Wobšudnicy z e-mailemi łakaja

štwórtk, 14. oktobera 2021
artikl hódnoćić
(0 )

Ludowa banka: Porsty preč wot wopačneho digitalneho serwisa

Budyšin (mwe/SN). „Změnimy našu polisu“, „Změna wužiwanskich wuměnjenjow“ abo „Wažne wozjewjenje“ – to su jenož někotre nadpisma mejlkow, kotrež pječa Ludowa banka tele dny wužiwarjam swojich posłužbow sćele. Su pak to dospołnje njeseriozne mejlki, kotrež njeměli adresaća božedla z wotpowědnym klikom na přikazane městno wočinić. Wobšudnicy z tak mjenowanymi phishingowymi e-mailkami łakaja, zo bychu ludźom pjenjezy z kapsy ćahali.

Při tym so wopačny digitalny serwis Ludoweje banki dosć rjenje a serioznje čita. „Noweje EU-reformy dla dyrbimy wužiwarjow našich posłužbow wo nowe přizwolenje prosyć“, w tajkej mejlce mjez druhim rěka. A z „Přijomny dźeń a najlěpše postrowy – waš serwis Ludoweje banki“ so informacija kónči. Wšitko pak wěrno njeje, a kóždy, kiž na to skoči, sebi samomu škodźi.

wozjewjene w: Hospodarstwo
Prošu přizjewće so, chceće-li komentar podać

nawěšk