Z wubědźowanjom wabja turistow do Łužicy
Hamor (AK/SN). Łužiska rallye je drje w srjedźnej Europje najdlěše wubědźowanje awtow na šćerku. 122 wot dohromady 145 kilometrow jědu wobdźělnicy na tajkej podłoze. Wot 5. hač do 7. nowembra so Łužiska rallye mjeztym 29. raz wotměje. „Předewšěm financowanje a wěstotu zaručeć je kóžde lěto wužadanje“, praji Wolfgang Rasper z Rallyejoweho a wodosportoweho kluba Łužica. „Lětsa změjemy wosom hódnoćenjow. Za přihladowarjow zarjadujemy jědnaće městnow. Te pola wěže njetopyrjow w Nowym Lubolnju (Neuliebel) blisko Rěčic móžu wosebje doporučeć, dokelž wottam wulki areal z křiwicami a małym nasypom přewidźiš.“
