Z nowym předsydstwom
Nowoslicy (SN/at). Nowe předsydstwo nawjeduje skutkowanje Towarstwa k wuwiću hornjołužiskeje hole a hatow. Wuzwolili su je za dobu hač do oktobra 2023 na wčerawšej sobustawskej zhromadźiznje w Nowoslicach, kaž cyłk zdźěli.
Zastojnstwo předsydy přewozmje Njeswačanski wjesnjanosta Gerd Schuster (CDU) a naslěduje tak wjelelětneho muža na čole towarstwa Marka Kowarja. Wón kaž tež zapisowar Wolfgang Zettwitz njejstaj znowa kandidowałoj a tak swojej funkciji młódšimaj přepodałoj.
Naslědnica Zettwitza jako zapisowarka je Katharina Jurkowa, kotraž zdobom Domowinu w předsydstwje zastupuje. Rakečanskeho wjesnjanostu Swena Nowotneho (CDU) su za pokładnika wuzwolili. Torsten Roch, nawoda biosferoweho zarjada, skutkuje jako rěčnik předsydstwa za dźěłowu skupinu turizm. Jednaćel MKH Kulow Tobias Kockert a Markus Gießler, referent Budyskeho wyšeho měšćanosty, gremijej dale přisłušataj. Wot sobustawskeje zhromadźizny nowowuzwolenaj čłonaj předsydstwa staj wjesnjanosta Ralbic-Róžanta Hubertus Ryćer a Kulowski měšćanosta Markus Posch (wobaj CDU).
Dohlad do Tesla-twornje dóstali
Wyša mzda jako fairne připóznaće
Budyšin (SN). Wuhotowarjam krajinow w Budyskim wokrjesu po tarifje jasnje wjace pjenjez přisteji. W septembrje su jich mzdy wo 3,4 procenty přiběrali. Přichodne lěto slěduje dalši plus wo 3,3 procenty. To zdźěli dźěłarnistwo Twarstwo-agrar-wobswět (IG BAU), kotrež přistajenych zdobom namołwja swój mzdowy lisćik pruwować. „Ze septemberskim wotličenjom měli přidatne pjenjezy na konće być. Štóž je dóstał njeje, měł so na dźěłarnistwo wobroćić“, praji Peter Schubert, předsyda IG BAU we wuchodnej Sakskej. Po informacijach dźěłoweje agentury je we wokrjesu něhdźe 540 ludźi we wobłuku wuhotowanja zahrodow, krajin a sportnišćow přistajenych.
Wot klětušeho płaća prěni raz samsne mzdy na wuchodźe a zapadźe Němskeje. „Dlěje hač 30 lět po politiskim přewróće njeje w branši hižo žanoho rozdźěla. To je dawno načasu“, dźěłarnik wuzběhny. Nimo toho so wyša mzda pozitiwnje na atraktiwitu zelenych powołanjow wuskutkuje. Zdobom k tomu přinošuje, njedostatkej fachowcow znapřećiwić.
Serbske předewzaće w Stuttgarće
Technika ma sport modernizować
Drježdźanska rjemjeslniska komora so w Běłej Wodźe angažuje a podpěruje nowy wobłuk
Sportowu technologiju jako nowy wobłuk łužiskeho rjemjesła chcyše Drježdźanska rjemjeslniska komora poprawom 4. oktobra w Běłej Wodźe oficialnje zahajić. Koronapandemije dla pak bu termin přesunjeny. Projekt je naprawa strukturneje změny a ma dźěłowe městna tworić. Nowy wobłuk bu hižo do toho raz předstajeny.
W prěnim wokomiku skutkuje scenerija trochu spodźiwna: Młody muž, kiž ma šmóratko na kóncu dołheho kija připinjene, balansuje je něhdźe meter wysoko nad rjapom konja. Pomałku pohibuje wón komunikaciski nastroj, kiž wšak ma hišće wjele wjac funkcijow. „Na te wašnje móžu rjap konja po milimetrach dokładnje skenować“, wuswětla Jonny Fischer, kaž młody muž rěka. Cyle dokładnje wužiwa wón za to program Face ID – aplikaciju, kotraž poprawom spóznawanju mjezwočow słuži. To rozłožuje Fischer zajimcam, kotřiž su na předstajenje do Krušowa (Groß Krauscha) w Zhorjelskim wokrjesu přijěli.
