Swójske dochody njewobeńdźomne
Zaměrowy zwjazk Łužiska jězorina Sakskeje je přiměrjenje wuměnjenjow za wužiwanje swojich připrawow wobzamknył. Wšako trjebaja za přichod dochody, to wobeńdźomne njeje.
Tornow (AK/SN). Swoje připrawy w přichodźe zaměrnišo wobhospodarjeć a z wičnjeć, na to so Zaměrowy zwjazk Łužiska jězorina Sakskeje nastaja. Dołhodobnje chce sam dochody nadźěłać. To je jednaćel Daniel Just předwčerawšim w zwjazkowej zhromadźiznje w kulturnym domje Tornow podšmórnył. Zwjazkowi radźićeljo su přiměrjenje wužiwanskich wuměnjenjow za připrawy zwjazka jednohłósnje schwalili.
Zasydlenje w Gubinje postupuje
Kanadiske surowiznowe předewzaće Rock Tech Lithium chce w Gubinje při mjezy z Pólskej za twar baterijow wužiwajomny litiumowy hydroksid za elektroawta zhotowić. Prěnje dźělne dowolnosće su zapodate. Za něšto měsacow móhli twarić započeć.
Gubin (dpa/SN). Planowane zasydlenje kanadiskeho předewzaća za surowizny Rock Tech Lithium w braniborskim Gubinje, wokrjes Sprjewja-Nysa, bywa dźeń a jasniše. Město je z twar přihotowacymi naprawami na za to wupokazanym industrijnišću započało, zdźěli měšćanosta Fred Mahro powěsćerni dpa. K tomu słuša na přikład přesydlenje družin zwěrjatow, kotrež su po dorozumjenju z přirodoškitnym zarjadom do narunanskich habitatow přeměstnili. Dźěła chcedźa hač do kónca septembra zakónčić. Předewzaće z Kanady bě teren loni wot města a měšćanskich zawodow kupiło.
Woda nětko šefowy nadawk
We wodźiznach Łužicy hač do Berlina so situacija dale přiwótřa
Zły Komorow (SN/BŠe). Wjele wobydlerjow we Łužicy zhladuje z wulkej starosću na trajacu suchotu, wšako je dale a mjenje wody k dispoziciji. Nimale we wšitkich rěkach ćeće tuchwilu mało wody a přichodne dny meteorologojo wjele spadkow njewěšća. Tež ze stron politiki so nětko něšto hiba. Tak chce sakske knježerstwo 27. junija zakładnu koncepciju wodoweho zastaranja 2030 předstajić. Suche lěta w zašłosći wšak su dopokazali, zo so klima měnja a suche periody z mało spadkami přiběraja.
Zawody zaso swoje wrota wćipnym hosćom wotewrěli
Budyšin (CS/SN). „Pózdnja změna“ je woblubowane zarjadowanje, na kotrymž móža Budyšenjo swoje tu zasydlene industrijne a rjemjeslniske zawody zeznać. Minjeny pjatk, jako je wjele sobudźěłaćerjow hižo do kónca tydźenja startowato, wotewrichu tudyše zawody wrota wćipnym wopytowarjam. Akcija wotrjada hospodarske spěchowanje města Budyšin měri so předewšěm na młodych ludźi, kotřiž so hišće za powołanjom rozhladuja. Ale tež dorosćeni składnosć rady wužija, zo bychu raz za hewak zawrjene wrota pohladali. Pjatk je so 23 zawodow na pózdnjej změnje wobdźěliło. Cyłkownje dźewjeć turow bě předwidźanych. Najspěšnišo wuknihowana bě tura 4 z wopytom twornje Alstom.
Předewzaće chce aktiwne być
Transformacija bě ćežišćo Wuchodoněmskeho hospodarskeho foruma
Bad Saarow/Choćebuz (SN/at/BŠe). Wo šansach a wužadanjach Łužicy su wčera na Wuchodoněmskim hospodarskim forumje w Bad Saarowje diskutowali. Wobdźělenaj běštaj zdobom społnomócnjeny braniborskeho ministerskeho prezidenta za Łužicu dr.-ing. Klaus Freytag a nawoda předsydstwa LEAG Thorsten Kramer. Kaž předewzaće informuje, je Kramer pod hesłom „Nowe perspektiwy tworić – wo transformaciji regionow“ strategiske ćežišća nastupajo transformaciju LEAG rozjimał. Swoje předewzaće „budźe aktiwny dźěl teje transformacije“, wón rjekny. Z dwěmaj ćežišćomaj chcedźa koncern strategisce wuwiwać. „Z wobnowjomnymi energijemi a z nowym zawěsćenym wukonom našich milinarnjow wuměnjenja za nowe tworjenje hódnotow a wěstotu zastaranja zaručamy“, nawoda předsydstwa wuwjedźe.
