. Klětu w septembru chcedźa w Slopišćach (Schlepzig) wotměć wustajeńcu Aquamediale „Wuměłske rjemjeslniske tworjenje“. W tym wobłuku předstaja potom tuchwilu nastawacu knihu wo rjemjesle. Wobsah edicije maja być zašłosć, přitomnosć a ideje do přichoda nastupajo regionalne rjemjesło. Zaměr projekta je, zjawne wědomje tworić za towaršnostnu hódnotu a samozrozumjenje tradicionalneho rjemjesła.
Po słowach ministra Jörga Steinbacha (SPD) je „rjemjesło nimo turizma w Błótach wosebity faktor za hospodarstwo. Tež a runje w digitalnym času su rjemjeslniske zawody trěbne, kotrež so wo dźěłowe městna a tworjenje regionalnych hódnotow staraja. Zawody w Błótach maja wažnu funkciju, dać młodym ludźom perspektiwu w domiznje. Knižny projekt ma pokazać, kotru hódnotu mějachu a maja rjemjeslnicy za błótowski region.“
Hornčerske wiki derje wopytane
Lětsa žane dobre žně kórkow
Lubin (dpa/SN). Plahowarjo kórkow w Błótach zhladuja ze starosćemi na lětuše žně. „Lěto je wobćežne, nic jenož korony dla“, rjekny jednaćelka Błótowskeho zwjazka Melanie Kossacojc. Wjedro je přenjewobstajne, nocy su zdźěla přezymne. Kórki trjebaja znajmjeńša 15 stopnjow. W juniju su temperatury hač na pjeć stopnjow spadnyli. To je zeleninje přewjele, tak Kossacojc. Nimo toho su rostliny lětsa wot chorosćow wosebje potrjechene.
Tuchwilu su po jeje informacijach hakle połojcu mnóstwa lońšeho lěta nažnjeli. Kossacojc wočakuje straty pola plahowarjow a w konserwowych fabrikach. Ratarjo nadźijeja so lěpšeho wjedra w přichodnych pjeć tydźenjach, zo móhli deficit tak derje kaž móžno wobmjezować. Wokomiknje wočakuja mnóstwo něhdźe 30 000 tonow kórkow k zawarjenju a k bělenju. Koronakriza wuměnjenja na žnjach přidatnje poćežuje. Hygieniske předpisy a škitne naprawy zawinuja ratarjam přidatne kóšty. W Błótach plahuje dźewjeć předewzaćow kórki na cyłkownje 500 hektarach. W něhdźe dwanaće zawodach je předźěłuja.
Dźěłarnistwo žada sej wjace mzdy
Fachowcow w twarskim wobłuku je dźeń a mjenje. To drje ničo nowe njeje. Hladajo na běžne tarifowe koło pak měli połoženje wobkedźbować a hižo nětko na přichodnych sobudźěłaćerjow myslić. Hłownje dźěłarnistwo na to mysli, mzdu zwyšić.
Budyšin (SN/BŠe). Twarska branša ma dale a mjenje fachowcow. Tež w Budyskim wokrjesu móhło so to z chutnym problemom stać, warnuje industrijne dźěłarnistwo twarstwo-agrar-wobswět (IG twar) z pokazku na statistiku zwjazkoweje agentury za dźěło. Z wobličenjow wuchadźa, zo je dźeń a ćešo fachowcow za njewobsadźene dźěłowe městna nańć. Porno lońšemu njebě cyłkownje 117 městnow branše dlěje hač 90 dnjow wobsadźenych. Před lětomaj bě to hišće 97 a lěto do toho 86 městnow.
Swójby běchu prěnje, kotrež zeznajomichu so po wobmjezowanjach ...
Rjemjeslniske wiki wulce powabne byli
Bórkowy (mih/SN). Ratarske wudźěłki a rjemjeslniske kmanosće su minjeny kónc tydźenja na mjeztym 19. błótowskich rjemjeslniskich a ratarskich wikach w Bórkowach widźeć a dožiwić byli. Najwšelakoriše twory za kuchnju a domjacnosć poskićachu tam ratarjo a producenća ze wšeho regiona. Woni přiwabichu ludźi z čerstwym chlěbom, mjedom, sadom a zeleninu, lanym wolijom kaž tež z błótowskim winom a palencom. Tež rjemjeslnicy běchu zaso pódla. Hornčerjo, rězbarjo, třěchikryjerjo ze sćinu a točerjo škleńcy pokazachu swoje zamóžnosće. Koronakrizy dla njebě lětsa žanych kulturnych přinoškow. Nimo toho běchu wiki dźělene: Rjemjeslnicy a ratarske zawody prezentowachu so na wulkim swjedźenišću, město toho zo dyrbjachu předawarjo napojow a jědźow zwonka naměsta wostać.
Balansa wažny zakład wuspěcha
Budyšin (SN). Za čas koronakrizy kroči Budyske předewzaće Deutsche Backofenbau GmbH DEBAG po nowych pućach, zo by swojich přistajenych njeběrokratisce podpěrało. „W dobrych a předewšěm w časach korony měli so dźěłodawarjo wo swojich sobudźěłaćerjow starać“, měni nawodnistwo, kaž w nowinskej zdźělence rěka. Při wšěch wužadanjach je wažne, „wobzor šěrić a předewšěm zrozumjenje za nowe ćežke połoženje kóždeho jednotliwca měć. Chcemy swojim přistajenym pokazać, zo jim cyle pragmatisce při zmištrowanju wšědneho dnja za čas korony pomhamy. Předewšěm hladanje dźěći bě mnohim wažna tema“, rozłožuje jednaćel Debag Jost Straube. Zo móhli starši hladanje dźěći zaručić, je zawod časowe konta přistajenych wulkomyslnje napjelnił. Zdobom zmóžnichu jim dźěłowe časy fleksibelnje wuhotować – potajkim, zo móža dźěłać, hdyž so jim najlěpje hodźi.
