Drježdźany/Budyšin (SN/at). 1. meja jako dźeń dźěła budźe koronapandemije dla lětsa cyle hinaša, hač smy to zwučeni. Tež w Budyšinje, Zhorjelcu abo Běłej Wodźe je DGB Sakskeje planowane zarjadowanja dawno wotprajił. Ludowy swjedźeń, na kotryž je Lěwica we Wojerecach přeprosyła, tohorunja njebudźe.
Mejske hesło rěka lětsa „Z přistojnosću wotstawk dźeržeć – Solidarisce njejsy sam!“. Druha sada je mjeztym tajku aktualitu nabyła, kajkuž njeje nichtó předwidźeć móhł, rěka ze zwjazka sakskich dźěłarnistwow, kotryž chce w syći jutře live wusyłać, a to pod hesłom: „My tu smy. Smy mnozy. A dźeržimy hromadźe.“
„Naše žadanja na politikarjow zwuraznjamy jako DGB Sakskeje lětsa w třoch internetnych widejach a na Facebooku, kotrež budu jutře přistupne“, rozłožuje Dana Dubil, regionalna jednaćelka DGB wuchodneje Sakskeje. Někotre postajenja stata w koronakrizy njejsu po jeje słowach přemyslene dosć. Rjadowanje za krótkodźěłacych kaž tež staršiski pjenjez matej so wot zakonskich 60 resp. 67 procentow na 80 resp. 87 proc. korony dla polěpšić, sej DGB žada.