Šulerjo so lětsa zaso socialnje angažuja
Budyšin (SN/BŠe). „Jeli chcedźa so dźěći a młodostni socialnje angažować, měli jich dorosćeni ze wšej mocu podpěrać“, wuzběhnje sakski hospodarski minister Martin Dulig (SPD) a zhladuje z tym na lětuši dźeń „genialsocial“, kotryž je za 12. julij planowany. W Sakskej wotměje so akciski dźeń mjeztym hižo 18. króć. Při tym přewozmu šulerjo mjeńše nadawki w zawodach abo pola priwatnych wosobow a swoju mzdu skónčnje darja. Połojca pjenjez je za projekty postajena, su wusměrja so na pomoc ludźi w chudych krajach wusměrjene. Dalše 30 procentow mzdy móža šule, kotrež so na akciji wobdźěla, za swoje projekty wužiwać. Zbywace 20 procentow pak su za kubłanske dźěło młodostnych planowane. „Ideja je tuž genialna a socialna“, Dulig podšmórny.
Pasma znowa rozšěrili
Budyšin (SN/BŠe). Hladajo na dalše pady afriskeje swinjaceje mrětwy mjez druhim tež w Budyskim wokrjesu je swobodny stat nětko škitne pasma přiměrił a rozšěrił. Na sewjeru Budyskeho wokrjesa bu zawěranske pasmo II w gmejnach mjez Kamjencom, Sepicami a Njedźichowom změnjene a saha mjeztym hač na mjezu wokrjesa. Wobstejace pasma njebuchu změnjene a postajenja tam dale płaća. „Pasma smy ze zarjadami EU wothłosowali a přiměrili. Ručež móžno płoty přihotujemy, tak zo móhli dalšemu rozšěrjenju na zapad zadźěwać“, wuswětli statny sekretar Sakskeho socialneho ministerstwa a nawoda krizoweho staba afriskeje swinjaceje mrětwy Sebastian Vogel. Wón namołwja zdobom plahowarjow skotu so po wěstotnych naprawach měć, tak zo wirus domjacym swinjam njezeškodźi.
Tohorunja maja hajnicy na hońtwje postajenja wobkedźbować. Předewšěm měli woni pomhać dźiwje swinje nańć a zatřělić. Wudźěłki dźiwjeho swinja pak njeměli postajene pasma wopušćić.
Tež w Mišnjanskim wokrjesu su zarjady dalše pady swinjaceje mrětwy zwěsćili a pasma wotpowědnje přiměrili.
Pjeć lět wuspěšna słužba
Łazk (JK/SN). Brune abo ćmowožołte awta ze značku FN a z napisom k wšelakim posłužbam wuhladaš na dróhach Budyskeho wokrjesa dźeń a husćišo. Tele awta njewoža jenož pomoc, posłužbu a hladanje potrěbnym do domu abo zahrodki, ale často tež přećelne słowo a wokomik zabawy. A to hižo pjeć lět. Nowakec mandźelskaj Marika a Frank we Łazku staj w prawym času měłoj prawu ideju. A zo to hižo pjeć lět derje běži, so Nowakecam a jich znatym skoro wěrić nochce. To pak je runje přičina, sej raz mały wotpočink popřeć a dźakownje wróćo zhladować. Minjenu sobotu staj tuž Marika a Frank Nowak swojich přistajenych, přiwuznych, přećelow a znatych přeprosyłoj z nimaj prěnje pjeć lět wuspěšneho skutkowanja woswjećić.
Předstaja perspektiwy w domiznje
Wukubłanske wiki su dobra přiležnosć so wo powołanskich móžnosćach informować. Přichodnu sobotu wotměja so wiki Insidertreff w Lubiju, hdźež změje něhdźe 150 wustajerjow najwšelakoriše poskitki přihotowane.
Lubij (SN/BŠe). Koronapandemija je tež na wukubłanskich wikach swoje slědy zawostajiła. Wšelake praktikumy k powołanskej orientaciji njemóžachu přewjesć a tež zwučene wukubłanske wiki su organizatorojo wotprajili. Přiwšěm pak je zwisk mjez zawodami a předewzaćemi k šulerjam a šulerkam bytostny. Po dwěmaj lětomaj přestawki wotměja so nětko zaso wiki Insidertreff w Lubiju. Zarjadowanje je zhromadny projekt Zhorjelskeho wokrjesa, Drježdźanskeje industrijneje a wikowanskeje komory, Drježdźanskeje rjemjeslniskeje komory, Budyskeje agentury za dźěło kaž tež Zhorjelskeho joboweho centera.