Wobchadne połoženje města so polěpši
Wojerecy (AK/SN). Město Wojerecy chce swoje puće, chódniki a kolesowarske šćežki dale saněrować. Tež wulke pućniki w centrumje města budu ponowjene, zdźěli nětko nawodnica fachoweje skupiny za hłubokotwar a wodźiznowy management Sabine Masser. „Hižo lěta pućniki w nutřkownym měsće na planje steja. Snano nalěto, dóstanjemy-li wotpowědne spěchowanje, móžemy naprawu zwoprawdźić“, wona rozłoži. Cyłkownje jedna so wo 20 taflow, za čož ma město nad Čornym Halštrowom 75 000 eurow k dispoziciji. Tež fundamenty budu w tym zwisku ponowjene. Wosebje tafle podłu zwjazkoweje dróhi B 96 a Dr. Wilhelma Külzoweje hasy su potrjechene.
Wuwiće turizma ma prioritu
We łužiskej jězorinje nimaja přichodnje płuwace wulkopřestrjenjowe fotowoltaikowe připrawy być. K tomu wuzna so wčera zaměrowy zwjazk Łužiska jězorina Sakskeje na zwjazkowej zhromadźiznje w Tornowje. Tam su zasadne wobzamknjenje schwalili, sćěhujo podobne wozjewjenje wole braniborskeho zaměroweho zwjazka z meje.
Tornow (AK/SN). Na sakskej stronje zwjazkoweho teritorija ma přichodnje zasadny zakaz za płuwace fotowoltaikowe připrawy płaćić. Jednaćelnja měła tele wobzamknjenje wobkedźbować a so po nim měć. Komuny w tym wobłuku su namołwjene na zasadne wobzamknjenje w swojim twarskim wodźenskim planowanju sobu dźiwać. „Nastupajo wuwiće w jězorinje je hižo dosć zawjazkow“, rjekny Budyski krajny rada Michael Harig (CDU), předsyda zaměroweho zwjazka Łužiska jězorina Sakskeje. „Wabju za to, wuwiće w cyłku wobhladować. Smy winowaći pozdźiše wužiwanje krjudowaneje krajiny za turizm zmóžnić. Na to bychmy so koncentrować dyrbjeli.“
MGO strategiju předstajiła
Budyšin (SN/BŠe). Marketingowa towaršnosć Hornja Łužica-Delnja Šleska (MGO) je minjeny pjatk sakskej ministerce za kulturu a turizm Barbarje Klepsch (CDU) hač do lěta 2025 wusměrjenu strategiju předstajiła. Za Hornju Łužicu su to jasne a kwalitatiwne zaměry. Tak ma hač do lěta 2025 ličba přichadow wot 710 000 na 800 000 rozrosć a přebytk so wot 2,7 na tři połne dny podlěšić. Zo móhli zaměraj docpěć, su w turistiskej strategiji wotpowědne naprawy pomjenowane. „Wjeselu so, zo chce Hornja Łužica swoje poskitki polěpšić a wjace hosći zdobyć. Za prawe tohorunja mam, zo wusměrja so region na turistiske trendy kaž regionalne wudźěłki, aktiwne a campingowe poskitki“, rjekny ministerka.
Jednaćel MGO Olaf Franke zdźěli, zo bě jim wažne žiwu a sćěhujomnu strategiju wuwić. Zaměry su w lětnych planach z konkretnymi naprawami pomjenowane. Ćežišća su mjez druhim mobilita, regionalne tworjenje hódnotow, dalše profilowanje kulturneho pućowanskeho regiona a dalewuwiće kolesowarskich poskitkow. We wšěch wobłukach chcedźa digitalne móžnosće bóle zakótwić.
Terma w Korzymje zaso wopytowarjow wita
Korzym (UM/SN). Znata Korzymska terma je po połdralětnym zawrjenju wot minjeneho pjatka wopytowarjam zaso přistupna. Předsydźe zamołwiteho zaměroweho zwjazka Svenej Gabrielej je to přičina wjesela a dźakownosće. „Dźakuju so w prěnim rjedźe sobudźěłaćerjam, kotřiž su nam najebać zawrjenje a krótkodźěło swěrni wostali“, wón wuzběhnje. Z něhdźe 30 přistajenymi bě kupjel do nuzoweje přestawki šła, z runje telko ludźimi su ju nětko zaso wotewrěli.
